កំពង់ចាម: ការបើកសំណើរពិគ្រោះថ្លៃ សម្រាប់គម្រោងសាងសង់ផ្លូវបេតុងអារមេ១ខ្សែ ដែលមានប្រវែង២២២ម៉ែត្រ របស់ភូមិគងមហា ឃុំវិហារធំ ស្រុកកំពង់សៀម ខេត្តកំពង់ចាម នារសៀលថ្ងៃទី១៦ ខែកក្កដា ឆ្នាំ២០១៨នេះ ត្រូវបានដំណើរការយ៉ាងរលូន តែតម្លៃធ្លាក់ចុះតិចតួចបំផុត ហាក់បីជាមានការគ្រោងទុកជាមុន។
នាឱកាសនោះដែរ លោកឃន ប្រុស នាយករដ្ឋបាលសាលាខេត្ត និងជាតំណាងដ៏ខ្ពង់ខ្ពស់ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានស្នើរសុំឲ្យតំណាងក្រុមហ៊ុនទទួលការទាំងអស់ ដែលមានវត្តមានចូលរួមក្នុងការពិគ្រោះថ្លៃនេះ គឺសូមឲ្យមានការដេញថ្លៃដោយសេរី និងយុត្តិធម៌ ជៀសវាងការឃុបឃិតគ្នា ក្នុងរូបភាពណាមួយជាដាច់ខាត ព្រោះនេះជាកញ្ចប់ថវិការបស់ជាតិ ដែលបានទម្លាក់ចុះមកឲ្យស្រុក ដើម្បីធ្វើការអភិវឌ្ឍក្នុងមូលដ្ឋាន ដូច្នេះការដេញថ្លៃធ្វើយ៉ាងណា ត្រូវឲ្យមានតម្លាភាព និងការសាងសង់ផ្លូវ ឲ្យត្រូវតាមស្តង់ដារ លក្ខណៈបច្ចេកទេសផងដែរ។
គម្រោងដែលបានដាក់ឲ្យពិគ្រោះថ្លៃខាងលើ គឺជាផ្លូវបេតុងអារមេប្រវែង២២២ម៉ែត្រ ទទឹង៤ម៉ែត្រ កម្ពស់០.១៥ម៉ែត្រ ក្នុងតម្លៃទឹកប្រាក់ប៉ាន់ស្មាន៨៩,៨៦១,៨០០រៀល ត្រូវបានក្រុមហ៊ុន ចំនួន៤ បានចូលរួមធ្វើការដាក់តម្លៃដេញ ចំណែកឯក្រុមហ៊ុនជាច្រើនទៀតមិនមានវត្តមានចូលរួមរំខានដូចការដេញថ្លៃគម្រោងមូលនិធិឃុំនោះទេ ដោយក្រុមហ៊ុន ភិរម្យ រចនា បានដាក់តម្លៃទាបជាងគេ គឺក្នុងតម្លៃទឹកប្រាក់ចំនួន៨៦,៦២៣,២០០រៀលគត់ ដែលអាចទទួលបានជោគជ័យក្នុងការដេញថ្លៃគម្រោងនេះ។
ទោះជាយ៉ាងណា សំណើរពិគ្រោះថ្លៃនេះ ត្រូវបានប្រធានគណៈកម្មាធិការលទ្ធកម្មស្រុក គឺលោក ប៊ិន ឡាដា អភិបាលនៃគណៈអភិបាលស្រុកកំពង់សៀម នឹងធ្វើការប្រជុំពិនិត្យ ភាពត្រឹមត្រូវនៃការបំពេញសំណើរ របស់ក្រុមហ៊ុននិមួយៗ ក្នុងរយៈពេល៧ថ្ងៃទៀត នឹងជូនដំណឹងពីលទ្ធផលសម្រេច ដល់ក្រុមហ៊ុនទាំងអស់បានជ្រាបនៅពេលក្រោយ។
លោកឃន ប្រុស នាយករដ្ឋបាលសាលាខេត្តកំពង់ចាម បានធ្វើការផ្តាំផ្ញើរដល់ក្រុមហ៊ុនណាមួយដែលទទួលបានជោគជ័យក្នុងការដេញថ្លៃគម្រោងនេះ ត្រូវអនុវត្តន៍ការងារសាងសង់ផ្លូវ ឲ្យមានគុណភាពល្អ និងត្រូវតាមស្តង់ដារ លក្ខណៈបច្ចេកទេស ប្រយោជន៍ដល់ការប្រើប្រាស់ ផងដែរ។
សូមបញ្ជាក់ផងដែរថា ដោយសារកន្លងមកការដាក់ដេញថ្លៃគម្រោងម្តងៗ តែងតែមានភាពរញ៉េរញ៉ៃ និងមិនប្រក្រតីទៀតនោះ ដូច្នេះការដាក់ពិគ្រោះថ្លៃគម្រោងខាងលើនេះ ត្រូវបានឯកឧត្តមអភិបាលខេត្តកំពង់ចាម បានដាក់ឲ្យតំណាងចុះត្រួតពិនិត្យ សង្កេតការលទ្ធកម្ម ក្នុងការ ពិគ្រោះថ្លៃជាសាធារណៈ ដើម្បីឲ្យដំណើរការដេញថ្លៃប្រព្រឹត្តទៅដោយរលូន និងមានភាពសុក្រិតយុត្តិធម៌ តែទោះជាយ៉ាងណាការពិគ្រោះគម្រោងខាងលើនេះ ត្រូវបានគេសង្ស័យថា មានការឃុបឃិតគ្នាទៀតផង ដោយកន្លងមកការដាក់ដេញថ្លៃគម្រោងមូលនិធិឃុំ មានតំណាងក្រុមហ៊ុនជាច្រើនបានចូលរួម រកតែកន្លែងទុកឡានមិនបានផង ដោយឡែកខុសគេតែគម្រោងមួយនេះ ដែលមានតែក្រុមហ៊ុន៤មកចូលរួម ហើយតម្លៃធ្លាក់ចុះយ៉ាងទាបបំផុត ៕