ខេត្តមណ្ឌលគិរី៖ លោកជំទាវ អាយស៊ីសុគន្ធារី អភិបាលរងខេត្តមណ្ឌលគិរីកាលពីថ្ងៃទី១៥ កុម្ភះ ២០១៤ បានអញ្ជើញចូលរួមជាអធិបតីក្នុងពិធីក្រុងពាលីមង្គលសេរី វត្តអារាមថ្មី គឺវត្តព្រះពុទ្ធ មហានិម្មិតប៊ូស្រា ស្ថិតក្នុងភូមិពូទិល ឃុំប៊ូស្រា ស្រុក ពេជ្រាដា ខេត្តមណ្ឌលគិរី។ ព្រះគ្រូមង្គលមុនី ឈិន ហន បានមានពុទ្ធដីការថា ព្រះអង្គ បានមកគង់នៅខេត្តមណ្ឌលគិរី តាំងពីថ្ងៃទី០៥ ខែឧសភា ឆ្នាំ២០០៨ មកម្លេះ ដោយទឹកព្រះទ័យ ជ្រះថ្លាទូលំទូលាយប្រកបដោយកោសល្យ ផលបុណ្យព្រះអង្គបានផ្តួចផ្តើមគៀរគរប្រមូលបច្ច័យពីសប្បុរសជនជិតឆ្ងាយ ដែលមានសទ្ធាជ្រះថ្លា ដើម្បីចូលរួមកម្លាំង កសាងវត្តបានចំនួន ០៤មកហើយ
រហូតមកដល់ថ្ងៃនេះ គឺ ៖ ទី១. វត្តព្រះពុទ្ធមណ្ឌលគិរី ទី២. វត្តធម្មពេជ្រតេជោរាម ទី៣. វត្តធម្មគិរីជ្រៃមាស (ហៅវត្តដាក់ដាំ) និងទី៤ វត្តអារាមថ្មី(ហៅវត្តព្រះពុទ្ធមហានិម្មិតប៊ូស្រា)ដែលកំពុងរៀបចំសាងសង់នេះ។
នៅក្នុងពិធីក្រុងពាលីនោះ ព្រះគ្រូមង្គលមុនី ឈិន ហន បានអំពាវនាវដល់ញាតិ ញោម ពុទ្ធបរិស័ទជិតឆ្ងាយទាំងអស់ចូលរួមតាមសទ្ធាជ្រះថ្លា ដូចជាជួយជាសម្ភារៈ និងបច្ច័យ ដើម្បី សាងសងវត្តព្រះពុទ្ធមហានិម្មិតប៊ូស្រាថ្មីនេះកកើតឡើងស្របតាមបំណងប្រាថ្នារបស់ពទ្ធសាននិកទាំងអស់ បានបំពេញកុសល្យ សាងនូវសទ្ធាជ្រះថ្លារៀងៗខ្លួន តាមពុទ្ធឪវាទទំនៀមទំលាប់
នៃព្រះពុទ្ធសាសនាខ្មែរយើង។ នាឪកាសនោះដែរលោកជំទាវ អាយស៊ី សុគន្ធារី អភិបាលរងខេត្ត និងព្រះគ្រូមង្គល មុនី ឈិន ហន ព្រមទាំងមន្ត្រីរាជការ បានចែកទាន និងអំណោយដល់ប្រជាពលរដ្ឋមកចូលរួមក្នុងពិធីនេះ ក្នុងម្នាក់ៗទទួលបានអាវរងារមួយ និងគ្រឿងឧបភោគ បរិភោគមួយកញ្ចប់ផងដែរ។ 
