កំពង់ចាម: ការដេញថ្លៃគម្រោងមូលនិធិឃុំ-សង្កាត់នាពេលកន្លងមកមានរឿងស្មុគស្មាញជាច្រើន ក្នុងនាមខ្ញុំជាគណៈបញ្ជាការឯកភាពខេត្ត ខ្ញុំនឹងមិនបណ្តែតបណ្តោយឲ្យមានភាព
អនាធិបតេយ្យបន្តទៅទៀតទេ ចាប់ពីពេលនេះតទៅសូមឲ្យការដេញថ្លៃ បានប្រព្រឹត្តទៅដោយមានការប្រកួតប្រជែង ដោយសេរីនិងយុត្តិធម៌ គឺសុំកុំឲ្យមានរឿងបន្តទៀត នេះជាការថ្លែងរបស់ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម ក្នុងពិធីសព្វផ្សាយដល់អ្នកទទួលការ ស្តីពីនិតិវិធី និងគោលការណ៍សំខាន់ៗ អំពីការអនុវត្តន៍គម្រោងមូលនិធិឃុំ-សង្កាត់ ឆ្នាំ២០១៨។
ដែលពិធីនេះបានប្រព្រឹត្តឡើង នាព្រឹកថ្ងៃព្រហស្បតិ៍ ០២កើត ខែបឋមសាឍ ឆ្នាំច សំរិទ្ឋិស័ក ព.ស២៥៦២ ត្រូវនឹងថ្ងៃទី១៤ ខែកក្កដា ឆ្នាំ២០១៨ នៅសាលប្រជុំសាលាខេត្តកំពង់ចាម ក្រោមអធិបតីភាពឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម ដោយមានការអញ្ជើញចូលរួមពីមន្ត្រីជំនាញពាក់ព័ន្ធ និងអ្នកទទួលការ តំណាងក្រុមហ៊ុនជាច្រើនផងដែរ។
ឯកឧត្ដម អភិបាលខេត្ត បានថ្លែងថា កន្លងមកការដេញថ្លៃគម្រោងមូលនិធិឃុំ-សង្កាត់ សម្រាប់ការជួសជុល សាងសង់ផ្លូវក្រាលគ្រួសក្រហម ក៏ដូចជាការសាងសង់ផ្លូវបេតុងអារមេ ឬការស្តាប្រឡាយ និងការកសាងហេដ្ឋារចនាសម្ព័ន្ធផ្សេងៗជាច្រើនទៀត តែងតែមានរឿងបង្កការស្មុគស្មាញជាច្រើន ដែលជាការស៊ីសំណូកសូកប៉ាន់ ចែកលុយទឹកតែយ៉ាងអនាធិបតេយ្យ ដូច្នេះចាប់ពីពេលនេះតទៅសូមឲ្យបងប្អូនអ្នកទទួលការទាំងអស់ កុំបន្តទៀត គឺសុំឲ្យចូលរួមធ្វើការដេញថ្លៃ មានការប្រកួតប្រជែង ដោយសេរីនិងយុត្តិធម៌ និងមានតម្លាភាពផងដែរ។
ឯកឧត្ដម បានសង្កត់ធ្ងន់ថា ចាប់ពីពេលនេះតទៅ នឹងធ្វើការត្រួតពិនិត្យតាមប្រតិទិន ដើម្បីមានចំណាត់ការ លើភាពមិនប្រក្រតីណាមួយ ចំពោះការដេញថ្លៃ ដែលនៅតែបន្តការស្មុគស្មាញទៀតនោះ ឯកឧត្តម នឹងស្នើសុំឲ្យបញ្ឈប់ការចុះជួយរបស់មន្ត្រីទីចាត់ការផែនការនិងវិនិយោគខេត្ត គឺត្រូវប្រគល់ឲ្យអាជ្ញាធរស្រុក ជាអ្នកអនុវត្តន៍ដោយខ្លួនឯង នូវរាល់គម្រោងមូលនិធិផ្សេងៗ ក្នុងមូលដ្ឋានរបស់ខ្លួនផ្ទាល់ ហើយការដេញថ្លៃកុំឲ្យមានការចែកលុយទឹកតែទៀត បើសិនជារកឃើញទៀតនោះ នឹងត្រូវលប់គម្រោងនោះចោល ហើយដាក់ឲ្យដំណើរការដេញថ្លៃជាថ្មីម្ដងទៀតពុំខាន ដូច្នេះសូមឲ្យអ្នកទទួលការទាំងអស់ ខិតខំអនុវត្តន៍គម្រោងឲ្យបានជោគជ័យគ្រប់ៗគ្នាផងដែរ ៕
