ភ្នំពេញ ៖ បុរស២នាក់បានរងរបួសបាក់ធ្មេញម្នាក់និងបែកមុខបែកមាត់ស្ទើរតែសុះមុខ ខណៈដែលពួកគេជិះម៉ូតូមួយគ្រឿងម៉ាកឆាលី ពណ៌ស ពាក់ស្លាកលេខ គ៩៥៨៣ ភព១ ឌុបគ្នាកំពុងធ្វើដំណើរតាមបណ្ដោយផ្លូវលេខ២៧១ ក៏ត្រូវបានរថយន្តកាមរីឆ្លាមមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2A-0068 បានបើកបុកម៉ូតូខាងលើនេះយ៉ាងពេញទំហឹង ហើយព្យាយាមបើករត់ពីចំណុចកើតហេតុមកដល់ផ្លូវ១៣៨ ត្រូវបានកម្លាំងសមត្ថកិច្ចកំពុងធ្វើការល្បាតក៏ដេញតាមស្ទាក់ឃាត់បានកាលពីវេលាម៉ោង១១និង១០នាទីយប់ស្ថិតតាមបណ្ដោយផ្លូវលេខ២៧១ក្នុងសង្កាត់ទឹកល្អក់១ ខណ្ឌទួលគោក ។
យោងតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរស២នាក់ជិះម៉ូតូមួយគ្រឿងម៉ាកឆាលី បានធ្វើដំណើរតាមបណ្ដោយផ្លូវ២៧១ ក្នុងទិសដៅពីត្បូងទៅជើងដោយជិះល្បឿនមធ្យម ស្រាប់តែមកដល់ចំណុចកើតហេតុខាងលើក៏ត្រូវបានរថយន្តកាមរីឆ្លាមមួយគ្រឿងធ្វើដំណើរបញ្ច្រាស់គ្នាហើយរថយន្តនោះចង់បត់
ឆ្លងផ្លូវក៏ជ្រុលមកបុកនិងម៉ូតូយ៉ាងពេញទំហឹងបណ្ដាលអោយម្ចាស់ម៉ូតូទាំង២នាក់រងរបួសបែកមុខបែកមាត់ ហើយរថយន្តបង្កនេះមិនព្រមឈប់ទទួលខុសត្រូវក៏ព្យាយាមបើកគេចខ្លួន មកដល់ចំនុចផ្លូវ១៣៨ មុខផ្ទះលេខ196A ក៏ត្រូវបានសមត្ថកិច្ចដេញតាមនិងឃាត់បានរថយន្តតែម្ដង។
បន្ទាប់ពីកើតហេតុសមត្ថកិច្ចបានអោយភាគីទាំងសងខាងធ្វើការសម្របសម្រួលគ្នារួចក៏ម្ចាស់រថយន្តចេញថ្លៃខូចខាតនិងព្យាបាលដល់ម្ចាស់ម៉ូតូចំនួន១៥០ដុល្លារដើម្បីបញ្ចប់រឿងនិងចង់រំខានដល់សមត្ថកិច្ចតទៅទៀត៕ 
