ខេត្តតាកែវ៖ ដោយអនុវត្តតាមការណែនាំ និងបញ្ជាផ្ទាល់ពី សំណាក់ ឯកឧត្តម ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ និងជាប្រធានគណៈកម្មាធិការមូលដ្ឋានសមាគមមិត្តនគរបាលជាតិ នៃស្នងការដ្ឋាននគរបាលខេត្តតាកែវ។
នៅរសៀលថ្ងៃអាទិត្យ ១៤រោច ខែពិសាខ ឆ្នាំច សំរិទ្ធស័ក ព.ស ២៥៦២ ត្រូវនិងថ្ងៃទី១៣ ខែឧសភា ឆ្នាំ២០១៨ លោក ឧត្តមសេនីយ៍ត្រី ពៅ លន់ ស្នងការរងទទួលផែនគ្រប់គ្រងធនធានមនុស្ស តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ទោ ស្នងការ រួមដំណើដោយលោក ឧត្តមសេនីយ៍ត្រី អេង សុខលី ស្នងការរងទទួលផែនអត្តសញ្ញាណកម្ម បានដឹកនាំក្រុមការងារ នៃស្នងការដ្ឋាននគរបាលខេត្ត និងលោកអធិការរង ក្រុងដូនកែវ បាននាំយកថវិកាសមាគមមិត្តនគរបាលជាតិចំនួន ៦លានរៀល ប្រគល់ជូនដល់ លោកស្រី ឃុត ច្រិប ត្រូវជាភរិយានៃសព លោកអនុសេនីយ៍ទោ យស សាវ៉ន នាយរងផ្នែកការិយាល័យស្ថិតិប្រជាពលរដ្ឋ នៃស្នងការដ្ឋាននគរបាលខេត្តតាកែវ ដែលបានទទួលមរណៈភាពដោយជម្ងឺថ្លើម កាលពីថ្ងៃទី០៩ ខែឧសភា ឆ្នាំ២០១៨ ស្ថិតនៅភូមិព្រេច សង្កាត់រការក្នុង ក្រុងដូនកែវ ខេត្តតាកែវ ។
ថ្លែងក្នុងឱកាសនោះដែរ លោកឧត្តមសេនីយ៍ត្រី ស្នងការរង បានសំណេះសំណាលជាមួយក្រុមគ្រួសារសព ហើយបានពាំនាំនូវការផ្តាំផ្ញើសាកសួរសុខទុក្ខ និងចូលរួមរំលែកទុក្ខ ពីសំណាក់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានកិត្តិយសសមាគមមិត្តនគរបាលជាតិកម្ពុជា និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មាធិការកណ្តាល សមាគមមិត្តនគរបាលជាតិកម្ពុជា និងឯកឧត្តម ស្នងការនគរបាលខេត្តតាកែវ ជាប្រធានគណៈកម្មាធិការមូលដ្ឋានសមាគមមិត្តនគរបាលជាតិ នៃស្នងការដ្ឋាននគរបាលខេត្តផងដែរ៕
