កំពង់ធំ៖ ឯកឧត្តម សុខ លូ អភិបាលខេត្តកំពង់ធំ ព្រមទាំងអ្នកមុខអ្នកការ មន្រ្តីរាជការ លោកតា លោកយាយ បានអញ្ជើញតាអាចារ្យ សូត្រមន្តក្រុងពាលី បន់ស្រន់ដល់គុណបារមីទេវតាអរុកអរក្សពីម្ចាស់ទឹកម្ចាស់ដី អ្នកតាព្រៃភ្នំ ដែលបានថែរក្សាប្រាសាទសំបូរព្រៃគុគ សុំឲ្យមានសេចក្តីសុខ និងទទួលបានជោគជ័យ ក្នុងពិធីប្រារព្វខួបមួយឆ្នាំ បញ្ជូល តំបន់ប្រាសាទសំបូរព្រៃគុគ ជាសម្បត្តិបេតិកភណ្ទពិភពលោក ដែលពិធីនេះបានធ្វើឡើងនៅរសៀល ថ្ងៃទី១៤ ខែកក្តដា ឆ្នាំ ២០១៨ ។
ពិធីសូត្រមន្តក្រុងពាលី បន់ស្រន់ម្ចាស់ទឹកដីនៅក្នុងបរិវេណប្រាសាទសំបូរព្រៃគុគ ត្រូវបានរៀបចំឡើងតាម ទំនាមទំលាប់ប្រពៃណីពីបុរាណ ប្រកបដោយភ្លេងពិនពាធ មានបន្លែផ្លែឈើគ្រប់មុខ រួមទាំងភោគផល និងអាហារចំណី រៀបចំជាដង្វាយដល់ព្រះបារមីដែលថែរក្សាប្រាងប្រាសាទ ក្នុងនោះគេសង្កេតឃើញមានលោកយាយ លោកតា និងប្រជាពលរដ្ឋជាច្រើន ចូលរួមរីករាយអបអរសាទរ ខណៈពេលដែល តំបន់ប្រាសាទសំបូរព្រៃគុគ ជាសម្បត្តិបេតិកភណ្ទពិភពលោក គរបខួបមួយឆ្នាំ ។
ឯកឧត្តម សុខ លូ អភិបាលខេត្តកំពង់ធំ បានមានប្រសាសន៍ថា តំបន់ប្រាសាទសំបូរព្រៃគុគ បានដាក់ចូលជាសម្បត្តិបេតិកភណ្ទពិភពលោកនៅថ្ងៃទី៨ ខែកក្កដា ឆ្នាំ ២០១៧ ក្នុងរយះពេលមួយឆ្នាំនេះ រាជរដ្ឋាភិបាលនិង អាជ្ញាធរសំបូរព្រៃគុគជាអ្នកគ្រប់គ្រងផ្ទាល់ បានយកចិត្តទុកដាក់ថែរក្សាអភិរក្ស សម្បត្តិបេតិកភណ្ទពិភពលោក គឺជារបស់មនុស្សជាតិទូទៅ ទូទាំងពិភពលោក គឺមានការចូលរួមពីអង្គការអន្តរជាតិជាច្រើន ដែលមកជួយប្រាសាទសំបូរព្រៃគុគនេះ ហើយឆ្នាំបន្តបន្ទាបើនេះនឹងមានការងារជាច្រើន ដែលត្រូវធ្វើ ដែលមានការចូលរួមពីសហគមអន្តរជាតិ ចំនែកការសម្រួលផ្លូវចូលប្រាសាទគឺស្ថិតក្រោមការគ្រប់គ្រងរបស់ អាជ្ញាធរសំបូរព្រៃគុគ ការជួសជុលផ្លូវ ឬពង្រីកផ្លូវគឺត្រូវមានកិច្ចសហការ ពិភាគក្សាយ៉ាងល្អិតល្អន់ ដោយសារតែតំបន់នេះគឺជាតំបន់ការពារ។
ឯកឧត្តម សុខ លូ បានបញ្ជាក់ថា ក្រោយពី តំបន់ប្រាសាទសំបូរព្រៃគុគ ជាសម្បត្តិបេតិកភណ្ទពិភពលោក ភ្ញៀវទេសចរណ៍ ជាតិ និងអន្តរជាតិ គឺចាប់ផ្តើមមានកំណើនឡើង ក្នុងនោះខេត្តកំពង់ធំ ធានាសេវាកម្មម្ហូបអាហារ និងសណ្ឋាគារ ផ្ទះសំណាក់ការស្នាក់នៅបានគ្រប់គ្រាន់ ហើយនៅពេលអានាគត់អាជ្ញាធរខេត្តកំពង់ធំ និងបង្កើនការទាក់ទាញភ្ញៀវ ទេសចរណ៍មកកំសាន្តច្រើន ដោយសារតែតំបន់ប្រាសាទមានអានាម័យ បរិស្ថានល្អ ត្រជាក់ត្រជុំ និងមិនអោយមានសំរាម សម្រាប់ជីវភាពបងប្អូនប្រជាពលរដ្ឋ បច្ចុបន្នមានជីវភាពល្អជាងមុន លក់ដាច់ជាងមុន សម្រាប់ការប្រារព្វពិធីគំរបខួបមួយឆ្នាំនេះ ដែលនឹងប្រារព្វធ្វើឡើងនៅព្រឹកថ្ងៃទី១៥ ខែកក្តដា ឆ្នាំ ២០១៨នេះ គឺនៅតាមបណ្តាវត្តអារាមទាំងអស់នៅក្នុងខេត្តកំពង់ធំ មានការទូងស្គរ នៅវេលាម៉ោង៩ព្រឹក នឹងមានកម្មវិធីផ្សេងៗ ដើម្បីអបអរសាទរខួបមួយឆ្នាំ នៃការដាក់ តំបន់ប្រាសាទសំបូរព្រៃគុគ ជាសម្បត្តិបេតិកភណ្ទពិភពលោក និងសូមអំពាវនាវឲ្យបងប្អូនប្រជាពលរដ្ឋ រួមទាំងភ្ញៀវទេសចរណ៍ ត្រូវចេះស្រឡាញ់វត្ថុបុរាណ ចូលរួមថែរក្សាអានាម័យ ព្រោះជារបស់យើងទាំងអស់គ្នា។
ដោយ ប៊ុន រដ្ឋា