កំពង់ធំ៖ ដោយសារតែឧបព្វហេតុធម្មជាតិ ដោយខ្យល់កន្ត្រាក់ ព្យុះបក់បោកនៅលើផ្ទៃទឹក នៃបឹងទន្លេច្មារ កាលពីថ្មីកន្លងមកនេះ បានធ្វើឲ្យត្រីចម្រុះបានស្លាប់ជិតមួយរយតោន និងជាមូលហេតុនាំឲ្យមានការព្រួយ បារម្មណ៍របស់អាជ្ញាធរខេត្តកំពង់ធំ ពីការបាត់បង់ត្រីមេពូជដោយគ្រោះធម្មជាតិ ក្នុងបឹងអភិរក្សទន្លេឆ្មារ ស្ថិតនៅក្នុងភូមិពៅវើយ ឃុំ ពាមបាង ស្រុកស្ទោង ខេត្តកំពង់ធំ ។
ជាក់ស្តែងនៅព្រឹកថ្ងៃទី ២០ ខែមិថុនា ឆ្នាំ ២០១៤ លោក អ៊ុត សំអន អភិបាលខេត្តកំពង់ធំ និងជាប្រធាន គណៈបញ្ជាការឯកភាពខេត្ត អមដំណើរដោយ លោក លី គឹមពាវ ព្រមទាំងលោក ប៉ែន វណ្ណរិទ្ធ នាយខណ្ទ រដ្ឋបាលជលផល និងលោក ព្រឹម រដ្ឋា អភិបាលស្រុកស្ទោង បានដឹកនាំកំលាំង ប៉ូលិស ប៉េអ៊ឹម និងបរិស្ថាន ចុះសួរសុខទុក្ខបងប្អូនប្រជាពលរដ្ឋ ដែលបានកំពុងតែប្រកបមុខរបរនេសាទ ព្រមទាំងបានចុះសិក្សាតំបន់ ផ្ទៃបឹងទន្លេឆ្មារ រកមូលហេតុដែលបណ្តាលឲ្យ ត្រីស្លាប់យ៉ាងច្រើនសន្ធឹកសន្ធាប់ កាលពីថ្ងៃទី១០.កន្លងមក ដើម្បីប្រជុំពិភាគក្សាររកដំណោះស្រាយ ក្នុងការទប់ស្កាត់កុំឲ្យមឆ្ឆាជាតិ ដែលជាត្រីមេពូជស្លាប់បន្តទៀត។
លោក ប៉ែន វណ្ណរិទ្ធ នាយខណ្ទរដ្ឋបាលជលផលកំពង់ធំ ព្រមទាំងប្រធានបរិស្ថានបានផ្តល់នូវបទសម្ភាសថា ត្រីនៅ បឹងទន្លេឆ្មារនេះ ត្រូវបានងាប់ជារៀងរាល់ឆ្នាំ និងជាច្រើនឆ្នាំមកហើយ រហូតបានក្លាយទៅជាទម្លាប់របស់ប្រជាពលរដ្ឋ ជាច្រើនដែលរស់នៅតំបន់នេះចាំរើសត្រីងាប់ជារៀងរាល់ឆ្នាំ ក្នុងនោះដែរលោកបានបញ្ជាក់ថា តាមការពិនិត្យ និងសង្កេតការជាប្រចាំ គឺត្រីដែលបានងាប់នៅក្នុងទន្លេឆ្មារនេះ គឺបណ្តាលមកពី
នៅរដូវប្រាំងជិត ឈានចូលរដូវវស្សា អាកាសធាតុមានការប្រែប្រួល ពេលខ្លះក្តៅ ពេលខ្លះត្រជាក់ ព្រមទាំងទឹករាក់ ដែលមានជំរៅត្រឹមតែ ៣តឹកប៉ុណ្ណោះ ហើយតំបន់អភិរក្សាទន្លេឆ្មារនេះជាជម្រុកត្រី ប្រៀបបានទៅនឹងកន្លែងប្រោះត្រី គឺមានត្រីកកកុញគ្នា នៅពេលដែលមានខ្យល់ព្យុះ បកបោកទឹកបានធ្វើឲ្យកកដី លាយជាមួយនឹងទឹកក្តៅបានធ្វើឲ្យត្រីពុលទឹកងាប់តែម្តង ។
លោកអ៊ុត សំអន អភិបាលខេត្តកំពង់ធំ ក្រោយពីបានជ្រាប់ពីមូលហេតុដែលបង្ករឲ្យត្រីងាប់ហើយ ក៏បានគ្រោងនិងប្រជុំពិភាគក្សា ដើម្បីរិះរកវិធីការពារត្រីក្នុងបឹងទន្លេឆ្មារ ហើយក៏បានណែនាំឲ្យបងប្អូនប្រជាពលរដ្ឋ ដែលរស់នៅក្នុង បឹងទន្លេសាប កុំឲ្យប្រើប្រាស់នូវឧបកណ៍ខុសច្បាប់ និងការនេសាទទ្រង់ទ្រាយធំ ក្នុងរដូវបិទនេសាទដើម្បីឲ្យ ត្រីបន្តនូវការពងកូន ជាពិសេសនោះ លោក បានកោតសរសើរ នឹងវាយតំលៃខ្ពស់
ទៅលើមន្ត្រីបរិស្ថាន និងមន្ត្រីជលផល ព្រមទាំងប្រជាពលរដ្ឋ ដែលបានរួមគ្នា ថែរក្សាអភិរក្សទាំងមឆ្ឆាជាតិ និងសត្វបក្សីដែលមានរាប់ម៉ឺនរាប់សែនក្បាលនៅទីនេះ និងសូមឲ្យបន្តការអភិរក្សបន្តទៀត នៅថ្ងៃក្រោយ តំបន់នេះអាចក្លាយទៅជាកន្លែងទេសចរណ៍ដ៏សំខាន់ មានផ្លូវចូលមកទស្សនាសត្វបក្សី នៅថ្ងៃអនាគត់។ 
