អួង វឹង 3: ខេត្តកំពត: ប្រជាកសិករនៅខេត្តកំពតនិងខេត្តកែប ពិសេសប្រជាពលរដ្ឋ រស់នៅស្រុកទឹកឈូកនិងស្រុកដំណាក់ចង្អេីរខេត្តកែប បានរិះគន់លោក ឡេង វិបុល ប្រធានច្រកទ្វារអន្តរជាតិព្រែកចាកនិងបក្ខពួក ព្រមទាំងមន្ត្រីជំនាញមួយចំនួនទៀតថា មិនបានធ្វើការតាមជំនាញដើម្បីបម្រើនិងការពារផលប្រយោជន៍ប្រជាកសិករនិងប្រទេសជាតិទេ គឺគិតតែរឿងពុករលួយប្រមូលលុយឲ្យបានច្រើនប៉ុណ្ណោះ។ ការរិះគន់នេះគឺបានកើតឡើងក្រោយពីកសិករត្អូញត្អែរករណីមន្ត្រីជំនាញនៅច្រកទ្វារអន្តរជាតិព្រែកចាក ប្រើអំណាចគាបយកលុយពីពួកគាត់កាន់តែច្រើនឡើងៗតាមអំពើចិត្តរបស់ពួកគេ។
ប្រជាកសិករបានរាយការណ៍ប្រាប់អ្នកសារព័ត៌មានថា ស្វាយកែវរមៀតនិងផលិតផលមួយចំនួនតូចទៀត ដែលដាំបានដោយកម្លាំងញើសឈាមពួកគាត់មិនម៉ៅឱ្យឈ្មួញទេ គឺសុខចិត្តដឹកទៅយួនដោយផ្ទាល់។ ប៉ុន្តែមុននឹងចេញផុតពីច្រកទ្វារព្រែកចាក ខាងសមត្ថកិច្ចកម្ពុជាបានកំណត់ឲ្យបង់លុយច្រើនកន្លែងតាំងពីគយ ពេទ្យសត្វ នគរបាល កាំកុងត្រូលជាដើម ហើយមន្ត្រីជំនាញទាំងនោះគ្មានធ្វើក្រដាសស្នាមបែបទអ្វីត្រឹមត្រូវទេ គឺតថ្លៃជាមួយឈ្មួញយកលុយដូចមុខរបររកស៊ី ហើយប្រើសំដីមិនសមរម្យទៀតផង។
ចំពោះមុខការរិះគន់ពីគ្រប់ទិសទីនោះលោក ឡេង វិបុល ប្រធានច្រកទ្វារអន្តរជាតិព្រែកចាក បានបំភ្លឺប្រាប់អ្នកសារព័ត៌មានថា លោករវល់ការងារច្រើននៅសាលាខេត្ត។ ដូច្នេះក្នុងករណីបងប្អូនណាជួបបញ្ហាដូចខាងលើមែន សូមអញ្ជើញនាំគ្នាមកជួបលោកដោយផ្ទាល់ឬតាមទូរសព្ទក៏បាន។ តែប្រជាពលរដ្ឋស្រុកទឹកឈូ បានបញ្ជាក់ថា ដោយសារតែច្បាប់កម្ពុជាធូររលុង មន្ត្រីពុករលួយបក្ខពួកនេះហើយ បានជាមន្ត្រីជំនាញមិនបានបម្រើផលប្រយោជន៍ជាតិនិងប្រជាពលរដ្ឋគឺគិតតែប្រព្រឹត្តអំពើពុករលួយប្រមូលលុយចែកគ្នា ហើយឆ្លើយយករួចខ្លួនរហូត។
ក្រុមឈ្មួញខ្មែរដែលដឹកទំនិញឆ្លងដែននិងក្រុមកសិករធ្វើចម្ការក្នុងទឹកដីឃុំត្រពាំងព្រីង ស្រុកទឹកឈូ ខេត្តកំពតបានរៀបរាប់ថា មន្ត្រីជំនាញកំពុងតែបានចិត្តយ៉ាងខ្លាំងព្រោះអាជ្ញាធរខេត្តកំពត និងមន្ត្រីក្រសួងពាក់ព័ន្ធក៏ស្ងាត់មាត់ចាំយកលុយពីមន្ត្រីនៅតាមច្រកព្រំដែនដោយគ្មានខ្វល់ខ្វាយពីសុខទុក្ខប្រជាពលរដ្ឋទាល់តែសោះ។ 
ប្រភពដដែលបានបញ្ជាក់ថាក្នុងមួយថ្ងៃៗមន្ត្រីជំនាញនៅតាមព្រំដែនដូចជាលោក ឡេង វិបុល ប្រធានច្រកទ្វារអន្តរជាតិព្រែកចាកជាដើមរកលុយបានរាប់លានរៀលដែលអ្នកខ្លះសល់លុយទិញផ្ទះទិញដីច្រើនកន្លែង ខណៈប្រជាពលរដ្ឋរកស៊ីតូចតាចនិងមន្ត្រីខ្លះគ្មានឱកាសពុករលួយ នៅតែមានជីវភាពក្រីក្រខ្វះខាតរហូត៕
