អួង វឹង 3:
ខេត្តកំពត សាលាខេត្តកំពត នៅរសៀលថ្ងៃពុធ១កើត ខែមាឃ ឆ្នាំរកា នព្វស័ក ព.ស២៥៦១ត្រូវថ្ងៃទី១៧ ខែមករាឆ្នាំ២០១៨។
ឯកឧត្តមជាវ តាយអភិបាលនៃគណៈអភិបាលខេត្តបានដឹកនាំកិច្ចប្រជុំគណៈកម្មាធិការសម្របសម្រួលបច្ចេកទេសក្រុមប្រឹក្សាខេត្តស្ដីពីការពិនិត្យនិងផ្ដល់់
យោបល់លើកម្មវិធីវិនិយោគបីឆ្នាំរំកិលរបស់រដ្ឋបាលខេត្តកំពត(២០១៨-២០២០) ដែលកិច្ចប្រជុំនេះមានសមាសភាពចូលរួមពី សមាជិកមួយចំនួននៃក្រុមប្រឹក្សា និងគណៈអភិបាលខេត្ត ព្រមទាំងអាជ្ញាធរក្រុង ស្រុក មន្ទីរ អង្គភាពជំនាញជុំវិញខេត្ត។របៀបវារៈសំខាន់ៗក្នុងកិច្ចប្រជុំនេះរួមមាន៖ ទី១-របាយការណ៍តាមដានត្រួតពិនត្យលទ្ធផល អនុវត្តកម្មវិធីវិនិយោគឆ្នាំ២០១៧ ។
ទី២-សេចក្ដីថ្លែងហេតុនៃដំណើរការរៀបចំកសាងកម្មវិធីវិនិយោគបីឆ្នាំរំកិលខេត្ត(២០១៨-២០២០)។
ទី៣-បង្ហាញសេចក្ដីព្រាងកម្មវិធីវិនិយោគបីឆ្នាំរំកិលខេត្ត (២០១៨-២០២០)។ទី៤-ពិនិត្យនិងផ្ដល់យោបល់សេចក្ដីព្រាងកម្មវិធីវិនិយោគបីឆ្នាំរំកិលខេត្ត(២០១៨-២០២០)។
ទី៥-បង្ហាញសេចក្ដីព្រាងផែនការសកម្មភាពថវិកា ផអ៣ឆ្នាំ២០១៨។ទី៦-ពិនិត្យផ្ដល់យោបល់សេចក្ដីព្រាងផែនការសកម្មភាពថវិកាផអ៣ឆ្នាំ២០១៨។ 
គឺក្នុងគោលបំណង រួមគ្នាពិនិត្យ ពិភាក្សា និងកែតម្រូវរាល់ខ្លឹមសារនូវសេចក្ដីព្រាងសៀវភៅកសាងផែនការកម្មវិធីវិនិយោគបីឆ្នាំរំកិលខេត្ត(២០១៨-២០២០)មុននឹងដាក់ឆ្លងក្រុមប្រឹក្សាខេត្តដើម្បីពិនិត្យនិងអនុម័ត។
នៅក្នុងកិច្ចប្រជុំនេះឯកឧត្តមជាវ តាយ អភិបាលខេត្តបាន មានប្រសាសន៍ វាយតម្លៃខ្ពស់ចំពោះលទ្ធផលនៃការខិតខំរបស់ក្រុមការងារកសាងផែនការខេត្ត ក៏ដូចជាបណ្ដាមន្ទីរ អង្គភាព និងរដ្ឋបាលក្រុង ស្រុកព្រមទាំងអ្នកពាក់ព័ន្ធទាំងអស់ដែលបានសហការគ្នាក្នុងការប្រមូលព័ត៌មាន ស្ដីពីតម្រូវការរបស់មូលដ្ឋានសម្រាប់ការកសាងផែនការកម្មវិធីវិនិយោគបីឆ្នាំរំកិលខេត្តឡើង ដែលមានលក្ខណៈជ្រុង
ជ្រោយគួរប្រសើរ។ ក្នុងគោលដៅរួមគ្នាធ្វើការអភិវឌ្ឍន៍ខេត្តកំពតដែលជាខេត្តមួយមានសក្ដានុពលទាំងវិស័យសេដ្ឋកិច្ចនិងទេសចរណ៍អោយមានការរីកចម្រើនកាន់តែប្រសើរឡើងថែមទៀត។ ជាមួយនាឱកាសនោះដែរឯកឧត្តមជាវ តាយ ក៏បានលើកគូសបញ្ជាក់ដែរថា៖ រដ្ឋបាលនៅថ្នាក់ក្រោមជាតិថ្វីត្បិតមិនមែនជាសមាជិករាជរដ្ឋាភិបាល។ ប៉ុន្តែវាជាតំណាងឬជាសេនាធិការអោយរាជរដ្ឋាភិបាល។
ដូចនេះថ្នាក់ដឹកនាំនៃបណ្ដាមន្ទីរ អង្គភាពជំនាញទាំងអស់ដែលជាសេនាធិការអោយរដ្ឋបាលខេត្តទាំងមូល រួមនឹងរូបឯកឧត្តមផ្ទាល់ដែលទើបមកកាន់តំណែងជាអភិបាលខេត្ត។យើងត្រូវរួមគ្នាគិត រួមគ្នាធ្វើ រួមគ្នាពិភាក្សាដោះស្រាយរាល់សេចក្ដីត្រូវការរបស់ប្រជាពលរដ្ឋស្របតាមគោលនយោបាយរាជរដ្ឋាភិបាលដែលមានសម្ដេចតេជោហ៊ុនសែនជាប្រមុខដឹកនាំ ទើបលទ្ធផលការងារយើងសម្រេចបានល្អនិងទទួលជោគជ័យ ពោលគឺគ្មានការងារអ្វីដែលយើងបានរួមគ្នាគិត រួមគ្នាធ្វើ រួមគ្នាដោះស្រាយហើយមិនទទួលបានជោគជ័យនោះទេ។ ពាក់ព័ន្ធនៅក្នុងនៃកិច្ចប្រជុំនាពេលនេះដែរ ឯកឧត្តម អភិបាលខេត្ត ក៏បានផ្ដាំផ្ញើ និងជំរុញអោយមន្ទីរអង្គភាពជំនាញ ដែលត្រូវកែតម្រូវ សូមប្រញាប់បញ្ជូនខ្លឹមសារកែតម្រូវអោយបានឆាប់មកដល់ក្រុមការងារកសាងផែនការខេត្ត ដើម្បីធ្វើការដាក់ឆ្លងក្នុងកិច្ចប្រជុំវិសាមញ្ញក្រុមប្រឹក្សាខេត្តនៅថ្ងៃ២៤មករាឆ្នាំ២០១៨ខាងមុខនេះស្របទៅនឹងការណែនាំរបស់ក្រសួងមហាផ្ទៃដែលបានដាក់អោយអនុវត្តផងដែរ។
