ព្រះវិហារ៖ កាលពីរសៀលថ្ងៃទី ១៦ ខែ កុម្ភះ ឆ្នាំ ២០១៤ នៅវេលាម៉ោង ៤២០ នាទី នៅតាមបណ្តោយ ផ្លូវជាតិលេខ ៦២ ភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត ម៉ាកសាំយ៉ុង ១២ កៅអ៊ី និងម៉ូតូ ឌ្រីមសេ ១២៥ បណ្តាលអោយមនុស្សបីនាក់ស្លាប់នៅកន្លែងកើតហេតុភ្លាមៗមួយរំពេច និងរងរបួសធ្ងន់ម្នាក់ត្រូវបាន ក្រុមគ្រួសារបញ្ជូនមកសង្គ្រោះបន្ទាន់នៅមន្ទីរពេទ្យបង្អែក ១៦មករា ខេត្តព្រះវិហារ ។
តាមការបំភ្លឺពីសាក្សីដែលបានឃើញហេតុការណ៍នេះឱ្យដឹងថា រថយន្តសាំយ៉ុងពណ៌សំបក ឪឡឹកកំពុងធ្វើដំណើរដឹកភ្ញៀវពីប្រាសាទព្រះវិហារក្នុងទិសដៅពីលិចមកកើតបានមកដល់ចំនុចកើតហេតុក៏បុកជាមួយម៉ូតូសេ ១២៥ ពណ៌ខ្មៅពាក់ស្លាកលេខព្រះវិហារ 1A-5890 បើកស្របទិសគ្នាហើយរថយន្តបានបុកម៉ូតូពីក្រោយ បណ្តាលអោយអ្នកបើកបរម៉ូតូឈ្មោះ ភោគ
ម៉ាប់ ខ្ទាតទៅចិញ្ចើមផ្លូវរបួសធ្ងន់ស្របពេលជាមួយគ្នានោះ រថយន្តបានរេចង្កូតមកខាងធ្វេងបានបុកម៉ូតូមួយទៀតបណ្តាលម៉ូតូជនរងគ្រោះចំពីមុខពេញទំហឹងកំពុងជិះទិសដៅបញ្ច្រាសគ្នាបណ្តាលអោយស្លាប់មនុស្សបីនាក់នៅនឹងកន្លែងកើតហេតុតែម្តង។ អ្នកស្លាប់ ទាំងបីនាក់ទីមួយឈ្មោះ សុខ ណន ភេទ ស្រី អាយុ២៩ឆ្នាំ ទីពីរឈ្មោះ ម៉ុក ឡែម អាយុ ៣០ ឆ្នាំ និងទីបី
កុមារាម្នាក់ឈ្មោះ ធុង ធិ ភេទប្រុសអាយុ ០៦ឆ្នាំ ជាកូនឈ្មោះ ម៉ុក ឡែម អ្នកស្លាប់ទាំងបីនាក់ជិះម៉ូតូ សេ១២៥ ពណ៌ខ្មៅពាក់ស្លាក់កំពង់ចាម 1C-8285 មានទីលំនៅជាមួយគ្នាភូមិក្បាលខ្លា ឃុំត្បែង១ ស្រុកសង្គមថ្មី រីឯអ្នកបើកបររថយន្តឈ្មោះ ថេន សុវ៉េង អាយុ ២៩ឆ្នាំ ជាជនបង្ករ។ តាមការបំភ្លឺពីប្រជាពលរដ្ឋនៅ នឹងកន្លែងកើតហេតុបានអោយដឹងថានៅខណះពេល
រថយន្តបុកមនុស្សស្លាប់បីនាក់ អ្នកបើកបរ រថយន្តត្រូវបានប្រជាពលរដ្ឋ និងប៉ូលិសពន្ធធានាគារចាប់បានរួចប្រគល់អោយទៅប៉ូលិសប៉ុស្តិនគរបាលរដ្ឋបាល ឈានមុខឈ្មោះ ហង្ស នាត តែឈ្មោះ ហង្ស នាត បានដោះលែងជនសង្ស័យទៅវិញ។ ក្រោយពី ធ្វើកំណត់ហេតុរួចប៉ូលិសថែមទាំងជួយកាច់ស្លាកលេខរថយន្តរបស់ជនបង្ករយករត់ទៅបាត់ស្រមោល។
លោកអនុសេនីយ៍ឯក ស៊ិន ស៊ីដេត អធិការរងស្រុកត្បែងមានជ័យបានឆ្លើយថាមិនមែនដោះលែងទេតែពេលនោះកំពុងច្របូកច្របល់ជនសង្ស័យឈ្លៀតឱកាសរត់តែម្តង ចាំមើលលោកស្នងការខេត្ត ព្រះវិហារមានវិធានការយ៉ាងដូចម្តេចដែរជាមួយមន្ត្រីនគរបាលក្រោមឪវាទដែលបានដោះលែង ជនបង្ករអោយរួចខ្លួនផុតពីសំណាញ់ច្បាប់ ។