បន្ទាយមានជ័យៈ ជនដៃដល់ក្នុងអំពើឃាតកម្មសម្លាប់រួចទម្លាក់ទឹកស្រះកាលពីថ្ងៃទី២៤ខែឧសភាឆ្នាំ២០១៨កន្លងទៅ ត្រូវកម្លាំងនគរបាលឃាត់ខ្លួនបានហើយនៅព្រឹកថ្ងៃទី២៧ខែឧសភាឆ្នាំ២០១៨នេះនៅចំនុចលាក់ខ្លួនក្នុងភូមិជំទាវឃុំឬស្សីក្រោកស្រុកមង្គលបូរីខេត្តបន្ទាយមានជ័យ។
ឃាតករដែលសមត្ថកិច្ចឃាត់ខ្លួនបានមានឈ្មោះ អ៉ីវ ប៊ុនម៉ៅ ភេទប្រុស អាយុ ៣២ឆ្នាំ រស់នៅក្នុងភូមិចាប់ខ្លួនខាងលើ។
លោកឧត្តមសេនីយ៍ត្រី សិទ្ធិឡោះ ស្នងការរងនៃស្នងការដ្ឋាននគរបាលខេត្តបន្ទាយមានជ័យទទួលបន្ទុកកណ្តាលព្រហ្មទណ្ឌ បានអោយដឹងថា ក្រោយធ្វើសកម្មភាពសម្លាប់លើជនងគ្រោះទម្លាក់ទឹករួចមក ជនដៃដល់ក៏បានគេចខ្លួនចេញពីផ្ទះរត់ទៅសំងំលាក់ខ្លួននៅក្នុងព្រៃក្រោយភូមិ។ ដោយសេចក្តីស្រេកឃ្លានជនសង្ស័យបានលបមកផ្ទះដើម្បីរកបាយហូបរួចវិលចូលទៅពួនសំងំវិញ។
លោកបន្តថាបន្ទាប់ពីអ្នកឃើញហើយរាយការណ៍កម្លាំងនគបាលជំនាញក៏បានចុះទៅដល់ចំនុចលាក់ខ្លួនរួចឡោមពទ្ធ័ទើបចាប់ខ្លួនជនសង្ស័យបាន។
នៅចំពោះមុខកម្លាំងជំនាញនគរបាលជនសង្ស័យបានសារភាពថាខ្លួនពិតជាបានសម្លាប់ជនរងគ្រោះឈ្មោះ សុខ កង ភេទប្រុសអាយុ៥៦ឆ្នាំ ទម្លាក់ចូលទឹកមែន។ ជនសង្ស័យបន្តថាជនរងគ្រោះនិងខ្លួនគេគឺជាអ្នកជិតខាងគ្នាអត់ដែលមានទំនាស់អ្វីសោះពីមុនមក តែអ្វីដែលខ្លួនជ្រុលដៃសំលាប់នោះគឺ ពេលដែលចេញពីផឹកស៊ី សង្កត់រោងការជនរងគ្រោះនិងខ្លួនគេបានដើរចេញមកជាមួយគ្នា។ លុះមកដល់ចំនុចកើតហេតុជនរងគ្រោះចង់ត្រឡប់មកផឹកវិញតែខ្លួនគេព្យាយាមរារាំងមិនអោយមកផឹកវិញទេដោយនិយាយថាពូស្រវឹងហើយទៅផ្ទះដេកទៅ។ បន្ទាប់មកជនរងគ្រោះមិនព្រមហើយឈានដល់ឈ្លោះគ្នា ជនរងគ្រោះក៏វៃលើខ្លួនគេមួយដៃ ដោយអំណាចនៃការឈឺខ្លួនវៃបកវិញដោយឃើញដំបងឈើនៅក្បែរក៏ទាញមកវៃលើជនរងគ្រោះរហូតដល់សន្លប់រួចក៏អូសទៅទំលាក់ទឹកតែម្តង។
សូមបញ្ជាក់ថាបច្ចុប្បន្នជនង្ស័យកំពុងស្ថិតក្រោមការួរនាំបន្តនៅក្នុងស្នងការដ្ឋានខេត្តដើម្បីកសាងសំណុំរឿងចាត់ការបន្ត៕ដោយ៖ឃិន គន្ធា