កំពង់ចាម: បុរសចិត្តខ្លាំងម្នាក់ដែលជាប្អូនថ្លៃមិនទាន់រៀបការ បានចាប់អារ.កបងថ្លៃរបស់ខ្លួនបណ្តាលឲ្យរងរបួសយ៉ាងធ្ងន់ធ្ងរ ខណៈដែលអ្នកទាំង២បានផឹកស៊ីជាមួយគ្នា ហើយបងថ្លៃបានប្រាប់ទៅប្អូនថ្លៃថាបើឯងស្រលាញ់គ្នាមែននោះ ឲ្យចាស់ទុំចូលស្តីដណ្តឹងនាងទៅ ដែលហេតុការណ៍នេះបានកើតមានឡើងកាលពីវេលាម៉ោង៥និង៣០នាទីល្ងាច ថ្ងៃទី២០ ខែកញ្ញា ឆ្នាំ២០១៧ នៅភូមិកងតាណឹងទី៤ ឃុំកងតាណឹង ស្រុកកងមាស ខេត្តកំពង់ចាម។
អធិការរងនគរបាលស្រុកកងមាស លោកវរសេនីយ៍ត្រី ថុង ភូរីវុធ បានឲ្យដឹងថា ជនសង្ស័យមានឈ្មោះ ឆាយ ថាវី ភេទប្រុស អាយុ៣១ឆ្នាំ មានទីលំភូមិស្ទឹងសំរោង ឃុំអូរបាក់រទេះ ស្រុកកំពង់សិលា ខេត្តកោះកុង បច្ចុប្បន្នមានមុខរបរអ្នកលក់កាបូបនិងស្បែកជើង នៅបឹងទំពុន រាជធានីភ្នំពេញ ចំណែកជនរងគ្រោះមានឈ្មោះ ហង្ស រដ្ឋា ភេទប្រុស អាយុ៣១ឆ្នាំ មានទីលំនៅភូមិអង្គរ ឃុំព្រែកផ្ទោលស្រុកអង្គរបូរី ខេត្តតាកែវ ដោយអ្នកទាំង២មិនបានទៅលេងស្រុកកំណើតទេក្នុងឱកាសបុណ្យភ្ជុំបិណ្ឌនេះ គឺត្រូវមកលេងស្រុកកំណើតខាងប្រពន្ធ និងសង្សារ ដោយនៅមុនពេលកើតហេតុ ជនសង្ស័យ និងជនរងគ្រោះបានផឹកស៊ីជាមួយគ្នា ហើយជនរងគ្រោះដែលត្រូវជាបងថ្លៃ បានប្រាប់ទៅប្អូនថ្លៃថា បើឯងស្រលាញ់គ្នាយូរហើយ ម្តេចក៏មិនចូលស្តីដណ្តឹងនាង ដូច្នេះក្នុងរយៈពេល១ខែបើសិនជាមិនឃើញចាស់ទុំចូលស្តីដណ្តឹងទេ ប្រាកដជាមានបញ្ហាហើយ គ្រាន់តែនិយាយចប់ប្រមាណជា១៥នាទី គឺជនសង្ស័យបានយកកាំបិតឡាមចាប់អារកបងថ្លៃតែម្ដង បណ្ដាលឲ្យរងរបួសធ្ងន់ ហើយត្រូវបានក្រុមគ្រួសារបញ្ជូនទៅសង្គ្រោះនៅមន្ទីពេទ្យរាជធានីភ្នំពេញ ។
ក្រោយពីកើតហេតុ សមត្ថកិច្ចប៉ុស្តិ៍នគរបាលរដ្ឋបាលកងតាណឹងបានធ្វើការឃាត់ខ្លួនជនសង្ស័យ និងកសាងសំណុំរឿងតាមនីតិវិធីច្បាប់។
នៅចំពោះមុខសមត្ថកិច្ច ជនសង្ស័យបានសារភាពថា ទោះបីជាខ្លួនធ្លាប់ទៅរកស៊ីនៅប្រទេសថៃ ហើយធ្លាប់ប្រើប្រាស់គ្រឿងញៀនទៀត តែខ្លួនមិនដែលធ្លាប់ប្រព្រឹត្តបទល្មើសទេ តែពេលនេះដោយសារខឹងបងថ្លៃពេក ទើបបញ្ចេញកំហឹងតែម្ដង ៕