កំពង់ធំៈ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនខេត្ត បានថ្លែងថា សកម្មភាពមនុស្សធម៌ និងការយកចិត្តទុកដាក់មកលើក្រុមគ្រួសារអតីតយុទ្ធជន និងប្រជាពលរដ្ឋ គឺត្រូវបានចាប់ផ្តើមឡើងយ៉ាងមមាញឹក និងរស់រវើក ដោយមិនមែនធ្វើសកម្មភាពតែមុនពេលបោះឆ្នោតនោះទេ ក្រោយពេលបោះឆ្នោតជាតិសកម្មភាព រឹតតែមមាញឹក ក្នុងការចុះសិក្សាស្វែងយល់ ពីជីវភាពរបស់នៅរបស់ អតីតយុទ្ធជន និងប្រជាពលរដ្ឋក្រីក្រ ។
ជាក់ស្តែងនៅល្ងាចថ្ងៃទី១៥ ខែកញ្ញា ឆ្នាំ២០១៨ ឧត្តមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ រួមទាំងសហការី បានចុះសួរសុខទុក្ខ គ្រួសារប្រជាពលរដ្ឋទីទ័លក្រមួយគ្រួសារទៀត គឺលោក ហ៊ិន ហាន អាយុ ៥៥ឆ្នាំ ប្រកបមុខរបរធ្វើកម្មករ និងស៊ីឈ្នួលគេ មានភរិយាឈ្មោះ សុន សៀប អាយុ ៥១ ឆ្នាំ មុខរបរជាអ្នកស៊ីឈ្នួលលាងចាន បោកគក់ខោអាវនិងកម្មករផ្សេងៗ មានកូនចំនួន ០៤នាក់ កូន ០២ នាក់ធ្វើកម្មករសំណង់ និងកូនតូចៗ ០២ នាក់ ជាកូនភ្លោះកំពុងសិក្សារៀនសូត្របច្ចុប្បន្នគ្រួសារនេះ រស់នៅក្នុងខ្ទមកំសត់បែកបាក់តូចចង្អៀត ។
ក្នុងឱកាសសំណេះសំណាលសាកសួរសុខទុក្ខនិងលើកទឹកចិត្តនេះ ឯកឧត្តម និងក្រុមការងារមនុស្សធម៌នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានពាំនាំនូវអំណោយរបស់សម្ដេចតេជោ ហ៊ុន សែន តាមរយៈ ឯកឧត្តម ឧត្ដមសេនីយ៍ឯក ហ៊ុន ម៉ាណែត ផ្តល់ជូនក្រុមគ្រួសារគាត់មានអង្ករចំនួន ៥០ គីឡូក្រាម , មីយើងចំនួន ០២ កេស , ទឹកត្រីទឹកស៊ីអ៉ីវចំនួន ០២ យួរ និងថវិកាចំនួន១០០,០០០ រៀល រស់នៅភូមិបល្ល័ង្កខាងកើត សង្កាត់ដំរីជាន់ខ្លា ក្រុងស្ទឹងសែនខេត្តកំពង់ធំ។
គ្រួសារក្រីក្រទីទ័លក្រនេះ បានសំណូមពរ ដល់សម្បុរជនជិតឆ្ងាយ សុំជួយសាងសង់ជម្រកស្នាក់នៅសមរម្យមួយខ្នង ដោយជម្រកស្នាក់នៅបច្ចុប្បន្ន មានរាងតូចចង្អៀតធ្លុះធ្លាយ មើលពីម្ខាងធ្លុះទៅម្ខាង ហើយពេលភ្លៀងម្ដងៗសម្រាកមិនបាន ដោយមូលហេតុជីវភាពទីទ័លក្រគ្មានលទ្ធភាពសាងសង់លំនៅដ្ឋានសមរម្យនឹងគេ ក្នុងនោះគ្រួសារទីទ័លក្រនេះ មានចិត្តរំភើបក្រោយពីបានទទួលអំណោយស្បៀងអាហារ និងថវិកា សម្រាប់ដោះស្រាយជីវភាពប្រចាំថ្ងៃ និងបានថ្លែងអំណរគុណ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនខេត្តកំពង់ធំ ដែលតែងតែយកចិត្តទុកដាក់ ដោះស្រាយជីវភាព ក្រីក្ររបស់គ្រប់ទិសទី ក្នុងខេត្តកំពង់ធំ។
ដោយ ប៊ុន រដ្ឋា
