កំពង់ធំ៖ ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ អញ្ជើញពិនិត្យកងកម្លាំងអន្តរាគមន៍វរសេនាតូចលេខ១ ដើម្បីត្រៀមការពារសន្តិសុខសុវត្តិភាពជូនគ្រប់គណបក្សនយោបាយក្នុងយុទ្ធនាការឃោសនាបោះឆ្នោត និងត្រៀមចាត់វិធានការចំពោះបណ្ហាមិនប្រកតី ជនអគតិណា បង្ករចលាចលអន្តិសុខ ដល់យុទ្ធនាការឃោសនាបោះឆ្នោត និងពេលបោះឆ្នោត ជ្រើសរើសតំណាងរាស្រ្តនិតិកាលទី៦ ។
កងកម្លាំងគ្រប់បណ្តាអង្គភាព វរសេនាតូចទាំង២ និងផ្នែកសឹករង ស្រុកក្រុងទាំង៨ ចំណុះឲ្យតំបន់ប្រតិបត្តិការ សឹករងកំពង់ធំ គឺសុទ្ធតែបានប្តេជាចិត្តទាំងស្រុង ក្នុងនាមជាកងយោធពលខេមរភូមិន្ទ ត្រូវស្មោះត្រង់ ជាមួយអង្គភាព ជាមួយថ្នាក់ដឹកនាំ គោរពនូវសីលធម៌ វិន័យរបស់កងកម្លាំង ដើម្បីការពារបុព្វហេតុជាតិមាតុ ភូមិ និងរក្សាសន្តិភាពឲ្យបាន ដោយមិនបណ្តោយឲ្យជនណា បំផ្លិចបំផ្លាញសន្តិភាពនេះបានឡើយ ដោយពិធីនេះត្រូវបានធ្វើនៅរសៀលថ្ងៃទី០៦ ខែកក្កដា ឆ្នាំ២០១៨ នៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឯកឧត្តម ឧត្តមសេនីយ៍ទោ សោម ស៊ុនមេបញ្ជាការ តំបន់ប្រតិបត្តិការសឹករងកំពង់ធំ បានមានប្រសាសន៍ ថា យើងបានត្រៀមខ្លួនជាស្រេចរួចហើយ ក្នុងកិច្ចសហការ ការពារអធិបតេយ្យភាព និងគាំទ្រឲ្យមានសន្តិភាព ជារៀងរហូត និងរក្សាសន្តិភាព សន្តិសុខ និងផ្តល់សុវត្តិភាពជូនដល់ប្រជាជាតិខ្មែរ ឲ្យប្រជាជាតិខ្មែរទាំងមូល រស់នៅដោយសុខក្សេមក្សាន្ត ហើយយោធិនទាំងអស់ រួមទាំងប្រជាជនទាំងអស់ ស្អប់ខ្ពើមណាស់សង្រ្គាម និងត្រូវឆ្លើយថាទេចំពោះសង្រ្គាមនៅកម្ពុជា យើងទាំងអស់គ្នាប្តេជាការពារ មិនអោយរបបប្រល័យពូជសាសន៍ ដែលជាស្រមោលអតីតកាលត្រឡប់មកវិញជាដាច់ខាត។
ឧត្តមសេនីយ៍ទោ សោម ស៊ុន បានសង្កត់ធ្ងន់ថា ក្នុងនាមជាកងកម្លាំងកងយោធពលខេមរភូមិន្ទ ត្រូវគោរពនិងអនុវត្តក្រមសីលធម៌ និងបទវិន័យ សេចក្តីថ្លៃថ្លូរ កងកម្លាំងទាំងអស់ ត្រូវបំពេញកាតព្វកិច្ចជាមួយពលរដ្ឋ និងនាំក្រុមគ្រួសារឲ្យទៅបោះឆ្មោតជ្រើសតាំងតំណាងរាស្ត្រ នីតិកាលទី៦ ដែលនឹងព្រឹត្តទៅនៅថ្ងៃទី ២៩ ខែកក្កដា ឆ្នាំ២០១៨ ខាងមុខនេះ ។
ដោយ ប៊ុន រដ្ឋា