កំពង់ធំ៖ លោក ប៉ឹល បាន ជាអតីតយុទ្ធជន បានទទួលផ្ទះថ្មីមួយខ្នង ដែលជាផ្ទះលើកទី៦៤ និងជាអំណោយ ដ៏ថ្លៃថ្លារបស់សម្តេតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា តាមរយះឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា ដែលបានសាងសង់ដោយ កម្លាំងសមាគមអតីតយុទ្ធជនខេត្តកំពង់ធំ នៅ រសៀលថ្ងៃទី៥ ខែមេសា ឆ្នាំ ២០១៨។
ពិធីប្រគល់ផ្ទះនេះ ត្រូវបានដឹកនាំដោយ ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនកម្ពុជាខេត្ត រួមទាំងលោក អ៊ុត វណ្ណារ៉ា អភិបាលស្រុកប្រាសាទសំបូរ និងសហការី ប្រគល់ជូនលោក ប៉ឹល បាន រួមទាំងក្រុមគ្រួសារ ស្ថិតនៅភូមិប្រាសាទ ឃុំឈូក ស្រុកប្រាសាទសំបូរ ខេត្តកំពង់ធំ ដែលមានទំហំ ៤ម៉ែត្រx៦មែ៉ត្រ សាងសង់ខ្ពស់ពីដី ដំបូលនិងជញ្ជាំងស័ង្កសី រនាបក្តារ ដែលត្រូវចំណាយថវិកាក្នុងការសាងសង់ អស់ទឹកប្រាក់ចំនួន៦,៣៧០,០០០ រៀល ។
អតីតយុទ្ធជនឈ្មោះ ប៉ឹល បាន អាយុ ៥៣ ឆ្នាំ ធ្លាប់បម្រើក្នុងជួរកងទ័ពនៅឆ្នាំ១៩៩០ ក្នុងអង្គភាពវរសេនាតូចលេខ៣០ នៃយោធាខេត្តកំពង់ធំ មានឋានៈជាមេបញ្ជាការកងអនុសេនាតូច បានត្រូវរបួសនៅក្នុងឆ្នាំ១៩៩៤ នៅសមរភូមិ តំបន់អូរសាលាច្រាំងក្រហម ក្រោយមកបានផ្លាស់ប្ដូរអង្គភាពទៅនៅវរសេនាតូចលេខ ៣៦ យោធាខេត្តកំពង់ធំ ឈរជើងនៅតំបន់ឃុំពពក ភូមិអន្លង់ក្រាញ់ ក្នុងស្រុកស្ទោង ខេត្តកំពង់ធំ រហូតដល់ឆ្នាំ១៩៩៦ មានភរិយាឈ្មោះ សាក់ គា អាយុ៤៣ឆ្នាំ មានកូនចំនួន ៩នាក់ ដែលមានឈ្មោះក្នុងបញ្ជីបោះឆ្នោតរួចរាល់ហើយ ។
នៅក្នុងពិធីប្រគល់ផ្ទះថ្មីនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភ គ្រឿងឧបភោគបរិភោគ មានអង្ករចំនួន៥០ គីឡូក្រាម មីយើងចំនួន២កេស ទឹកត្រីទឹកស៊ីអ៊ីវពីរយួរ ត្រីខកំប៉ុងមួយយួរ មុងជ្រលក់ថ្នាំចំនួន២ និងថវិកាចំនួន ៣៧០,០០០ សាមសិបប្រាំពីម៉ឹនរៀល ។
លោកប៉ឹល បាន និងក្រុមគ្រួសារ រួមទាំងប្រជាពលរដ្ឋ និងអាជ្ញាធរដែនដី បានអគុណសម្តេចតេជោហ៊ុន សែន ដែលជានិច្ចកាលតែងតែយកចិត្តទុកដាក់ដោះស្រាយការលំបាក ការខ្វះខាត ជូនអតីយុទ្ឋជននៅគ្រប់ទីកន្លែង និងសូមគោរពគាំទ្រសម្តេចតេជោ ហ៊ុន សែន ឲ្យដឹកនាំប្រទេសជារៀងរហូត ។
ដោយ ប៊ុន រដ្ឋា
