កំពង់ចាម: ភ្ញៀវទេសចរណ៍បរទេស និងខ្មែរចំនួន៣១នាក់ ជិះលើរថយន្តក្រុងរបស់ក្រុមហ៊ុន ភ្នំពេញ សូរីយា ដឹកអ្នកដំណើរ ភ័យព្រលឹងចុងសក់ ស្រែកស្លន់ស្លោទ្រហឹងពេញ
រថយន្ត ខណៈដែលធ្វើដំណើរសុខៗ ស្រាប់តែមានបុរសម្នាក់ ហក់មកប្រទាញដណ្ដើមយកចង្កូតរថយន្តពីអ្នកបើកបរ បណ្តាលឲ្យរថយន្តរេពេញផ្លូវ និងបុកឡើងសួនដាំស្មៅ។
ហេតុការណ៍នេះបានកើតមានឡើងកាលពីវេលាម៉ោង៩និង៤០នាទីព្រឹក ថ្ងៃទី៤ ខែមករា ឆ្នាំ២០១៨ នៅលើកំណាត់ផ្លូវជាតិលេខ៦A ស្ថិតក្នុងភូមិរវាង ឃុំខ្នុរដំបង ស្រុកជើងព្រៃ ខេត្តកំពង់ចាម។
មន្ត្រីនគរបាលចរាចរណ៍ បានឲ្យដឹងថា អ្នកបើកបររថយន្តក្រុងមានឈ្មោះ ភុំ ភីណាក់ ភេទប្រុស អាយុ៣៥ឆ្នាំ មានទីលំនៅភូមិចុងដូង ឃុំចុងដូង ស្រុកបារាយណ៍ ខេត្តកំពង់ធំ ដែលបានបើករថយន្តក្រុងរបស់ក្រុមហ៊ុន ភ្នំពេញ សូរីយា ដឹកអ្នកដំណើរ ពាក់ស្លាកលេខ ភ្នំពេញ3B-1863 បើកបរក្នុងទិសដៅពីភ្នំពេញ ទៅខេត្តសៀមរាប ខណៈមកដល់ត្រង់ចំណុចកើតហេតុ ស្រាប់តែមានបុរសម្នាក់ឈ្មោះ ជាម ជៀន ភេទប្រុស អាយុ៣០ឆ្នាំ មានទីលំនៅភូមិគោកមាន់ ឃុំតាសម ស្រុកអង្គរជុំ ខេត្តសៀមរាប ដោយសង្ស័យបែកថ្នាំ បានហក់ចូលទៅទាញដណ្ដើមយកចង្កូតរថយន្តពីអ្នកបើកបរ បណ្តាលឲ្យរថយន្តរេពេញផ្លូវ និងបុកឡើងលើសួនដាំស្មៅ តែសំណាងល្អមិនមានអ្នករងរបួសទេ គ្រាន់តែមានការភិតភ័យ ព្រលឹងចុងសក់ ទាំងភ្ញៀវបរទេស និងខ្មែរ។
ក្រោយពីកើតហេតុ សមត្ថកិច្ចបានចុះទៅធ្វើអន្តរាគមន៍ សម្រួលចរាចរណ៍ និងឃាត់ខ្លួនជនបង្កដើម្បីធ្វើការសួរនាំផងដែរ ដោយជនបង្កថា មានគេប៉ងចាប់ខ្លួនវេះយកក្រលៀន ទើបមានរឿងដូច្នេះកើតឡើង។
ដោយឡែកប្រពន្ធជនបង្កឈ្មោះ តឹម នីន អាយុ២៩ឆ្នាំ ដែលបានរួមដំណើរជាមួយគ្នា បាននិយាយថា ខ្លួននិងប្តី មានស្រុកកំណើត នៅខេត្តសៀមរាប ដោយជីវភាពខ្វះខាត ទើបបាននាំគ្នាមកស៊ីស្នួលគេធ្វើជាកម្មករសំណង់ នៅភ្នំពេញ តែរយៈពេលប៉ុន្មានថ្ងៃចុងក្រោយនេះ ប្តីរបស់ខ្លួន ហាក់ដូចជាមានអាការៈមិនស្រួលសោះ ចេះតែរវើរវាយទៀតផង ទើបសម្រេចចិត្តនាំគ្នាទៅស្រុកវិញ តែមិននឹកស្មានថាមានរឿងបែបនេះសោះ ៕
