កំពង់ធំៈ ឯកឧត្តម ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ បានបន្ត ដឹកនាំគណៈកម្មាធិការសមាគមអតីតយុទ្ធជនស្រុកបារាយណ៍ ព្រមទាំងអាជ្ញាធរដែនដី បានទៅសំណេះសំណាលសាកសួរសុខទុក្ខ អតីតយុទ្ធជនចំនួន ៣គ្រួសារនៅទីតាំងផ្សេងៗគ្នា ដើម្បីទទួលយកនូវការសំណូមពរ ក៏ដូចជាបញ្ហានានាដែលអតីតយុទ្ធជន មានបំណងចង់បាន ។
ជាក់ស្តែង គ្រួសារអតីតយុទ្ឋជន២គ្រួសារ ត្រូវបានសមាគមអតីតយុទ្ធជនកម្ពុជាខេត្តកំពង់ធំ ចុះជួបសំណេះសំណាលទី១ គឺពលបាលឯក ម៉ៅ រ៉ាន់ឌី អាយុ ៤៩ឆ្នាំ ជាជនពិការភ្នែកម្ខាងដោយអំបែងគ្រាប់ក្នុងសមរភូមិស្រុកស្ទោង ខេត្តកំពង់ធំ នៅឆ្នាំ១៩៩៣ ជាអតីតជានគរបាលអា៣ ខេត្តកំពង់ធំ មានកូន៤នាក់ក្នុងបន្ទុក បច្ចុប្បន្នគាត់ជាកម្មករសំណង់ ចំណែកទី២ ជាគ្រួសារយោធិនពលី ឈ្មោះ ម៉ៅ ម៉ុន អតីតយុទ្ឋជនអង្គភាពយោធាស្រុកបារាយណ៍ ខេត្តកំពង់ធំ បច្ចុប្បន្នរស់នៅភូមិថ្មីឃុំទ្រៀល ស្រុកបារាយណ៍ ខេត្តកំពង់ធំ ។
ក្នុងឳកាសនៃការចុះសួរសុខទុក្ខនេះ ក្រុមការងារសមាគមអតីតយុទ្ធជនកម្ពុជាខេត្តកំពង់ធំបានឧបត្ថម្ភជូន ក្នុងមួយគ្រួសារទទួលបានអង្ករចំនួន៥០ គីឡូក្រាម មីយើងចំនួន ២កេស ទឹកត្រីទឹកស៊ីអ៊ីវចំនួន២យួរ និងថវិកា១០០,០០០ រៀល ដោយឡែកមួយគ្រួសារទៀត គឺលោកអនុសេនីយ៍ទោ នួន សេងនី អាយុ ៦០ ឆ្នាំ អតីតធ្លាប់ចូលបម្រើក្នុងជួរកងទ័ពនៅឆ្នាំ ១៩៨៧ នៅអង្គភាពវរសេនាតូចលេខ៥ នៃកងពលវិស្វកម្មលេខ៧៩ និងបានផ្ទេរទៅមន្ទីរសង្គមកិច្ចខេត្ត ជាអតីតយុទ្ធជន នៅឆ្នាំ២០០៥ បច្ចុប្បន្នរស់នៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ ។
លោក នួន សេងនី មានភរិយាឈ្មោះ សៀន សាម៉ើ អាយុ ៦៣ ឆ្នាំ មានកូន ០៤ នាក់ មានគ្រួសារអស់ហើយ ថែមទាំងមានសុខភាពមិនសូវល្អ មិនអាចប្រកបមុខរបរអ្វីបាន ពឹងផ្អែកលើប្រាក់បៀវត្សប្រចាំខែរបស់រាជរដ្ឋាភិបាលផ្តល់ជូនក្នុងមួយខែ ៥៨០,០០០ រៀល ក្រុមការងារសមាគមអតីតយុទ្ធជនកម្ពុជាខេត្ត បានឧបត្ថម្ភជូនគាត់នូវ អង្ករ ចំនួន ៥០ គ.ក្រ ,មីយើង ចំនួន ០២ កេស ,ទឹកត្រីទឹកស៊ីអ៉ីវ ចំនួន ០២ យួរ និងថវិកា ១០០,០០០ រៀល ។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា អតីតយុទ្ធជនគ្រប់រូប បានលះបង់សាច់ស្រស់ឈាមស្រស់ ដើម្បីបុព្វហេតុការពារជាតិមាតុភូមិ ដើម្បីទប់ស្កាត់ការវិលត្រឡប់មកវិញនូវរបបខ្មែរក្រហម ក្រោមការដឹកនាំរបស់សម្ដេចតេជោហ៊ុន សែន ដែលបានស្រង់កម្ពុជាឲ្យរួចផុតពីភ្លើងសង្គ្រាម ហើយឲ្យកម្ពុជាមានសន្តិភាពពេញលេញ និងការអភិវឌ្ឍន៍ដូចសព្វថ្ងៃនេះដែរ ។ ដោយ ប៊ុន រដ្ឋា
