កំពង់ធំ៖ កងកម្លាំងវរសេនាតូចលេខ១ ចំណុះឲ្យតំបន់ប្រតិបត្តិការសឹករងកំពង់ធំ បានកំពុងតែមមាញឹក ក្នុងការសាងសង់អគារសម្រាប់ដាំស្លរ បម្រើជូនដល់កម្លាំងវរសេនាតូចលេខ១ ក្រោមការយកចិត្តទុកដាក់ ណែនាំចង្អុលបង្ហាញរបស់ ឯឧត្តម ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤មេបញ្ជាការតំបន់ប្រតិបត្តិការសឹករងកំពង់ធំ ជម្រុញឲ្យកងកម្លាំងទាំងអស់ ហ្វឹកហាត់គ្រប់ជំនាញដើម្បីបំរើការ នៅក្នុងអង្គភាព។
ជាក់ស្តែងអាគារផ្ទះបាយ មួយខ្នងដែលកងកម្លាំងវរសេនាតូចលេខមួយ កំពុងតែសាងសង់ ដែលមានទំហំ៥ម៉ែត្រx១០ម៉ែត្រ ដែលជាជំនួយរបស់សប្បុរសជន សម្រាប់បងប្អូនយោធិនយើងពិសារជាសមូហភាព ដែលជាការឧបត្តម្ភរបស់ឯកឧត្តមសុខ លូ អភិបាលខេត្តកំពង់ធំ បានជួយសាងសង់អគារផ្ទះសម្រាប់ហូបបាយទំហំ១២ម៉ែត្រx៣០ម៉ែត្រ របស់កងទ័ពនៅវរសេនាតូចលេខ១នេះកន្លងមកអស់ទឹកប្រាក់ជិត២ម៉ឺនដុល្លារសហរដ្ឋអាមេរិកផងដែរដោយកងកម្លាំងវរសេនាតូចលេខមួយ រួមគ្នាសាងសង់ដោយផ្ទាល់ បានកាត់បន្ថយការចំណាយយ៉ាងច្រើន ដែលគួរឲ្យកោតសរសើរ ។
ឯកឧត្តមឧត្ដមសេនីយ៍ទោ សោម ស៊ុន បានមានប្រសាសន៍ថា សកម្មភាពសាងសង់អាគារភាគច្រើន គឺត្រូវបានជួលតែមេជាង ហើយកងកម្លាំងយើងជាអ្នកសាងសង់ទាំងអស់ ដែលជាមោទនភាព ដែលកងកម្លាំងមានជំនាញ ច្បាស់លាស់ ដូចជាអាគារ ដែលបានសាងសង់រួចមាន អគារធ្វើការងារ អគារស្នាក់នៅ សាល សាលប្រជុំ រួមទាំងអាគារផ្ទះបាយ ។
ឯកឧត្តមឧត្ដមសេនីយ៍ទោ សោម ស៊ុន បានគូសបញ្ជាក់ថា នៅតាមបណ្តាផ្នែកសឹករង ស្រុកក្រុង និងបានណែនាំឲ្យមានការចិញ្ចឹមសត្វ ដាំបន្លែ និងបណ្តុះបណ្តាលមុខជំនាញ ចាំបាច់ក្នុងការបំរើការងារប្រចាំថ្ងៃ ដូចជា ជាងសំណង់ សិក្សាព័ត៌មានវិទ្យា រួមទាំងច្បាប់នានាផងដែរ ក្នុងនោះឯកឧត្តម សោម ស៊ុន ក៏បានបញ្ជាក់ថា អំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងជានាយករដ្ឋមន្រ្តីនៃព្រះរាជាណាចក្រកម្ពុជា ដែលបានសាងសង់រួចចំនួន ៩៥ខ្នងផ្ទះ ហើយបានប្រគល់ជូនដល់គ្រួសារអតីតយុទ្ធជន និងអតីតយុទ្ធជនពិការ រស់នៅក្នុងខេត្តកំពង់ធំ គឺសុទ្ធសឹងតែជាស្នាដៃរបស់ កងកម្លាំងតាមបណ្តាផ្នែកសឹករងស្រុកក្រុង ជាអ្នកសាងសង់ ដែមបានរួមសហការសាងសង់ជាមួយនឹង ស្ថាប័នប៉ូលិស និងស្ថាប័នកងរាជអាវុធហត្ថតាមបណ្តាស្រុកនានាផងដែរ។
ដោយ ប៊ុន រដ្ឋា
