អួង វឹង:ខេត្តកំពត ៖ ដីព្រៃលិចទឹកជាច្រើនហិកតានៅជិតបង្គោលព្រំដែន៣១៤ នៅរបៀងខាងលិចច្រកទ្វារព្រំដែនអន្តរជាតិព្រែកចាក ក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត ។ កំពុងរងការកាប់បំផ្លាញពីក្រុមមនុស្សមួយចំនួននៅភ្នំពេញ ។
លោក មា ឡាន់ ប្រធានភូមិថ្កូវ បានប្រាប់ឲ្យដឹងកាលពីព្រឹកថ្ងៃទី៣១ ខែតុលា នេះថា អ្នកបញ្ជាឲ្យកាប់ដីព្រៃលិចទឹកនេះ គាត់នៅភ្នំពេញ តែជួលឲ្យប្រជាពលរដ្ឋនៅភូមិថ្កូវ ជាអ្នកកាប់ ។ លោកមេភូមិនិយាយថា ការកាប់ដីព្រៃលិចទឹកនេះ គឺគេមានច្បាប់ ។
លោក យន់ វេហា នាយសង្កាត់ជលផលស្រុកកំពង់ត្រាច បានប្រាប់ឲ្យដឹងថា អ្នកកាប់បំផ្លាញយកដីព្រៃលិចទឹក លោកកំពុងស្រាវជ្រាវ ថាតើអ្នកកាប់មានឯកសាអ្វីខ្លះ ។ លោក យន់ វេហា នាយសង្កាត់ជលផលបានប្រាប់ឲ្យដឹងថា អ្នកកាប់ព្រៃទាំងនោះច្រើនតែលួចកាប់នៅពេលមេឃភ្លៀង នៅខែតុលា ឆ្នាំ២០១៧នេះ ។ លោកនាយសង្កាត់បានប្រាប់បន្តថា អ្នកកាប់ព្រៃទាំងនោះអាចប្រឈមនឹងច្បាប់ ។
តាមការអះអាងពីមន្ត្រីយោធាការពារព្រំដែនគោកម្នាក់ បាននិយាយប្រាប់ឲ្យដឹងថា ប៉ុន្មានថ្ងៃនេះទាំងមន្ត្រីនគរបាលព្រំដែន មានការខ្សឹបប្រាប់តៗគ្នាថា អ្នកមានលុយត្រូវបានគេជួលពលរដ្ឋកាប់បំផ្លាញព្រៃលិចទឹកនៅជិតបង្គោលព្រំដែន៣១៤ ។ មន្ត្រីយោធារូបនោះមិនហាននិយាយជាសាធារណៈទេ ប៉ុន្តែគាត់បាននិយាយថា បើគ្មានថ្នាក់លើអន្តរាគមន៍ទេ ច្បាស់ជាធ្លាក់ទៅលើដៃអ្នកមានហើយ ៕
