កំពង់ចាម: ប្រជាពលរដ្ឋ ពិតជាមានការត្រេកអរសាទរ និងសប្បាយរីករាយ ខណៈឯកឧត្តម អ៊ុន ចាន់ដា អភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ និងអាជ្ញាធរមូលដ្ឋាន នាព្រឹកថ្ងៃទី១១ ខែមីនា ឆ្នាំ២០២៣នេះ បានអញ្ជើញចុះពិនិត្យ និងសិក្សាគម្រោងសាងសង់ផ្លូវបេតុងចំនួន ៤ខ្សែ បន្ថែមទៀត ដែលមានប្រវែងសរុប ១៣៨១ម៉ែត្រ ទទឹង ៥ម៉ែត្រ និងបំពាក់ដោយអំពូលភ្លើងបំភ្លឺផ្លូវ ស្ថិតនៅក្នុងភូមិឡឥដ្ឋ សង្កត់បឹងកុក ក្រុងកំពង់ចាម ។
ឆ្លៀតក្នុងឱកាសចុះសិក្សាគម្រោងស្ថាបនាផ្លូវខាងលើនេះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានជួបសំណេះសំណាលសាកសួរសុខទុក្ខ បងប្អូនប្រជាពលរដ្ឋ ដែលរស់នៅតាមបណ្តោយដងផ្លូវខាងលេី ខណៈពួកគាត់មានការត្រេកអរសាទរជាខ្លាំងចំពោះការកសាងសមិទ្ធផលថ្មីនេះ ដោយបច្ចុប្បន្នប្រទេសជាតិយើងមានសុខសន្តិភាព ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃកម្ពុជា ទេីបមានការអភិវឌ្ឍន៍រីកចម្រើនជាបន្តបន្ទាប់ ជាក់ស្តែងដូចជាគម្រោងស្ថាបនាពីផ្លូវដី ទៅជាផ្លូវបេតុងខាងលេីនេះ គឺបង្កលក្ខណៈងាយស្រួលដល់ការធ្វើដំណើរ របស់បងប្អូនប្រជាពលរដ្ឋ ក៏ដូចជាអ្នករស់នៅក្នុងតំបន់នោះផងដែរ ។
បើតាមមន្ត្រីរដ្ឋបាល ខេត្តកំពង់ចាម បានឲ្យដឹងថា កន្លងទៅថ្មីៗនេះ សមិទ្ធផលផ្លូវបេតុង ស្ថិតនៅក្នុងមូលដ្ឋានខាងលើនេះ មានបណ្ដោយប្រវែង ជាង ២.០០០ម៉ែត្រ ទទឹងប្រវែង ៧ម៉ែត្រ ទេីបតែសាងសង់រួចហើយ ។ ដោយការកសាង ហេដ្ឋារចនាសម្ព័ន្ធទាំងនេះ គឺជាគម្រោងរបស់រដ្ឋបាលខេត្តកំពង់ចាម ដែល ឯកឧត្តម អ៊ុន ចាន់ដា អភិបាលខេត្តកំពង់ចាម បានខិតខំប្រឹងប្រែង ដើម្បី ជួយសម្រួលការលំបាក របស់ប្រជាពលរដ្ឋស្របតាមកម្មវិធីនយោបាយ កាត់បន្ថយភាពក្រីក្រ ក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃព្រះរាជាណចក្រកម្ពុជា ។
គួរបញ្ជាក់ថា ក្រៅពីសមិទ្ធផលផ្លូវបេតុង ៤ខ្សែ ដែលមានប្រវែងសរុប ១៣៨១ម៉ែត្រ ឯកឧត្តម អ៊ុន ចាន់ដា អភិបាលខេត្តកំពង់ចាម បានផ្ដល់អំពូលភ្លើងសូឡា ឱ្យមេភូមិឡឥដ្ឋ ៥២ អំពូល , មេភូមិចុងថ្នល់ ៣០ អំពូល , និង មេភូមិ បឹងកុក១ ចំនួន ១៨ អំពូល ដើម្បីបំពាក់បំភ្លឺពេលយប់ ទៅតាមសំណូមពររបស់មេភូមិទាំង ៣ ជាមួយគ្នានោះ ឯកឧត្ដមអភិបាលខេត្ត បានដឹកនាំក្រុមការងារ ចុះពិនិត្យការសាងសង់កុដិនៅវត្តជោតនារាមបឹងកុក ដើម្បីឱ្យសាមណសិស្ស និស្សិត ស្នាក់អាស្រ័យ នៅបួសរៀន ផងដែរ ៕
