ព័ត៌មាន Channel News Asia ចេញផ្សាយថ្ងៃទី២០ ខែមិថុនា ឆ្នាំ២០១៤នេះបានឲ្យដឹងថា ភ្នាក់ងារ ផ្តល់ជំនួយរបស់អង្គការ សហប្រជា ជាតិ បានបញ្ជូនជំនួយ ទៅកាន់ប្រទេស អ៊ីរ៉ាក់ជាបន្ទាន់ ដើម្បី ជួយសង្គ្រោះមនុស្សមួយលាននាក់ ដែលបានជម្លៀសចេញ ពីលំនៅដ្ឋានរបស់ខ្លួន
ដោយសារ ការប្រឈម មុខដាក់គ្នានៅអ៊ីរ៉ាក់។ បណ្តាប្រជាជាតិ ជាម្ចាស់ ជំនួយនានា បានធ្វើកិច្ចជំនួបមួយ នៅការិយាល័យ របស់អង្គការ សហប្រជាជាតិ ដែលស្ថិតនៅក្នុងទីក្រុង ហ្សឺណែវ ដើម្បីធ្វើការអំពាវនាវ រកជំនួយថ្មីមួយទៀត នៅសប្តាហ៍ក្រោយនេះ ។ នេះជាការលើកឡើងរបស់លោក Jens Leaeke អ្នកនាំពាក្យតំណាង ស្ថាប័នចែកចាយជំនួយមនុស្សធម៌។ លោកបានលើកឡើងថា ថវិការដែលមានស្រាប់ មានត្រឹមតែ១០៥លានដុល្លារ ដោយស្មើនឹង ១៤ភាគរយ នៃអ្វីដែលយើង កំពុងត្រូវការប៉ុណ្ណោះ។ សូមជំរាបថា រហូតមកទល់ពេលនេះ មានមនុស្ស ចំនួន៥០០ ពាន់នាក់ បានភៀសខ្លួនចេញពីលំនៅដ្ឋានរបស់ខ្លួន ដោយសារការប្រឈមមុខដាក់គ្នា តំបន់ភាគខាងលិចប្រទេស អ៊ីរ៉ាក់។ ជាមួយគ្នានេះដែរ អង្គការសុខភាពពិភពលោក ដែលហៅកាត់ថា WHO បានឲ្យដឹងផងដែរថា អាជ្ញាធរ ក្នុងខេត្តKurdistan បានស្នើរសុំជំនួយថ្នាំ ពេទ្យជាបន្ទាន់ ដោយសារការផ្គត់ផ្គង់ថ្នាំ ពីសំណាក់ មន្ទីរពេទ្យ ពីទីក្រុងបាដាត ត្រូវបានកាត់ផ្តាច់ទៅហើយ ៕