កំពង់ធំៈ សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា បានផ្តល់អំណោយផ្ទះមួយខ្នងដែល ជាផ្ទះលើកទី៦០ សម្រាប់ខេត្តកំពង់ធំ បានប្រគល់ផ្ទះជូន អុំស្រី ទូច សៅរ៉ន ជាគ្រួសារអតីតយុទ្ធជនពលី ដែលមានជីវភាពខ្វះខាត និងគ្មានលទ្ធភាពសាងសង់ជម្រកស្នាក់នៅសមរម្យ ទើបក្រោមការយកចិត្តទុកដាក់ របស់សម្តេចនាយករដ្ឋមន្រ្តីនៃព្រះរាជាណាចក្រកម្ពុជា ឲ្យសមាគមអតីតយុទ្ធជនខេត្តសាងសង់ជូនគ្រួសារ អតីតយុទ្ធជនពលីមួយគ្រួសារនេះឲ្យមានជម្រក់ស្នាក់នៅសមរម្យនិងគេ ។
អុំស្រី ទូច សៅរ៉ន ត្រូវជាភរិយាអតីតយុទ្ធជនពលីឈ្មោះ លីញ លាង រស់នៅក្នុងស្ថានភាពជាស្រ្តីមេម៉ាយ បន្ទាប់ពីស្វាម៉ីបានពលីជីវិត បានបន្សល់កូនចំនួន១១នាក់ ស្រី៦នាក់ ឲ្យមើលថែបច្ចុប្បន្ន ក្នុងចំណោមកូនទាំង១១នាក់ មានឈ្មោះបោះឆ្នោតចំនួន៧នាក់ រស់នៅភូមិថ្នល់ថ្មី ឃុំបារាយណ៍ ស្រុកបារាយណ៍ ខេត្តកំពង់ធំ និងត្រូវបានទទួលផ្ទះមួយខ្នង នៅម៉ោង៥ ល្ងាចថ្ងៃទី១៩ ខែកុម្ភៈឆ្នាំ២០១៨ ។
ពិធីប្រគលផ្ទះមួយខ្នងដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន ស្ថិតក្រោមអធិបតីភាព ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគម អតីតយុទ្ធជនកម្ពុជាខេត្តកំពង់ធំ ដោយមានការចូលរួម សមាគមស្រុក-ឃុំ និងអាជ្ញាធរ ជូនគ្រួសារអតីតយុទ្ឋជនឈ្មោះ ទូច សៅរ៉ន អាយុ ៥១ឆ្នាំ ដែលជាគ្រួសារអតីតយុទ្ឋជនពលី ឈ្មោះ លីញ លាង អតីតនៅអង្គភាពយោធាស្រុកបារាយណ៍ បានពលីជីវិតនៅសមរភូមិល្អក់ វល្លិ៍យាវ ឃុំដំរីស្លាប់ស្រុកំពង់ស្វាយ ខេត្តកំពង់ធំ នៅឆ្នាំ ១៩៨៩ ផ្ទះថ្មីដែលបានប្រគល់នេះ មានទំហំ ៤មx៦ម សង់ខ្ពស់ផុតពីដី ជញ្ជាំងនិងដំបូល សង្កសី ក្រាលក្តារ ដែលចំណាយថវិកាក្នុងការសាងសង់ចំនួន៦,២៨៩,០០០ រៀល (គិតទាំងថ្លៃឈ្នួលជាងផង) ។
នៅក្នុងពិធីប្រគល់ផ្ទះថ្មីនេះ ក្រុមការងារសមាគមអតីតយុទ្ធជនកម្ពុជាខេត្ត បានឧបត្ថម្ភជូនគាត់បន្ថែមនូវ អង្ករ ៥០គីឡូក្រាម ,មីម៉ាម៉ា ០២ កេស,ទឹកត្រីទឹកស៊ីអ៊ីវ ០២ យួរ ,មុងជ្រលក់ថ្នាំចំនួនមួយ ,អាវរងា ចំនួន ០២ និងថវិកាចំនួន ៣១០,០០០រៀល
ក្រោយពីទទួលបានផ្ទះថ្មីនេះ គ្រួសារអតីតយុទ្ឋជនពលី និងអាជ្ញាធរមូលដ្ឋាន មានចិត្តរំភើបក្តុកក្តួល មិននឹកស្មានថាបានទទួលផ្ទះថ្មីនៅថ្ងៃនេះ និងសូមគោរពជូនពរចំពោះសម្តេចតេជោ ហ៊ុន សែននិងសម្តេចកត្តិព្រឹត្តបណ្ឌឹត សូមជួបប្រទះតែនឹងពុទ្ធពរទាំងបួនប្រការបួនប្រការគឺអាយុវណ្ណៈសុខះនិងពលៈកុំបីឃ្លាងឃ្លាតឡើយ។ ហើយបានប្តេជ្ញាគាំទ្រសម្តេចតេជោហ៊ុនសែន ជានាយករដ្ឋមន្ត្រីជារៀងរហូត ។
ដោយ ប៊ុន រដ្ឋា
