កំពង់ចាម: ដើម្បីរកដំណោះស្រាយជូនដល់បងប្អូនប្រជាពលរដ្ឋ ដែលទទួលរងការគំរាមកំហែងដោយការបាក់ច្រាំងទន្លេ បណ្ដាលឲ្យប៉ះពាល់ដល់លំនៅឋានរបស់ពួកយ នាព្រឹកថ្ងៃទី០៦ ខែកញ្ញា ឆ្នាំ២០១៨នេះ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយប្រធានមន្ទីរ មន្ត្រីជំនាញពាក់ព័ន្ធ និងលោកឧត្ដមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម បានអញ្ជើញចុះពិនិត្យស្ថានភាពបាក់ច្រាំងទន្លេ និងដឹកនាំកម្លាំង ចុះជួយរុះរើ ផ្ទះប្រជាពលរដ្ឋដែលរងដោយគ្រោះធម្មជាតិ នៅភូមិទី៩ ឃុំអង្គរបាន និងភូមិបឹងសាងលិច ឃុំសូគង ស្រុកកងមាស ខេត្តកំពង់ចាម ។
បន្ទាប់ពីចុះពិនិត្យការបាក់ច្រាំងទន្លេ នៅភូមិទី៩ ឃុំអង្គរបាន ឯកឧត្ដម អភិបាលខេត្ត និងក្រុមការងារ បានចុះលុយទឹកទៅជួយរុះរើផ្ទះបងប្អូនប្រជាពលរដ្ឋ នៅភូមិបឹងសាងលិច ដែលកំពុងទទួលរងនូវការគំរាមកំហែងដោយការបាក់ស្រុតដីច្រាំងទន្លេជាបន្តបន្ទាប់ ព្រមទាំងបាននាំយកអំណោយមនុស្សធម៌កាកបាទក្រហមកម្ពុជា ទៅចែកជូនដល់ពលរដ្ឋរងគ្រោះទាំង២៣គ្រួសារផងដែរ ។
ឆ្លៀតក្នុងឱកាសនោះ ឯកឧត្ដម គួច ចំរើន អភិបាលខេត្តកំពង់ចាម បានថ្លែងចូលរួមរំលែកនូវទុក្ខលំបាករបស់បងប្អូនប្រជាពលរដ្ឋ ដែលទទួលរងដោយគ្រោះធម្មជាតិនេះថា គ្រោះធម្មជាតិ តែងតែកើតមានឡើងតាមរដូវកាលរបស់វា ចំពោះផលប៉ះពាល់គឺចៀសមិនផុតនោះទេ គ្រាន់តែមានតិចឬច្រើនប៉ុណ្ណោះ។
ជាមួយគ្នានោះ ឯកឧត្ដម អភិបាលខេត្ត បានមានប្រសាសន៍ថា ជារៀងរាល់ឆ្នាំ នៅខេត្តកំពង់ចាម តែងតែមានប្រជារដ្ឋ រងគ្រោះដោយការបាក់ច្រាំងទន្លេ ធ្វើឲ្យប៉ះពាល់ដល់លំនៅដ្ឋានរបស់ពួកគាត់ ហើយពួកគាត់បានបង្ខំចិត្តរុះរើទៅតាំងទីលំនៅថ្មី ដោយអ្នកខ្លះមិនបានដឹងមុន ហើយទទួលរងគ្រោះដោយបាក់ច្រាំងស្រុតផ្ទះចូលក្នុងទន្លេបាត់ក៏មាន ចំពោះគ្រួសារដែលបានរុះរើ ទៅសាងសង់លំនៅឋានថ្មីឡើងវិញ ទៅតាមស្ថានភាពជាក់ស្ដែងរបស់គ្រួសារនីមួយៗ ខ្លះទៅជិត ខ្លះទៅឆ្ងាយ និងខ្លះចាកចោលស្រុក ទៅតាមលទ្ធភាពរៀងៗខ្លួន។
ដូច្នេះហើយ ឯកឧត្ដម បានផ្តួចផ្តើម បង្កើតក្រុមការងារមួយ ដើម្បីសាកល្បងសិក្សា អំពីស្ថានភាពប្រជាពលរដ្ឋ ដែលរងដោយការបាក់ច្រាំងទន្លេ ក្រុមការងារនេះ សាកល្បងប្រមូលផ្ដុំគិតរកវិធីដើម្បីជួយដល់ពលរដ្ឋ ក្នុងការស្ដារស្ថានភាពឡើងវិញ ទៅតាមលទ្ធភាព សមត្ថភាព ដែលអាចធ្វើទៅបាន ។
ទោះជាយ៉ាងណា ខាងលើនេះគ្រាន់តែជាការផ្តើមគំនិតប៉ុណ្ណោះ ការសំខាន់នោះ គឺនៅរង់ចាំការចូលរួមពីគ្រប់មជ្ឈដ្ឋានជាមុនសិន។
ជាងនេះទៅទៀតនោះគឺ ឯកឧត្តម អភិបាលខេត្ត បានជុំរុញឲ្យបងប្អូនប្រជាពលរដ្ឋទាំងនោះ មូលមតិគ្នា ប្រមូលផ្ដុំទៅតាំងទីលំនៅថ្មីនៅកន្លែងណាមួយ ដើម្បីងាយស្រួលឲ្យអាជ្ញាធរចូលរួមធ្វើការអភិវឌ្ឍ ដូចជាកសាងផ្លូវ តបណ្ដាញទឹកភ្លើង ជូនផងដែរ ៕