ខេត្តព្រះសីហនុ ៖ ម៉ូតូ១គ្រឿងបត់ឆ្វេងឆ្លងថ្នល់ បណ្តាលឲ្យរថយន្តមកពីមុខគេចមិនទាន់ បុកពេញទំហឹង បណ្តាលឲ្យមនុស្សម្នាក់បាត់បង់ជីវិតនៅពេលយកទៅនៅពេទ្យ។
មានសេចក្តីរាយការណ៍ពីនគរបាលស្រុកព្រៃនប់បានឲ្យដឹងថា៖ នៅវេលាម៉ោង12,40នាទី ថ្ងៃទី24 ខែមិថុនា ឆ្នាំ2017 ថ្មីៗនេះ លើផ្លូវជាតិលេខ4 ចន្លោះគីឡូម៉ែត្រ 173-174 ស្ថិតក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ មានគ្រោះថ្នាក់ចរាចរណ៍ មួយកើតឡើង រវាងរថយន្ត1គ្រឿងម៉ាក LAND CRUISER ពណ៌ស្លែ ពាក់ស្លាក់លេខ ភ្នំពេញ2V-7886 អ្នកបើកបរឈ្មោះសាន កុកអាន ភេទប្រុស អាយុ22ឆ្នាំ មានទីលំនៅ ខណ្ឌចំការមន រាជធានីភ្នំពេញ មានទិសដៅ ពីភ្នំពេញ ឆ្ពោះមក ខេត្តព្រះសីហនុ លុះដល់ចំណុចខាងលើ ក៏មានម៉ូតូ1គ្រឿងម៉ាក HONDA C125 ពណ៌ខ្មៅ ពាក់ស្លាកលេខ ព្រះសីហនុ1E-2047 បត់ឆ្លងកាត់ផ្លូវ ចូលចំណែករថយន្ត បណ្ដាលឲ្យរថយន្តបុកពេញទំហឹង តែម្ដង(ទិសដៅបញ្រ្ចាស់គ្នា) ។
អ្នកបើកបរម៉ូតូឈ្មោះ នួន ប្រុស ភេទប្រុស អាយុ 30ឆ្នាំ មានទីលំនៅភូមិចំការកៅស៊ូ ឃុំជើងគោ ស្រុកព្រៃនប់ ខេត្តព្រះសីហនុ រងរបួសធ្ងន់ បានបញ្ជូនទៅសង្គ្រោះនៅមន្ទីរពេទ្យ ក្រោយមកបានស្លាប់។
ចំណែកអ្នកបើករថយន្តបានឃាត់ខ្លួន នាំមកសាកសួរនៅអធិការដ្ឋាននគរបាលស្រុកព្រៃនប់។ រីឯវត្ថុតាង រថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកព្រៃនប់រងចាំដោះស្រាយជាក្រោយ៕Chantha
