ខេត្តសៀមរាប ៖ ស្រ្ដីគិតខ្លីម្នាក់សំលាប់ទារិកាដែលមានអាយុទើបតែ២០ថ្ងៃ ជាកូនបង្កើតខ្លួនឯងបំប៉ៅដោះ រួចផ្អឹបឲ្យថប់ដង្ហើមស្លាប់ ព្រោះតែរឿងខឹងនឹងប្តីរបស់ខ្លួន គិតតែដើរចោល មិនគិតរកស៊ីចិញ្ចឹម។ហេតុការណ៍នេះ បានកើតឡើងកាលពីថ្ងៃទី២៣ ខែមិថុនា ឆ្នាំ២០១៧ នៅចំណុចភូមិគោកត្រាច ឃុំខ្នាត ស្រុកពួក ខេត្តសៀមរាប។
តាមប្រ ភពពត័មានពីសមត្ថកិច្ចស្រុកពួកបានឲ្យដឹងថា ក្រោយទទួលដំណឹងពីករណីស្លាប់ កម្លាំងជំនាញស្រុកសហការផែនយុត្តិធ៌មនិងគ្រូពេទ្យ បានពិនិត្យសាកសព ហើយគ្រូពេទ្យ សន្និដ្ឋានថា ទារិការស្លាប់ដោយសារស្ទះផ្លូវដង្ហើម ហើយក្រោយពេលកើតហេតុ ជនសង្ស័យដែលជាម្តាយបានជិះម៉ូតូទៅស្រុកកំណើតរបស់ខ្លួននៅភូមិប្រាសាទចារ្យ ឃុំដូនកែវ ហើយត្រូវបានកម្លាំងសមត្ថកិច្ចនគរបាល ឃាត់ខ្លួនយកមកអធិការនគរបាលស្រុកពួក ដើម្បីស្រាវជ្រាវ។
នៅចំពោះមុខសមត្ថកិច្ច ជនសង្ស័យឈ្មោះ សែម រ៉ាន អាយុ១៨ឆ្នាំ ដែលជាម្តាយទារិកាសារភាពថា គេពិតជាបានសម្លាប់កូនខ្លួនឯងមែន នៅពេលកូនកំពុងបៅដោះ ដោយបានរុញក្បាលកូនផ្អឹបនឹងដោះរបស់ខ្លួន រហូតដល់ថប់ដង្ហើមស្លាប់ ព្រោះតែខឹងនឹងប្ដីរបស់ខ្លួនមិនរកស៊ីចិញ្ចឹម៕