ភ្នំពេញ៖ កញ្ញា សុវណ្ណ លីនដា ជាតារាសម្តែង និងម៉ូឌែលវ័យក្មេង មានរូបសម្រស់ស្រស់សោភាមួយដួង ស្ថិតនៅក្នុងក្រុម Sun Super Models ដែលកំពុងមានពន្លឺ លេចធ្លោឡើងលើវិថីសិល្បៈ ខណៈប្រជាប្រិយភាព និង កេរ្តិ៍ឈ្មោះរបស់នាង ក៏ត្រូវបាន មហាជនគាំទ្រច្រើន មិនចាញ់តារាស្រីវ័យក្មេងឯទៀតនោះទេ។ តារាសម្តែង សុវណ្ណ លីនដា ក្រោយបណ្តែតខ្លួន ចាប់យកការងារសិល្បៈ អស់រយៈពេលជាង ៥ឆ្នាំ មកនេះ ត្រូវបានគេមើលឃើញ ថា ភាពល្បីល្បាញរបស់នាង ទើបមានការរីកសុះសាយ ក្នុងអំឡុង ពេលជិតមួយឆ្នាំចុងក្រោយនេះ តែប៉ុណ្ណោះ។ ប៉ុន្តែស្របពេល ដែលកេរ្តិ៍ឈ្មោះ និងការគាំទ្រកំពុងតែមានជា បណ្ដើរៗស្រាប់លេចឮដំណឹងអំពីជីវិតស្នេហា ឯកជនក្រៅសិល្បៈមកថា លីនដា កំពុងតែមានទំនាក់ទំនងស្នេហា ដ៏ផ្អែមល្ហែមជាមួយបុរសវ័យក្មេង ជាមនុស្សក្នុងចង្កោមសិល្បៈ។
ផ្អែកតាមប្រភពនិយាយខ្សឹបខ្សៀវ ចេញពីរង្វង់អ្នកសិល្បៈ បានឲ្យដឹងថា កាលពីថ្មីៗនេះ គេតែងឃើញកញ្ញា សុវណ្ណ លីនដាបណ្តើរគ្នាជាមួយបុរសរូបសង្ហា វ័យក្មេងម្នាក់ជាអ្នកសិល្បៈ។ ចំពោះសកម្មភាពស្និទ្ធស្នាល ល្អូកល្អឺនរវាង លីនដា និងបុរសម្នាក់នោះ ត្រូវបានប្រភពនិយាយថា ជាការបង្កើតភ្លើងស្នេហាថ្មោងថ្មី ស្ថិតក្នុងដំណាក់កាល នៃការស្វែងយល់ពីចិត្តគ្នាមុនឈានទៅដល់ជីវិតអាពាហ៍ពិពាហ៍ ។
ប្រភពដដែលបានបន្តថា ជារឿយៗតារាប្រុសរូបសង្ហាគូស្នេហ៍ តារាស្រី សុវណ្ណ លីនដា គឺឧស្សាហ៍មកចាំទទួលយក តារាស្រីរូបនេះ ចេញទៅដើរកំសាន្ត លំហែកាយនៅខាងក្រៅ ជាញឹកញាប់។ ជាពិសេសពួកគេ ទាំងពីរនាក់ ក៏តែងចូលហាងអាហារ និង កន្លែងសប្បាយ ជាមួយគ្នាជាច្រើនទៀត។ តាមរយៈការបង្ហាញអត្តចរិកដ៏ស្និទ្ធស្នាល របស់អ្នកទាំងពីរនេះ គេអាចសន្និដ្ឋានថា សុវណ្ណ លីនដា កំពុងតែបញ្ឆេះភ្លើងស្នេហ៍ ក្រៅឆាកជាមួយបុរសម្នាក់នោះ។
ការបំភ្លឺពីតារាសម្តែង សុវណ្ណ លីនដា នៅឡើយទេ នៅព្រឹកថ្ងៃទី១៤ ខែ កុម្ភៈ ឆ្នាំ២០១៤ជុំវិញបញ្ហានេះ។ ក្រោយពីឈានជើងចូល ក្នុងវិស័យសិល្បៈមួយរយៈនេះ មកតារាសម្តែង និងបង្ហាញម៉ូដ សុវណ្ណ លីនដា បានព្យាយាមខិតខំ សាងកេរ្តិ៍ឈ្មោះឲ្យមានភាពល្បី ដោយការបញ្ចេញ សមត្ថភាពក្នុងការសម្តែងខ្សែភាពយន្ត ការថតឈុតកាយវិកាខារ៉ាអូខេ រហូតដល់មានឱកាស ទាញបានប្រជាប្រិយភាពយ៉ាងច្រើនគួរសម ពីទស្សនិកជន ៕
