កំពង់ធំ៖ អង្ករចំនួន៣,០០០ គីឡូក្រាម និងមីយើង ចំនួន២០០ កេសបន្ថែមទៀត ត្រូវបានសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជន ផ្ដល់ជូន លោក ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជា ខេត្តកំពង់ធំ សម្រាប់ធ្វើការងារមនុស្សធម៌ តាមរយលោក ឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក អគ្គលេខាធិការរងសមាគមអតីតយុទ្ធជនកម្ពុជា ។
ការផ្តល់ជូនស្បៀងអាហារ នេះដោយបានមើលឃើញពីសកម្មភាពមមាញឹករបស់មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនខេត្តកំពង់ធំ ក្នុងការស្វែងយល់ពីសុខទុក្ខ និងជីវភាពរស់នៅរបស់អតីតយុទ្ធជន និងប្រជាជនដែលមានជីវភាពលំបាក ខ្វះខាតនៅតាមបណ្ដាមូលដ្ឋាននានានៅក្នុងខេត្តកំពង់ធំ បានយ៉ាងល្អប្រសើរ ។
ដើម្បីឲ្យបានបន្តការងារ បម្រើប្រជាជនឲ្យបានទ្វេដងថែមទៀត នៅក្នុងអណត្តិទី៦ នៃរាជរដ្ឋាភិបាលថ្មីនេះ តាមរយលោក ឧត្ដមសេនីយ៍ឯកហ៊ុន ម៉ាណែត សម្ដេចតេជោហ៊ុន សែន បានបន្តឧបត្ថម្ភអង្ករចំនួន៣,០០០ គីឡូក្រាម និងមីយើងចំនួន២០០កេស ដល់មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនខេត្ត នៅព្រឹកថ្ងៃទី០៨ ខែកញ្ញា ឆ្នាំ២០១៨ នៅបញ្ជាការដ្ឋានតំបន់ប្រតិបត្តិការសឹករងកំពង់ធំ ។
លោក ឧត្តមសេនីយ៍ទោ សោម ស៊ុន បានប្តេជ្ញាចិត្តដាច់ខាតបន្តឆ្ពោះទៅកាន់មូលដ្ឋានដើម្បីបម្រើប្រជាជនឲ្យបានទ្វេដងថែមទៀតដោយមិនគិតពីការលំបាកហត់នឿយឡើយ ហើយនិងសូមគោរពថ្លែងអំណរគុណដ៍ជ្រាលជ្រៅជាទីបំផុតចំពោះសម្តេចតេជោ និងសូមគោរពជូនពរសម្តេចនិងសម្តេចកិត្តិព្រិទ្ធបណ្ឌិត បុត្រាបុត្រី ចៅប្រុសចៅស្រី សូមបានប្រកបតែនិងពុទ្ធពរទាំងបួនប្រការគឺ អាយុ វណ្ណៈ សុខះ និងពលះ កុំបីឃ្លៀងឃ្លាតឡើយ ។
ដោយ ប៊ុន រដ្ឋា