កំពង់ចាម: ដើម្បីបញ្ចៀសពីហេតុការណ៍ចៃដន្យជាយថាហេតុ ព្រោះកម្ពស់ទឹកចេះតែបន្តហក់ឡើង ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម នាព្រឹកថ្ងៃទី៣១ ខែសីហា កន្លងទៅនេះ បានដឹកនាំកងកម្លាំងសមត្ថកិច្ច ចុះជួយរុះរើផ្ទះរបស់ប្រជាពលរដ្ឋ១៣ខ្នង ដែលរស់នៅក្នុងឃុំសូគង ស្រុកកងមាស ខេត្តកំពង់ចាម។
នាឱកាសនោះដែរ ឯកឧត្តម គួច ចំរើន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល សម្តេច តែងតែយកចិត្តទុកដាក់គិតគូរពីទុក្ខលំបាករបស់ បងប្អូនប្រជាពលរដ្ឋទូទៅ ដោយមិនប្រកាន់ពណ៍សម្បុរពូជសាសន៍ និងនិន្នាការនយោបាយឡើយ។ ជាមួយគ្នានោះដែរ ក្នុងនាមឯកឧត្តមផ្ទាល់ និងក្នុងនាមជាអាជ្ញាធរខេត្តកំពង់ចាម ក៏បានថ្លែងចូលរួមរំលែកទុក្ខលំបាករបស់បងប្អូនប្រជាពលរដ្ឋដែលបានរងគ្រោះដោយសារគ្រោះធម្មជាតិនេះ។
ឯកឧត្តមបានបន្ដទៀតថា កត្តាធម្មជាតិ គឺយើងមិនអាចទប់ស្កាត់វាមិនឲ្យកើតមានឡើងបានទេ តួយ៉ាងដូចជាយើងមិនអាចឃាត់កុំឲ្យទឹកជំនន់ ខ្យល់ព្យុះ។ល។ ព្រោះនេះជាសភាវៈធម្មជាតិ ខែវស្សាត្រូវតែមានភ្លៀងធ្លាក់ ហើយបងប្អូនដែលនៅតាមដងទន្លេក៏គង់នឹងមានផលប៉ះពាល់ពីជំនន់ចៀសមិនផុត គ្រាន់តែមានកំរិតវាតែប៉ុណ្ណោះ។
ឯកឧត្តម ក៏បានថ្លែងបញ្ជាក់បន្ថែមទៀតថា ឯកឧត្តម ពិតជាមានការចូលរួមសោកស្ដាយ ចំពោះបងប្អូនប្រជាពលរដ្ឋ ដែលត្រូវបានបង្ខំឲ្យចាកចេញពីលំនៅដ្ឋានរបស់ខ្លួនមួយរយៈពេល តែទោះជាយ៉ាងណាក៏ដោយ ក៏អាជ្ញាធរស្រុក បានកំណត់ទីទួលសុវត្ថិភាពដែលមានបំពាក់ឧបករណ៍សម្ភារៈគ្រប់គ្រាន់ ដើម្បីបំពេញតម្រូវការប្រចាំថ្ងៃរបស់បងប្អូនរួចជាស្រេចហើយដែរ។
ជាងនេះទៅទៀតនោះ ឯកឧត្តមក៏បានផ្តាំផ្ញើឲ្យបងប្អូនកូនក្មួយទាំងអស់ត្រូវប្រុងប្រយ័ត្នចំពោះបញ្ហានានាក្នុងដូវទឹកជំនន់នេះ ជាពិសេសក្មេងៗ ចាស់ជរា ស្រ្តីមានផ្ទៃពោះបើមានបញ្ហាផ្សេងៗគឺសូមរាយការណ៍ជាបន្ទាន់ទៅអាជ្ញាធរមូលដ្ឋានដើម្បីរកចំណាត់ការដោះស្រាយជូនបងប្អូនឲ្យបានទាន់ពេលវេលា។
ជាមួយគ្នានោះ ឯកឧត្តម គួច ចំរើន អភិបាលខេត្តកំពង់ចាម ក៏បានថ្លែងអរគុណចំពោះកងកម្លាំង និងអាជ្ញាធរពាក់ពន្ធ័ទាំងអស់ ដែលបានចុះជួយរុះរើផ្ទះប្រជាពលរដ្ឋបានទាន់ពេលវេលា ក្នុងនោះឯកឧត្ដម ក៏បាននាំយកអំណោយជាស្បៀង រួមមានអង្ករ៥០គីឡូក្រាម មី២កេះ ត្រីខ១យួរ មុង១ សារ៉ុង១ និងថវិកា១០ម៉ឺនរៀល ជូនដល់ពលរដ្ឋរងគ្រោះផងដែរ ៕