កំពង់ធំ៖ លោក អ៊ឹម ឆន ជាអភិបាលរងស្រុកសន្ទុក ដែលត្រូវបានគេដឹងថា ជាអ្នកមានមុខមានមាត់ ម្នាក់ ក្នុងចំណោមអភិបាលស្រុក ដោយសារក្រៅអីការងាររាជការ លោកមានអាជីពជាអ្នកដើររៀបចំដីធ្លីសម្រាប់លក់ ជូននាយទុន ដូចជាក្រុមហ៊ុនចិន និងឈ្មួញដីឯទៀតទាំងនៅប៉ែកវាលក្រោមប៉ែកទន្លេសាប និងប៉ែកខាងព្រៃលើ តែដោយសារការងាររកស៊ីពុំមានភាពស្មោះត្រង់ ក៏ត្រូវបានសមត្ថកិច្ចឃាត់ខ្លួនតាមពាក្យបណ្តឹងរបស់ក្រុមហ៊ុន ។
តាមប្រភពព័ត៌មាន បានឲ្យដឹងថា លោក អ៊ឹម ឆន អភិបាលរងស្រុកសន្ទុក ខេត្តកំពង់ធំ បានត្រូវសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃ ឃាត់ខ្លួនកាលពីថ្ងៃទី១៧ ខែកក្កដា ឆ្នាំ២០១៧ ខណៈពេលដែលត្រូវបានគេហៅឲ្យឡើងទៅបំភ្លឺនៅភ្នំពេញ ពីករណីដាច់លុយជាង២លានដុល្លារអាមេរិក តាមការ ឲ្យលោក អ៊ឹម ឆន រូបនេះជាអ្នករៀបចំដី តែទីបំផុតពុំមានដីឲ្យម្ចាស់លុយទេ មានតែដីខ្យល់ទំហំ១.៥០០ហិកតាទើបឈានដល់ការឃាត់ខ្លួន ពីបទឆបោក ។
លោកឈ្មោះ អ៊ឹម ឆន ភេទប្រុស អាយុ៤៣ឆ្នាំ មានទីលំនៅភូមិដូង ឃុំបាល័ង្ល ស្រុកបារាយណ៍ ខេត្តកំពង់ធំ បានត្រូវសមត្ថកិច្ចបញ្ជូនមក អយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី១៩ ខែកក្កដា ឆ្នាំ២០១៧ រហូតមកទល់រសៀលថ្ងៃទី២០ ខែកក្កដា លោកសៀង សុខ ព្រះរាជអាជ្ញា រងអមសាលាដំបូងរាជធានីភ្នំពេញ កំពុងធ្វើការសាកសួរតាមដំណើររឿង។
តាមប្រភពព័ត៌មានបានឲ្យដឹងថា លោក អ៊ឹម ឆន អភិបាលរងស្រុកសន្ទុក បានដើរតួនាទីជាអ្នករៀបចំដី ឲ្យលោកស្រី ហ៊ុន សេងនី ក្នុងឆ្នាំ២០១៥ ក្នុងទំហំដីសរុប ចំនួន១.៥០០ហិកតា នៅក្នុងឃុំចំនួន៤ ក្នុងស្រុកសន្ទុក ខេត្តកំពង់ធំ ដោយលោក អ៊ឹម ឆន បានទទួលលុយចំនួន ជាង២លានដុល្លារអាមេរិក ហើយបានសន្យាថា និងប្រគល់ប្លង់រឹងក្នុងខែមេសា ឆ្នាំ២០១៧ តែរហូតមកដល់ពេលនេះ ពុំបានប្រគល់ប្លង់ដីតាមសន្យានោះទេ ហើយក៏ពុំមានដីពិតប្រាកដនោះឡើយ ទើបឈានដល់ការកុហកបោកប្រាស់ នឹងឈានដល់ការឃាត់ខ្លួនតែម្តង។
ដោយ ប៊ុន រដ្ឋា
