ខេត្តស្ទឹងត្រែងៈមន្ត្រីអាវុធហត្ថ៣៩រូបបានទទួលវគ្គបំប៉នលើជំនាញបន្ថែមនៅទីបញ្ជាការដ្ឋានកងរាជអាវុធហត្ថខេត្តស្ទឹងត្រែងរយៈពេល៣សប្តាហ៍ចាប់ពីថ្ងៃទី៩មិថុនាដល់ថ្ងៃទី២៧មិថុនា២០១៤ដោយយោងតាមគំនិតកសាងនិងពង្រឹងកងរាជអាវុធហត្ថអំពីគុណភាព សមត្ថភាព
ការយល់ដឹងលើភារកិច្ចជំនាញបានល្អប្រសើរគ្របភារកិច្ច។
ក្នុងវគ្គបំប៉ននាយ នាយរងអាវុធហត្ថខេត្តស្ទឹងត្រែងខាងលើនេះបានរៀបចំជាមេរៀនតាមគ្រូជំនាញ លំហាត់របៀប ការរក្សាសណ្តាប់ធ្នាប់ ក្រមសីលធម៌អាវុធហត្ថ លិខិតបទដ្ឋានរដ្ឋបាលនិងសង្គ្រោះបឋម។មន្ត្រីដែលទទួលវគ្គបំប៉នខាងលើនេះត្រូវបានកំណត់យ៉ាងខ្ជាប់ខ្ជួននូវវិន័យក្រិតក្រមក្នុងការរៀនសូត្ររាល់ម៉ោងសិក្សាព្រមទាំងការយកចិត្តទុកដាក់ចំពោះខ្លឹមសារមេរៀនដោយគ្រូបង្រៀន។
លោកវរសេនីយ៍ឯក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងនៅក្នុងពិធីបើកវគ្គបំប៉ន នាយ នាយរងអាវុធហត្ថនាព្រឹកថ្ងៃទី៩មិថុនា២០១៤នេះបានថ្លែងទៅកាន់នាយ នាយរងអាវុធហត្ថទាំងអស់ដែលទទួលវគ្គបណ្តុះបណ្តាលលើជំនាញបន្ថែមនោះថាគោលបំណងដើម្បីឲ្យកងរាជអាវុធហត្ថខេត្តស្ទឹងត្រែង មានសមត្ថភាពជំនាញពិតប្រាកដ ជានគរបាលរដ្ឋបាល នគរបាលយុត្តិធម៌ និង តម្រួតយោធាជាមូលដ្ឋាន ដែលមានចែងក្នុងអនុក្រឹតលេខ៧៧ និងត្រូវមានការយល់ដឹងអំពីច្បាប់និតិវិធីក្នុងការអនុវត្តការងារសំដៅពង្រឹងវិន័យ សណ្តាប់ធ្នាប់ឲ្យបានម៉ឺងម៉ាត់ដើម្បីលើកកម្ពស់កិត្យានុភាពកងរាជអាវុធហត្ថឲ្យមានភាពរីកចំរើនលើគ្រប់វិស័យទូទាំងខេត្ត។
លោកមេបញ្ជាការបានបន្តនិងធ្វើការសំណូមពរទៅដល់នាយ នាយរងទាំងអស់ត្រូវខិតខំយកចិត្តទុកដាក់ហ្វឹកហ្វឺនរៀនសូត្រឲ្យបានចេះចាំទាំងទ្រឹស្តី ផ្សារផ្ជាប់នឹងការអនុវត្តជាក់ស្តែងនូវខ្លឹមសារមេរៀនជាចម្បងឲ្យបានគ្រប់ៗគ្នា ប្រយោជន៍ក្នុងការប្រិបត្តិភារកិច្ចបានល្អប្រសើរតាមមុខជំនាញរៀងៗខ្លួន និងឲ្យសមទៅនឹងទំរងរចនាសម្ព័ន្ធនៃកងរាជអាវុធហត្ថនិងទាហានច្បាប់ដើម្បីចូលរួមចំណែកក្នុងការកសាងប្រទេសជាតិ៕