ត្បូងឃ្មុំៈ ឃាតកម្មដ៏សាហាវព្រៃផ្សៃមួយ បណ្តាលឲ្យមនុស្សមួយគ្រួសារ ៤នាក់ បានស្លាប់បាត់បង់ជីវិត ឈាមស្រោចពេញលើផ្ទះ។ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោង១១ថ្ងៃត្រង់ ថ្ងៃអាទិត្យ ១រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១ ខែមេសា ឆ្នាំ២០១៨ ស្ថិតក្នុងភូមិដូង ឃុំថ្មពេជ្រ
ស្រុកត្បូងឃ្មុំ ខេត្តត្បូងឃ្មុំ។ទាក់ទិននឹងករណីនេះ សមត្ថកិច្ចបានធ្វើការសន្និដ្ឋានជាជំហានដំបូងថា ករណីឃាតកម្មសម្លាប់មនុស្សរហូតដល់ទៅ៤នាក់ ទាំងកូនក្នុងផ្ទៃអាយុជាង២ខែម្នាក់ផងនោះ គឺអាចជាប្តីក្រោយរបស់ស្ត្រីរងគ្រោះជាអ្នកប្រព្រឹត្ត។
វរសេនីយ៍ តូ ឆៃលាង មេបញ្ជាការមូលដ្ឋានកងរាជអាវុធហត្ថស្រុកត្បូងឃ្មុំ បានឲ្យដឹងថា សពជនរងគ្រោះត្រូវបានជនល្មើស កាប់សំដៅក ស្លាប់ទាំង៣នាក់នៅលើផ្ទះតែម្តង។
ជនរងគ្រោះទី១.ឈ្មោះ ឃាង សុកលាន អាយុ៤២ឆ្នាំ ជាម្តាយ (មានកូនក្នុងផ្ទៃអាយុជាង២ខែម្នាក់ទៀត) ទី២.ឈ្មោះ ធឿន វណ្ណៈ ភេទប្រុស អាយុ១៧ឆ្នាំ កូនដើម និងទី៣.ឈ្មោះ ធឿន ធារី ភេទប្រុស អាយុ១១ឆ្នាំ។
លោកមេបញ្ជាការ បានឲ្យដឹងទៀតថា តាមការពិនិត្យកន្លែងសម្លាប់ គឺជនដៃដល់ទំនងជាធ្វើសកម្មភាពនៅពេលជនរងគ្រោះទាំងនោះ កំពុងដេកលង់លក់ ដោយបានកាប់សំដៅកទាំងអស់ នៅចន្លោះម៉ោងប្រហែលពី ១ ទៅ ៣ យប់ ឈានចូលថ្ងៃទី១ ខែមេសា ឆ្នាំ២០១៨។ ក្រោយពីសម្លាប់ជនរងគ្រោះហើយ ជនសង្ស័យគឺបានប្រមូលយកទ្រព្យសម្បត្តិ សរុបជាទឹកប្រាក់ប្រហែលជិត១ម៉ឺនដុល្លារ រួចគេចខ្លួនបាត់។ ប៉ុន្តែសមត្ថកិច្ចទើបទទួលបានព័ត៌មានឃាតកម្មខាងលើនេះ នៅរសៀលថ្ងៃទី១ ខែមេសា ឆ្នាំ២០១៨ បន្ទាប់ពីស្ត្រីជាបងរបស់ស្ត្រីរងគ្រោះ បានទៅរាយការណ៍ប្រាប់សមត្ថកិច្ចនគរបាល។
តាមការស៊ើបអង្កេតជាបឋមរបស់មន្ត្រីនគរបាល និងមន្ត្រីកងរាជអាវុធហត្ថ បានសន្និដ្ឋានថា ជនសង្ស័យជាឃាតក គឺជាប្តីក្រោយរបស់ជនរងគ្រោះ ដែលមានឈ្មោះ ជ្រាំង ភូ អាយុ៤៨ឆ្នាំ ហើយក៏ជាឪពុកទារកនៅក្នុងផ្ទៃស្ត្រីជាម្តាយ មានស្រុកកំណើត នៅភូមិអកមូល ឃុំម្រាម ស្រុករមាសហែក ខេត្តស្វាយរៀង។
បច្ចុប្បន្ន សមត្ថកិច្ច នគរបាលខេត្តត្បូងឃ្មុំ ដឹកនាំបញ្ជារផ្ទាល់ដោយលោកឧត្តមសេនីយ៍ បែន រ័ត្ន បានតាមប្រមាញ់ជនសង្ស័យជិតបានហើយ៕
