កំពង់ធំ៖ លោក វ.ត្រី ឃុន ភារ: មេបញ្ជាការដ្ឋានកងរាជអាវុធហត្ថស្រុកស្ទោង ឃាត់រថយន្តដឹកឈើ ដោយ គ្មានច្បាប់អនុញាតិ បំរ៉ុងលោតឆ័ត្រ តែត្រូវបានជាប់អន្ទាក់សមត្ថកិច្ចកងរាជអាវុធហត្ថស្រុកស្ទោង ចាប់បញ្ជូនឲ្យសមត្ថកិច្ចជំនាញមេព្រៃ។
តាមសេចក្តីរាយការណ៍របស់ប្រភពព័ត៌មាន បានឲ្យដឹងថា មុនពេលឃាត់រថយន្តនេះបាន ត្រូវបានទទួលព័ត៌មាន ពីបណ្តាញសង្ងាត់ថា មានរថយន្តហាយឡែនឌឺមួយគ្រឿង ពណ៌ស្លែរ ពាក់ស្លាកលេខ ភ្នំពេញ 2V-4056 សេរី2003 ត្រូវបានថៅកែឈើឈ្មោះ តឿ ដែលជាមេឈ្មួញរកស៊ីដឹកឈើប្រចាំខេត្តសៀមរាប កំពង់ធំ ប្រើឲ្យដឹកឈើដែលមានឈើនាងនួន ឈើគ្រញូង និងឈើនាងនួន ឆ្លងកាត់ខេត្តកំពង់ធំ ដើម្បីទៅលក់នៅប្រទេសវៀតណាម។
លុះដឹកមកដល់ ចំណុចភូមិស្លាក់ក្រាញ់ ឃុំចំណាក្រោម ស្រុកស្ទោង ខេត្តកំពង់ធំ ក៏ត្រូវបានលោក លោក វរសេនីយ៍.ត្រី ឃុន ភារ: មេបញ្ជាការដ្ឋានកងរាជអាវុធហត្ថស្រុកស្ទោង ដឹកនាំកម្លាំងបង្រ្កាប និងស្ទាក់ចាប់តែ ម្តងដោយមានការឯកភាពពី មេបញ្ជាការកងរាជអាវុធហត្ថខេត្តកំពង់ធំ នៅវេលាម៉ោង០០:១៦នាទីថ្ងៃទី១៣/០៩/២០១៨ ដែលមានកម្លាំងអ.ហស្រុកស្ទោងចំនួន ០៧នាក់ រថយន្ត ០៣គ្រឿង។
លោក វរសេនីយ៍ត្រី ឃុន ភារ: បានឲ្យដឹងថា ក្រោយពីទទួលបានព័ត៌មានខាងលើ ក៏បានសុំយោបល់ពីមេបញ្ជាការ ដឹកនាំកម្លាំងបង្រ្កាប បានរថយន្តហាយឡែនឌឺ ដែលបានដឹក បទល្មើសធនធានធម្មជាតិ ករណីដឹកជញ្ជូន ផលអនុផលព្រៃឈើដោយគ្មានច្បាប់អនុញាតិ ចំណែក អ្នកបើកបររត់គេចខ្លួនបាត់ សមត្ថកិច្ចបានប្រមូលវត្ថុតាង រួមមានប្រភេទឈើនាងនួនចំនួន ១៤ដុំ ស្មើនិង ០.៥១០ម៉ែត្រគូប ហើយបានប្រគល់ជូន សង្កាត់រដ្ឋបាលព្រៃឈើស្ទោង ដើម្បីអនុវត្តន៍តាមនិតិវិធីច្បាប់។
សូមរំលឹកថា បញ្ហាដឹកជញ្ជូនបទល្មើស ឈើដោយខុសច្បាប់ គឺត្រូវបានកំរើកសារជាថ្មីវិញហើយ ដែលត្រូវបានគេដឹងថា ជាឈ្មួញឈើឈ្មោះ តឿ និងឈ្មួញឈើដ៏សកម្ម៣នាក់ទៀត កំពុងតែធ្វើសកម្មភាពដឹកជញ្ជូន ដែលជាប្រភេទឈើធ្នង់ នាងនួន និងឈើគ្រញូង ចេញពីខេត្តព្រះវិហារ និងខេត្តសៀមរាប តែកម្រនិងសមត្ថកិច្ចឃាត់បានរថយន្តដឹកបទល្មើសទាំងនេះណាស់ តែសមត្ថកិច្ចអាចឃាត់តែតែរថយន្តដឹកបទល្មើស ណាដែលថ្លើមធំហ៊ានរំលោងម្ចាស់ទឹកម្ចាស់ដី។
ដោយ ប៊ុន រដ្ឋា
