បន្ទាយមាជ័យ ៖ នាព្រឹកថ្ងៃអង្គារ៍ ១៣រោច ខែបឋមសាឍឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១០ ខែកក្កដា ឆ្នាំ២០១៨ ឯកឧត្តម អ៊ុំ រាត្រី អភិបាលរងខេត្តបន្ទាយមានជ័យ រួមនឹងលោក ហ៊ឹល រ៉ាយ៉ា អភិបាលក្រុងសិរីសោភ័ណបានបន្តដឹកនាំ គឿងចក្រចុះស្ថាបនាផ្លូវ លេខ១កន្លះជាបន្តទៀត ដែលមានប្រវែង ៨០០ម៉ែត្រ ក្រាលថ្មមិច ស្ថិតនៅសង្កាត់កំពង់ស្វាយ ក្រុងសិរីសោភ័ណ ។
ក្នុងគម្រោងស្តារ ស្ថាបនាផ្លូវ ធ្វើឲ្យប្រសើរឡើងនេះ បានអនុវត្តនៅក្នុងសង្កាត់ទាំង ៧ នៅក្រុងសិរីសោភ័ណ មានចំនួន១៦៨ខ្សែរ ដែលត្រូវបានស្ថាបនា មានប្រវែងសរុបជាង៨០គីឡូម៉ែត្រ ។ ក្នុងនោះសង្កាត់ទាំង៧រួមមាន៖ សង្កាត់ កំពង់ស្វាយ មានប្រវែង ២៧៣៤៥ម៉ែត្រ / សង្កាត់អូរអំបិល ១១១៣៩ ម៉ែត្រ /សង្កាត់ទឹកថ្លា ២៤៣០ ម៉ែត្រ / សង្កាត់ភ្នៀត ១៧៧២៣ ម៉ែត្រ / សង្កាត់ព្រះពន្លា ១៧៤៣៦ ម៉ែត្រ /សង្កាត់កោះពង់សត្វ ៥៣៨៣ ម៉ែត្រ / សង្កាត់ម្កាក់ ២៦៤០ ម៉ែត្រ។
មានប្រសាសន៍សំនេះសំណាលជាមួយប្រជាពលរដ្ឋ ឯកឧត្តម អ៊ុំ រាត្រី អភិបាលរងខេត្តបន្ទាយមានជ័យ បានសំណូមពរឲ្យប្រជាពលរដ្ឋ ដែលរស់នៅក្បែរផ្លូវ ត្រូវចូលរួមសហការទាំងអស់គ្នា ជួយសម្រួលរាល់ផលប៉ះពាល់ ដើម្បីគ្រឿងចក្របានដំណើការបានលឿន។ ឯកឧត្តមបន្តថា បន្ទាប់ពីទទួលអនុសាសន៍ដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ឧបនាយករដ្ឋមន្រ្តី កែ គឹមយ៉ាន សមាជិកគណ:អចិន្រ្តៃគណ:កម្មាធិការកណ្តាល ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ ក្រុមការងារបានចុះអនុវត្តន៍ការងារស្ថាបនាផ្លូវទាំង៧សង្កាត់នេះ សម្រេចបានជាង៥០% លើគម្រោងផែនការសរុប ហើយក្រុមការងារ នឹងបន្តទៅសង្កាត់ផ្សេងៗទៀតដែលមិនទាន់បានអនុវត្តន៍ ដើម្បីពន្លឿនឲ្យបានរួចរាល់មុនថ្ងៃបោះឆ្នោតខាងមុខ ៕ដោយ៖ឃិន គន្ធា