ខេត្តរតនគិរី៖ អាជីវករ ១រូប ដែលបានធ្វើអាជីវកម្មនៅផ្សារបានលុង អស់រយៈពេល ៦ឆ្នាំមកហើយ បានរៀបរាប់ប្រាប់សារព័ត៌មាន ដោយសុំមិនបញ្ចេញឈ្មោះឲ្យដឹងថា បញ្ហាសម្រាមនៅផ្សារបានលុងនេះ មិនមែនជារឿងទើបកើតឡើងថ្មីៗនោះទេ គឺកើតមានបញ្ហាតាំងពីឆ្នាំ២០១៤ មកម្ល៉េះ ដោយសារភាគីខាងក្រុមហ៊ុនប្រមូល
សម្រាម មានទំនាស់ផ្ទៃក្នុងជាមួយភាគីខាងម្ចាស់ផ្សារ ទើបរៀងរាល់បុណ្យជាតិសំខាន់ម្តងៗ បណ្តែតបណ្តោយឲ្យមានគំនរសម្រាមយ៉ាងច្រើន ។អាជីវកររូបនេះបន្តថា ដូច្នេះក្នុងនាមលោកជាអាជីវករលក់ដូរនៅក្នុងផ្សារបានលុងនេះ ដែលបានបង់ថ្លៃភាស៊ីជូនផ្សារជាប្រចាំ សូមសំណូមពរដល់អាជ្ញាធរខេត្ត ក្រុង និងស្ថាប័នពាក់ព័ន្ធ សូមមេត្តាមានវិធានការផ្លូវច្បាប់ ឬក៏ដំណោះស្រាយណាមួយ ដើម្បីជួយពន្លឿនដល់ក្រុមហ៊ុនពាក់ព័ន្ធ ឲ្យជួយមកយកសម្រាមដែលស្អុយរលួយទាំងនេះចេញពីទីតាំងមុខផ្សារឲ្យបានឆាប់រហ័សផង ព្រោះអីសព្វថ្ងៃនេះ ពួកគាត់ស្ទើរតែទ្រាំទ្រពុំបាននូវក្លិនដ៏ស្អុយគគ្រុកពីគំនរសម្រាម ជាពិសេសនៅពេលមេឃធ្លាក់ភ្លៀងម្តងៗ ក្លិនស្អុយចេញពីសម្រាមទាំងនេះ វាបានជះឥទ្ធិពល និងសោភ័ណ្ឌភាពមិនល្អដល់សង្គម ក៏ដូចជាប៉ះពាល់ដល់ភ្ញៀវជាតិ និងអន្តរជាតិ ជាពិសេសទៀតនោះ គឺប៉ះពាល់ដល់សុខភាពរបស់បងប្អូនអាជីវករដែលប្រកបរបរលក់ដូរ ជាប្រចាំនៅទីនេះ ។
ទាក់ទិនទៅនឹងបញ្ហាសម្រាមនេះដែរ លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី បានផ្តល់បទសម្ភាសន៍តាមទូរស័ព្ទនារសៀលថ្ងៃទី២៦ ខែមេសានេះ ថា បញ្ហាសម្រាមនេះ ពិតជាប៉ះពាល់យ៉ាងធ្ងន់ធ្ងរដល់បរិស្ថាន សោភ័ណ្ឌភាពនិងសុខមាលភាពរបស់ប្រជាពលរដ្ឋ ដូច្នេះទើបកាលពីថ្ងៃទី១៨ ខែមេសាថ្មីៗនេះ បន្ទាប់ពីបញ្ចប់ពិធីបុណ្យចូលឆ្នាំប្រពៃណីខ្មែរ មន្ទីរបរិស្ថានខេត្ត បានសហការជាមួយអាជ្ញាធរក្រុងបានលុង ដឹកសម្រាមចេញពីផ្សារបានលុង ១លើករួចមកហើយ ដែលមានសម្រាម ដឹកចេញ ១៧ ឡាន ។
ចំណែកលោក ញ៉ែម សំអឿន អភិបាលរងខេត្តបានមានប្រសាសន៍ឲ្យដឹងដែរថា អាជ្ញាធរខេត្តរតនគិរី នឹងអញ្ជើញភាគីពាក់ព័ន្ធ ប្រជុំដោះស្រាយបញ្ហាសម្រាម រវាងក្រុមហ៊ុនដឹកសម្រាម លោកជា គួង និងក្រុមហ៊ុន ហេង តារា ម្ចាស់អាជីវកម្មផ្សារបានលុង ដែលមានទំនាស់និងគ្នាជាយូមកហើយនោះ ឲ្យបានឆាប់ក្នុងពេលខាងមុខនេះ ៕ យក្ខឡោម
