កំពង់ធំ៖ លោកវរសនីយទោ យ៉េត ហុន អតីតមេបញ្ជាការផ្នែកសឹករងសន្ទុក បានគោរពថ្លៃអំណរគុណ សម្តេចតេជោ ហ៊ុន សែន និងសម្តេចកត្តិប្រឹត្តបណ្ឌិត ប៊ុន រ៉ានីហ៊ុន សែន ដែលមានមេត្តាធម៌ដល់អតីតយុទ្ធជន មានជីវភាពក្រីក្រ។ 
សកម្មភាពរបស់សមាគមអតីតយុទ្ធជនកម្ពុជា ខេត្តកំពង់ធំ បានបន្តសកម្មភាពចុះប្រគល់ផ្ទះជូនដល់អតីតយុទ្ធជន លោកវរសនីយទោ យ៉េត ហុន ដែលជាអតីតមេបញ្ជាការផ្នែកសឹករងសន្ទុក នៃតំបន់ប្រតិបត្តិការសឹករងកំពង់ធំ បានទទួលផ្ទះថ្មីមួយខ្នងជាអំណោយលើកទី៥៨ សម្រាប់ខេត្តកំពង់ធំ របស់សម្តេចតេជោ ហ៊ុន សែន បានប្រគល់ជូននៅរសៀលថ្ងៃទី ៦ ខែកុម្ភះ ឆ្នាំ ២០១៨ នៅភូមិ ប្រាសាទ ឃុំប្រាសាទ ស្រុកសន្ទុក ខេត្តកំពង់ធំ ។
លោកវរសនីយទោ យ៉េត ហុន អាយុ ៦៣ ឆ្នំា បានចូលបម្រើក្នុងជួរកងទ័ពនៅថ្ងៃទី១០ ខែកក្កដា ឆ្នាំ១៩៨៥ ធ្លាប់បានឆ្លងកាត់ជាច្រើនអង្គភាព មានដូចជា÷ នៅអង្ភភាពសាលាហ្វឹកហ្វឺនយោធាខេត្ត រយៈពេល ០៣ ឆ្នាំ ,នៅអង្ភភាពយោធាស្រុកកំពង់ស្វាយ រយៈពេល ០៣ ឆ្នាំ ,ជាអនុប្រធានយោធាទីរួមខេត្តរយៈពេល ០២ ឆ្នាំ ,ជាអនុប្រធានយោធាវរសេនាតូចលេខ១ រយៈពេល ១០ ឆ្នាំ ,ជាអនុប្រធានយោធាវរសេនាតូចលេខ ០៦ រយៈពេល ២ឆ្នាំ ,ជានាយរងការិយាល័យហ្វឹកហ្វឺនតំបន់ប្រតិបត្តិការសឹករងកំពង់ធំរយៈពេល០២ ឆ្នាំ ,ចុងក្រោយជាមេបញ្ជាការរង និងជាមេបញ្ជាការ ផ្នែកសឹករងសន្ទុក នៃតំបន់ប្រតិបត្តិការសឹករងកំពង់ធំ រយៈពេល ១១ ឆ្នាំ ក្នុងរយៈពេលបំពេញភារកិច្ច ៣៣ ឆ្នាំ ធ្លាប់បានឆ្លងកាត់ការប្រយុទ្ធ ៣៦ លើក ។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានប្រសាសន៍ថាដោយមានការអាណិតអាសូ ជីវិតនាយទាហានរូបនេះ ដែលបានបំរើការងារ ជាយោធា អស់រយះពេល៣៣ ឆ្នាំ គឺគ្មានផ្ទះគ្មានសំបែង រស់នៅតែក្នុងបន្ទាយ រហូតឈានដល់ជីវិតចុងក្រោយរបស់យោធា គឺថ្ងៃចូលនិវត្តន៍
សម្តេចតេជោ ហ៊ុន សែន បានផ្តល់ទ្រនំដ៏សមរម្យមួយ តាមរយៈឯកឧត្ដម នាយឧត្តមសេនីយ៍ គន់ គីម សាងដែលមានទំហំ ៥មx ៦ម ចំណាយថវិកាសាងសង់ ៦,៦៦០,០០០ រៀល សាងសង់ដោយ សមាគមអតីតយុទ្ធជនកម្ពុជាខេត្តកំពង់ធំ និងប្រគល់ជូនក្នុងថ្ងៃនេះ ក្នុងនោះក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានផ្ដល់ជូនគាត់បន្ថែមទៀតនូវអង្ករចំនួន ៥០គ.ក្រ ,មីម៉ាម៉ា ០២ កេស ,មុងជ្រលក់ថ្នាំចំនួន ០២ ,ទឹកត្រីទឹកស៊ីអ៉ីវ ០២ យួរ និងថវិកាចំនួន ១៥០,០០០ រៀល ។
លោកវរសនីយទោ យ៉េត ហុន បានអគុណចំពោះឯកឧត្តម ឧត្តមសេនីយ៍ត្រី សោម ស៊ុន ប្រធានសមាគម អតីតយុទ្ធជនខេត្តកំពង់ធំ និងសមាគមស្រុក រួមទាំងក្រុមការងារ ទាំងអស់ដែលបានយកចិត្តទុកដាក់ រួមទាំងកំលាំងចិត្ត កំលាំងកាយសាងសង់ជម្រកស្នាក់នៅ សូមជូនពរឲ្យជួបប្រទះតែសេចក្តីសុខ និងសម្រេចការងារគ្រប់ភារកិច្ច ។ដោយ ប៊ុន រដ្ឋា
