ខេត្តកំពង់ធំៈ អតីតយុទ្ឋជនពិការឈ្មោះ គង់ សំបូរ ដែលមានជីវភាពលំបាក ដោយសារតែជីវិតជួបនិងគ្រោះ ចំនួន២ដំណាក់កាល តែទោះបីជាជីវិតជួបនូវរឿងរ៉ាវដ៏ធំធេងនេះ ក៏លោក គង់ សំបូរ នៅតែតស៊ូជីវិត ជំនះឧបស័គ្គគ្រប់យ៉ាងដើម្បីចិញ្ចឹមកូនគាត់ទាំង៥នាក់ ដោយត្រដាប់ត្រដួស ក្រោយពីភរិយាគាត់បានស្លាប់ ចោលទៅ ។
ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី រួមជាមួយអាជ្ញាធរដែនដីភូមិ ឃុំ ចុះសួរសុខទុក្ខលោក គង់ សំបូរ ដែលជាអតីតយុទ្ធជនពិការ នៅល្ងាចថ្ងៃទី១៣ ខែមីនា ឆ្នាំ២០១៨ ដែលជាអ្នកតស៊ូមួយរូប និងមានស្នា ដៃក្នុងការបំរើជាតិមាតុភូមិ នាំសន្តិភាពជូនប្រជាជាតិខ្មែររហូតមកដល់ពេលនេះ។
លោក គង់ សំបូរ អាយុ៦៥ឆ្នាំធ្លាប់បានចូលបម្រើក្នុងជួរកងទ័ពនៅថ្ងៃទី១៥ខែមិនា ឆ្នាំ១៩៧៩ នៅក្នុងវរសេនាតូចលេខ៧ វរសេធំលេខ២ ក្រោមការដឹកនាំរបស់សមមិត្តព្រំ ថាវ (អតីតអនុប្រធានអគ្គសេនាធិការក្នុងសម័យរដ្ឋកម្ពុជា)គង់ សំបូរ ត្រូវរបួសនៅសមរភូមិតំបន់កូនដំរី ក្នុងទឹកដីប៉ៃលិន នៅឆ្នាំ១៩៩៤ គាត់មានភរិយាឈ្មោះអាន សុខា មានជំងឺហើយទទួលមរណភាពចោលគាត់ ។
លោក គង់ សំបូរ បានឲ្យដឹងថា លោកបានព្យាយាមព្យាបាលជំងឺភរិយាគាត់រហូតដល់លក់ផ្ទះ និងលក់ដី និងទ្រព្យសម្បត្តិទាំងប៉ុន្មានដែលមានកន្លងមក ទីបំផុតភរិយាបានស្លាប់ចោលគាត់ មិនតែប៉ុណ្ណោះភ្លើងបានឆេះផ្ទះអស់រលីង បន្ទាប់មកខ្យល់កន្ត្រាក់ផ្តួលរំលំផ្ទះគាត់ បច្ចុប្បន្នគាត់មានកូនចំនួន៥នាក់នៅក្នុងបន្ទុក មានមុខរបរនេសាទត្រី ដើម្បីដោះស្រាយជីវភាពគ្រួសារ រស់នៅភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ ។
ក្នុងឱកាសនៃការចុះសួរសុខទុក្ខ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភជូនគាត់នូវអង្ករចំនួន ៥០ គីឡូក្រាម មីយើង២កេស ទឹកត្រីទឹកស៊ីអ៊ីវពីរយួរ មុងជ្រលក់ថ្នាំចំនួន៣ ថ្នាំពេទ្យមួយចំនួន និងថវិកាចំនួន១០០,០០០ រៀល ឯកឧត្តម សោម ស៊ុន បានកោតសរសើរ ចំពោះការតស៊ូជំនះនូវឧបស័គ្គទាំងឡាយទោះជាខ្លួនពិការ តែមិនពិការចិត្ត តស៊ូនេសាទត្រី យកប្រាក់ចិញ្ចឹមកូនទាំង៥នាក់ ដោយមិនយកភាពពិការនេះផ្តល់ជាភាររបស់សង្គម ។ដោយ ប៊ុន រដ្ឋា