កំពង់ធំៈឧត្តមសេនីយ៍ សោម ស៊ុន ចុះសួរសុខទុក្ខ គ្រួសាររបស់អតីតយុទ្ធជន ដែលកំពុងតែជួបនូវវិបិត្ត យ៉ាងធ្ងន់ធ្ងរ ខណៈស្រ្តីមេម៉ាយនិងកូន៦នាក់ អង្គុយយំសោកបោកខ្លួន ដោយសារតែខំសន្សំលុយជាច្រើនឆ្នាំ ស៊ីអត់ ស៊ីឃ្លាន សាងសង់ផ្ទះមួយខ្នង ក្រោយពីស្វាមីដែលជាអតីតយុទ្ឋជនពលី បានមរណះភាពចោលទៅ តែត្រូវបានរលាយក្នុងមួយប៉ព្រិចភ្នែក ដោយសារការឆ្លងចរន្តអគ្គិសនី ពីបន្ទះសូឡា ដែលបានដាក់ជាប់លើដំបូងផ្ទះ បានធ្វើឲ្យគ្រួសារនេះបាត់បង់ទ្រព្យសម្បត្តិទាំងអស់ បន្សល់នៅត្រឹមតែខោអាវមួយចង្កេះ។
លោកស្រី ហែម សាវុធ អាយុ៤២ ឆ្នាំ ជាភរិយាអតីតយុទ្ឋជនពលី លោកជៀប ហុកគៀន កន្លងមកធ្លាប់បំរើ ជាប្រធានកងអនុសេនាធំលេខ២វរសេនាតូចលេខ៥៥ ក្រោយមកជាអនុប្រធានយោវរសេនាតូចលេខ៦ នៃយោធាខេត្តកំពង់ធំ ក្នុងសម័យរដ្ឋកម្ពុជា ក្រោយពីលោក បានមរណះភាពនៅឆ្នាំ២០០១ទៅ បានបន្សល់ទុកភរិយា និងកូន៦ នាក់នៅក្នុងបន្ទុកជាស្ត្រីមេម៉ាយ និងបានប្រកបរបរធ្វើស្រែផង ធ្វើជាកម្មករផងសន្សំប្រាក់បានសាងសង់ផ្ទះមួយខ្នង ដែលមានទំហំ ផ្ទះទំហំ៨ម៉ែត្រx ១២ម៉ែត្រ សម្រាប់នាំកូនរស់នៅ ភូមិកំពង់គោលើ ឃុំកំពង់គោ ស្រុកកំពង់ស្វាយ ខេត្តកំពង់ធំ ។
តែជាអកុសល គ្រួសារអភ័ពរូបនេះ បានជួបនឹងអគ្គិភ័យឆាបឆេះលេបត្របាក់ គេហដ្ឋានរបស់ពួកគេឲ្យឆេះខ្ទេចខ្ទីគ្មានសល់ នៅវេលាម៉ោង១១និង៤៥នាទី(ថ្ងៃត្រង់) ថ្ងៃទី១៩ខែឧសភា ឆ្នាំ២០១៨ និងបាត់បង់ មាសចំនួន២ដំឡឹង ប្រាក់ចំនួន២លានរៀល និងសម្ភារៈ ខោអាវ និងរបស់របរទាំងអស់ បានក្លាយជាចំណីព្រះអគ្គីដោយសល់តែសម្លៀកបំពាក់មួយចង្កេះម្នាក់ប៉ុណ្ណោះ ពិសេសមេដាយការពារជាតិថ្នាក់សម្រិតសម្រាប់អតីតយុទ្ឋជនដែលមានគុណបំណាច់ចំពោះជាតិក៍ត្រូវខូចខាតបាត់បង់ផងដែរ ។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគម អតីតយុទ្ធជនកម្ពុជាខេត្តកំពង់ធំ បានចុះសួរសុខទុក្ខ គ្រួសារអតីតយុទ្ធជនពលី ដែលកំពុងតែរងគ្រោះ ដោយសារតែអគ្គីភ័យបានលេបត្របាក់ផ្ទះគ្មានសល់ នៅល្ងាចថ្ងៃទី២១ខែឧសភាឆ្នាំ២០១៨និងបានផ្តល់កំលាំងចិត្ត ឲ្យប្រឹងប្រែងតស៊ូបន្ថែមទៀត កុំបីអស់សង្ឃឹមដ៏រាបណាមានជីវិតរស់នៅ ទ្រព្យសម្បត្តិអាចរកមកវិញបាន ហើយក៏មិននៅឯកកោរនោះឡើយ មានសមាគមអតីតយុទ្ធជនយើងនៅមើលថែរ និងជិតស្និទបំផុត ក្រោមការដឹកនាំដោយសម្តេចតេជោ ហ៊ុន សែន ជាប្រធានសមាគមអតីតយុទ្ធជន និងបានឧបត្ថម្ភជូននូវ អង្ករចំនួន៥០ គីឡូក្រាម មីយើងចំនួន២កេស ទឹកត្រីទឹកស៊ីអ៊ីវចំនួន២យួរ មុងជ្រលក់ថ្នាំចំនួន២ និងថវិកាចំនួន១៥០,០០០ រៀល ។
ដោយ ប៊ុន រដ្ឋា
