ខេត្តរតនគិរី÷ រថយន្តធុនត្រា មួយគ្រឿងខឹងម្ចាស់បោលលឿនធ្លាក់ផ្លូវផ្ងារជើងទ្រមេឃ ប៉ុន្តែមិនបណ្តាលឲ្យតៃកុងគ្រោះថ្នាក់ដល់អាយុជីវិតនោះទេ ហើយមិនបង្កដល់អ្នកដទៃរងគ្រោះថ្នាក់ឡើយ។
ហេតុការណ៍គ្រោះថ្នាក់ចរាចរណ៍បង្កឡើងដោយខ្លួនឯងនេះ កើតឡើងនៅវេលាម៉ោង៧នឹង១០នាទីព្រឹកថ្ងៃអាទិត្យ ៨កើត ខែពិសាខ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី២២ ខែមេសា ឆ្នាំ២០១៨ នៅចំណុចកាំពោធវាង ស្ថិតក្នុងភូមិសាយ៉ស់ ឃុំកាឡែង ស្រុកលំផាត់ ខេត្តរតនគិរី។
មន្ត្រីនគរបាលឃុំកាឡែង បានឲ្យដឹងថា អ្នកបើកបរឈ្មោះ លី គីងហួរ ភេទប្រុស អាយុ៤៨ឆ្នាំជនជាតិចិន រងរបួសស្រាល មុខរបរ បុគ្គលិកក្រុមហ៊ុនជីសុងរី បើករថយន្តម៉ាកធុនត្រា ពណ៌ទឹកមាស ពាក់ស្លាកលេខ ភ្នំពេញ ២AP-៣៩១៣ ស្នាក់នៅក្នុងក្រុមហ៊ុនជីសុងរី ស្ថិតនៅភូមិប៉ាតត់ ឃុំសេដា ស្រុកលំផាត់ ខេត្តរតនគិរី បើកបរក្នុងទិសដៅពីកើតមកលិច។
មន្ត្រីនគរបាលបន្តថា នៅក្នុងរថយន្តនោះ មានតែតៃកុងម្នាក់ប៉ុណ្ណោះ មិនមានអ្នករួមដំណើរនៅក្នុងរថយន្តនោះទេ។ក្រោយកើតហេតុនគរបាលមូលដ្ឋានបានចុះមកត្រួតពិនិត្យឃើញថា មិនមានគ្រោះថ្នាក់ដល់អាយុជីវិតឡើយ។ ហើយម្ចាស់បានជួលរថយន្តស្ទួចមកស្ទួចយកទៅជួសជុលខ្លួនឯង៕ ដោយ: យក្ខឡោម
