ព្រះវិហារ: កម្លាំងមូលដ្ឋានស្នាក់ការកងរាជអាវុធហត្ថស្រុកជាំក្សាន្ត បានចុះប្រតិបត្តិការបង្ក្រាបករណីជួញដូរ រក្សាទុក្ខសារធាតុញៀន និងឃាត់ខ្លួនជនសង្ស័យ១នាក់ ព្រមជាមួយថ្នាំញៀន០៥កញ្ចប់។
លោក អនុសេនីយ៍ឯក ជុន បូរ៉ា មេបញ្ជាការរង ទទួលបន្ទុកការងារព្រហ្មទណ្ឌ បានអោយដឹងថា នៅក្នុងកិច្ចប្រតិបត្តិការបង្ក្រាបករណីខាងលើនេះ ក្រោមការដឹកនាំកម្លាំងដោយលោកវរសេនីយ៍ត្រី ពេជ្រ សុភី មេបញ្ជាការកងរាជអាវុធហត្ថស្រុក កាលពីវេលាម៉ោង៨.៣០នាទី ថ្ងៃទី០៣ ខែសីហា ឆ្នាំ២០១៨ ត្រង់ចំណុចភូមិជាំក្សាន្ត ឃុំជាំក្សាន្ត ស្រុកជាំក្សាន្ត ខេត្តព្រះវិហារ។
លោកបន្តថា ជាលទ្ធផលជាក់ស្ដែងសមត្ថកិច្ចជំនាញបានឃាត់ខ្លួនជនសង្ស័យម្នាក់មានឈ្មោះ ឃុន តុលា (ហៅរិទ្ធ) ភេទប្រុស អាយុ២៨ឆ្នាំ មុខរបរម្ចាស់ហាងខារ៉ាអូខេ រស់នៅភូមិកើតហេតុខាងលើ និងធ្វើការចាប់យកវត្ថុតាងមួយចំនួនរួមមាន៖ ម្សៅក្រាមពណ៍សថ្លាម៉ាទឹកកកចំនួន០៥កញ្ចប់ ក្នុងនោះ តូច០២កញ្ចប់ ស្មើនិង៣០,៣៥ក្រាម ទូរស័ព្ទដៃម៉ាកវីវូ ០១គ្រឿង កំប៉ុងច្រកថ្នាំញៀនចំនួន០១។
បច្ចុប្បន្នជនសង្ស័យរួម និងវត្ថុតាងត្រូវបានកម្លាំងជំនាញក៏សាងសំណុំរឿងបញ្ជូនបន្តទៅកាន់កងរាជអាវុធហត្ថខេត្តព្រះវិហារចាត់ការបន្តតាមនីតិវិធី៕សួនលីណា