ខេត្តកំពង់ធំៈ កិច្ចប្រជុំមួយ បានធ្វើឡើងស្តីអំពី ការអនុវត្តបន្តសាងសង់ផ្ទះដែលនៅសល់២៥ខ្នងផ្ទះទៀត សម្រាប់ចែកជូនដល់ក្រុមគ្រួសារអតីតយុទ្ធជនដែលមានជីវភាពក្រីក្រលំបាកពិតៗ រួមទាំងបន្តបំពាក់មេដាយ ការពារជាតិជូនដល់អតីតយុទ្ធជនដែលនៅសល់ ក្នុងនោះមានស្រុកចំនួន ៤គឺ ស្រុកស្ទោង ស្រុកកំពង់ស្វាយ ស្រុកប្រាសាទសំបូរ និងស្រុកសណ្តាន់ ។
ពីធីប្រជុំក្រុមលេខាធិការដ្ឋានសមាគមអតីតយុទ្ធជនកម្ពុជាខេត្តកំពង់ធំ ត្រូវបានធ្វើឡើងនៅក្នុងទីបញ្ជាការដ្ឋានតំប់ប្រតិបត្តិការសឹករងកំពង់ធំ នៅព្រឹកថ្ងៃទី១៣ ខែមីនា ឆ្នាំ២០១៨ ក្រោមអធបតីភាព ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការដ្ឋានតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្តកំពង់ធំ ដើម្បីអនុវត្តន៍តាមបទបញ្ជរបស់ឯកឧត្ដមនាយឧត្តមសេនិយគន់ គីម អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិមិន្ទ អគ្គលេខាធិការសមាគមអតីតយុទ្ធជនកម្ពុជា ដែលមានក្លឹមសារទី ១-បន្តការសាងសង់ផ្ទះជូនគ្រួសារអតីយុទ្ឋជន ដែលមានដី គ្មានផ្ទះ ពិតប្រាកដ ដែលនៅមិនទាន់បានធ្វើរួចចំនួន ២៥ ខ្នងទៀត នៅទូទាំងខេត្ត ។ ២- ពិនិត្យសហការជាមួយស្ថាប័នពាក់ព័ន្ធដើម្បីរៀបចំដីជូនអតីតយុទ្ឋជន ដែលគ្មានដីគ្មានផ្ទះ ពិតប្រាកដ ចំនួន ៨៩ គ្រួសារ ។ ៣-បន្ត ការបំពាក់មេដាយការពារជាតិជូនអតីតយុទ្ឋជនយើង ដែលមិនទាន់បានបំពាក់ចំនួន ៤ស្រុកទៀតស្មើរនឹង១៤០០០នាក់ទៀត ត្រូវធ្វើឲ្យបានចប់សព្វគ្រប់ នៅក្នុងខែមិថុនា ឆ្នាំ២០១៨។
ឯកឧត្តម សោម ស៊ុន បានបញ្ជាក់ថា សមាគមអតីតយុទ្ធជនកម្ពុជាខេត្តកំពង់ធំ ត្រូវបានការលើកសសើរពីសំណាក់ឯកឧត្តមនាយឧត្តមសេនិយគន់ គីម អគ្គលេខាធិការសមាគមអតីតយុទ្ធជនកម្ពុជា ថាជាអង្គភាពមួយលេចធ្លោជាងគេ ក្នុងការបំពេញភារកិច្ចដែលបានប្រគល់ ដូចជាការធ្វើបច្ចុប្បន្នភាពគ្រប់គ្រងអតីតយុទ្ធជន ការសាងសង់ផ្ទះស្នាក់នៅជូនអតីតយុទ្ធជន ដែលមានដីគ្មានផ្ទះ ការចុះសំណេះសំណាលសាកសួរសុខទុក្ខដល់លំនៅដ្ឋានគ្រួសារអតីតយុទ្ឋជនយុទ្ធជន ដែលជួបការលំបាកនិងមានភាពខ្វះខាត ។ ដោយ ប៊ុន រដ្ឋា
