ភ្នំពេញ ៖ ហេតុការណ៍មួយបណ្ដាលអោយមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនិងសមត្ថកិច្ចចុះអន្តរាគមន៍ភ្លាមៗខណៈដែលបុរសម្នាក់ត្រូវបានគេស្គាល់ថាជាកូនម្ចាស់ សុភា គ្លីនិកនិងសម្ភព ដែលបានបើករថយន្តបុកគេបុកឯងពាសពេញផ្លូវ កាលពីវេលាម៉ោង៩និង៣០នាទីស្ថិតនៅត្រង់ចំណុចផ្លូវលេខ១៣៤ ក្នុងសង្កាត់ផ្សារដេប៉ូ២ ខណ្ឌទួលគោក។ ប្រភពព័ត៌មានពីសមត្ថកិច្ចបានអោយដឹងថា នៅមុនពេលកើតហេតុខាងលើនេះ គេបានឃើញរថយន្តមួយគ្រឿងម៉ាករ៉េវហ្វ័រ ពណ៌ទឹកប្រាក់ ពាក់ស្លាកលេខ ភ្នំពេញ 2L-6606 បើកបរដោយបុរសម្នាក់បានបុកគ្នាជាមួយនិងរថយន្តCRVមួយគ្រឿងនៅ
ទល់មុខសាលាបឋសិក្សាសន្ធរម៉ុក់ ខណៈនោះដោយម្ចាស់រថយន្តCRVបានចុះមកទះកំផ្លៀងម្ចាស់រថយន្តរ៉េវហ្វ័រមួយដៃហើយក៏ជិះរថយន្តទៅបាត់រួចក៏ម្ចាស់រថយន្តរ៉េវហ្វ័របើករថយន្តរបស់ខ្លួន មកចំណុចផ្លូវលេខ១៣៤កើតហេតុខាងលើក្នុងល្បឿនលឿនទៅបុករះនិងម៉ូតូស្មាស់រ៉េវ៉ូមួយគ្រឿង ពណ៌ខ្មៅ ពាក់ស្លាកលេខ កណ្ដាល 1F-9224 ជិះដោយបុរស២នាក់
បណ្ដាលអោយរងរបួសស្រាល ហើយរថយន្តបង្កនេះបានថយក្រោយទៅបុកនិងមួយគ្រឿងទៀតនៅទល់មុខហាងរបស់គេចំនួន២គ្រឿងហើយរថយន្តបង្កនេះនៅតែព្យាយាម បើកទៅមុខទៀតក៏ជ្រុលទៅបុកនិងរបងផ្ទះរបស់គេបណ្ដាលអោយប៉ើងរបងផ្ទះនិងខ្ទាតទៅបុករថយន្តលុចស៊ីស330ក្នុងផ្ទះមួយគ្រឿងទៀត ពណ៌ស ពាក់ស្លាកលេខ ភ្នំពេញ 2Y-5693
បណ្ដាលអោយរងការខូចខាតផ្នែកខាងមុខបន្តិចបន្តួច ហើយរថយន្តបង្កនេះមិនទាន់អស់ល្បឿនក៏ជ្រុលទៅបុករះនិងរថយន្តមីស៊ុយប៊ីស៊ីមួយគ្រឿង ពណ៌ស ពាក់ស្លាកលេខ រាជការ 2982 ដែលចតនៅលើចិញ្ចើមផ្លូវបណ្ដាលអោយរងការខូចខាតយ៉ាងដំណំខណៈនោះប្រជាពលរដ្ឋដែលស្នាក់នៅក្បែរកន្លែងកើតហេតុបានខឹងសម្បារយ៉ាងខ្លាំងក៏បានមកវាយ
ម្ចាស់រថយន្តរ៉េវហ្វ័រនេះ បណ្ដាលអោយរងរបួសយ៉ាងដំណំ សំណាងហើយដែលមានការអន្តរាគមន៍ពីសមត្ថកិច្ចភ្លាមៗ កុំអីម្ចាស់រថយន្តរ៉េវហ្វ័ររូបនេះមិនដឹងទៅជាយ៉ាងណានោះទេ។ បន្ទាប់ពីកើតហេតុម្ចាស់រថយន្តបង្កត្រូវបានក្រុមគ្រួសារម្ចាស់ទទួលយកទៅព្យាបាលនៅមន្ទីរពេទ្យខ្លួនឯង ព្រោះថាកន្លែងកើតហេតុនេះក្បែរមន្ទីរពេទ្យរបស់ក្រុមគ្រួសាររបស់គេតែម្ដង។
ចំពោះហេតុការណ៍នេះសមត្ថកិច្ចជំនាញបានចុះមកវាស់វែងអូសយករថយន្តបង្កខាងលើនិងឃាត់ខ្លួនម្ចាស់រថយន្តបង្កយកទៅធ្វើការសាកសួរនៅការិយាល័យចរាចរជើងគោករង់ចាំធ្វើការដោះស្រាយតាមផ្លូវច្បាប់។ គួរបញ្ជាក់ផងដែរថា ចំពោះ
ករណីគ្រោះខាងលើ វាជាសំណាងល្អដែលពុំមានមនុស្សរងគ្រោះដល់អាយុជីវិត គ្រាន់តែខូចខាតសម្ភារៈហើយប្រជាពលរដ្ឋក៏បានសំណូមពរដល់សមត្ថកិច្ច មានវិធានការចំពោះម្ចាស់រថយន្តបង្កនេះដែលមានចេតនាបង្កបញ្ហាខាងលើនេះ ព្រោះជាកំហឹងផ្ទាល់ខ្លួនរបស់គេ៕ 
