ខេត្តរតនគិរី÷ ភ្លៀងមួយមេធំ លាយឡំនឹងខ្យល់កន្រ្តាក់ បានបោកបក់ វាយបំផ្លាញផ្ទះរបស់ប្រជាពលរដ្ឋចំនួន៤ខ្នង នៅចំណុចភូមិ២វិឡាកាត់ សង្កាត់កាចាញ ក្រុងបានលុង ខេត្តរតនគិរី កាលពីវេលាម៉ោង៦នឹង១៥នាទីល្ងាចថ្ងៃពុធ ១១កើត ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថៃ្ងទី២៥ ខែមេសា ឆ្នាំ២០១៨។
លោក សួន សាវុធ មេប៉ុស្តិ៍សង្កាត់កាចាញបានឲ្យដឹងថា ផ្ទះទាំង៤ខ្នង ដែលខ្យល់កន្ត្រាក់ឲ្យដួលរលំនោះ ទី១ ឈ្មោះ ឈួន ដា ភេទប្រុស អាយុ៤៥ឆ្នាំជនជាតិខ្មែរ មុខរបរធ្វើចម្ការ សង់អំពីឈើប្រក់ស័ង្កសី ជញ្ជាំងក្តាមួយចំហៀង នឹងជញ្ជាំងផ្ទំា១ចំហៀង មានទំហំ ៦×៤ម៉ែត្រ។ ទី២ ឈ្មោះ ម៉ុន ថា ភេទស្រី អាយុ៤១ឆ្នាំ ជនជាតិខ្មែរ មុខរបរធ្វើចម្ការ ផ្ទះធ្លាក់ពីលើជើងតាង។ ទី៣ ឈ្មោះ ឯល ចក់ ភេទប្រុស អាយុ៤៣ឆ្នាំ ជនជាតិខ្មែរ មុខរបរធ្វើចម្ការ ផ្ទះទំហំ ៤×៦ម៉ែត្រ ធ្វើអំពីឈើប្រក់ស័ង្កសី ជញ្ជាំងផ្ទាំ ដួលរលំដល់ដី។ ទី៤ ឈ្មោះ ឈុំ នេត ភេទប្រុស អាយុ២៣ឆ្នាំ ជនជាតិខ្មែរ មុខរបរធ្វើចម្ការ ផ្ទះទំហំ ៤×៥ម៉ែត្រ ជញ្ជាំងផ្ទាំ ប្រក់ស័ង្កសី ធ្វើអំពីឈើដួលដល់ដី ។នៅហេតុការណ៍គ្រោះធម្មជាតិខាងលើនេះ មិនមានប្រជាពលរដ្ឋណាម្នាក់រងរបួសនឹងគ្រោះថ្នាក់ដល់អាយុជីវិតឡើយ៕ យក្ខឡោម