ព្រះសីហនុ៖យោងតាមប្រភពពី លោកវរសេនីយ៍ទោ ប៉ោ ប៊ុណ្ណារ៉ា នាយការិយាល័យនគរបាលទេសចរណ៍ខេត្តព្រះសីហនុ បានឲ្យដឹងនៅថ្ងៃសុក្រ ២កើត ខែផល្គុន នព្វស័ក ព.ស២៥៦១ ត្រូវនឹងថ្ងៃទី ១៦ ខែកុម្ភៈឆ្នាំ២០១៨ នៃពិធីបុណ្យចូលឆ្នាំចិន វៀតណាម មានភ្ញៀវទេសចរ ចំរុះជាតិសាសន៍ ទៅកម្សាន្តតាមបណ្តាកោះនានាក្នុងខេត្តព្រះ សីហនុ មានចំនួនសរុប ៣,២៣៩នាក់ ស្រី១,៤៣០នាក់ ជនជាតិខ្មែរ ១,៣១៦នាក់ ស្រី ៥៤៦នាក់ និងភ្ញៀវទេសចរបរទេសចំនួន ១, ៩២៣នាក់ ស្រី ៨៨៤នាក់ ដែលថ្ងៃធម្មតាមានភ្ញៀវទេសចរណ៍ទៅលេងកម្សាន្តតាមកោះ មានចំនួនតែជាង ១.០០០នាក់ ។
លោកវរសេនីយ៍ទោ ប៉ោ ប៊ុណ្ណារ៉ា បានបញ្ជាក់ថា ដោយអនុវត្តតាមបទបញ្ជា និងការណែនាំរបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ សមត្ថកិច្ចជំនាញគ្រប់ផ្នែកពិសេសនគរបាលទេសចរណ៍ បន្តតាមដានការប្រែប្រួលអាកាសធាតុជាប់ជាប្រចាំ និងចុះត្រួតពិនិត្យ នៅតាមគោលដៅផែទូកទេសចរណ៍ទាំងអស់ និងធ្វើការណែនាំឲ្យម្ចាស់ជលយាន ត្រូវមានប្រុងប្រយ័ត្ន បំពាក់អាវពោងការពារសុវត្ថិភាពជូនភ្ញៀវទេសចរណ៍ឲ្យបានជាប់ជាប្រចាំ ជៀសវាងមានហានិភ័យផ្សេងៗ កេីតឡេីង និងហាមមិនឲ្យដាក់ភ្ញៀវលើសចំនួនកំណត់ឡើយ។ប្រសិនបើម្ចាស់ទូកទេសចរណ៍ណាមួយ មិនមានអាវពោងសុវត្ថិភាពជូនភ្ញៀវទេ មិនអនុញ្ញាតឲ្យធ្វើចរា ចរណ៍លើផ្លូវទឹកបានទេ។
ការពង្រឹងការងារនេះគឺធ្វើយ៉ាងណា
ដើម្បីធានាសុវត្ថិភាព និងសន្តិសុខជូនភ្ញៀវទេសចរក្នុងការធ្វើដំណើរទៅកម្សាន្តតាមកោះ និងការវិលត្រឡប់មកវិញប្រកបដោយសុវត្ថិភាព៕
(ដោយក្រុមគេហទំព័រខេត្ត)
