សៀមរាប៖ ប្រជាពលរដ្ឋជួបគ្រោះទឹកជំនន់២៣៩គ្រួសារ ដែលកំពុងតែជួបការលំបាក ខ្វះខាត ស្បៀងអាហារ ត្រូវបាន មូលនិធិមនុស្សធម៌អតីតសិស្សបឋមសិក្សាវត្តរាជបូព៌ នាំយកអំណោយសម្បុរជន បានពីអតីតសិស្សរួមជំនាន់ បឋមសិក្សា វត្តរាជបូព៌ា និងសម្បុរសជនក្រៅប្រទេស ព្រមទាំងសម្បុរសជន នៅទីក្រុងភ្នំពេញ បាននាំយកអំណោយចែកជូន ប្រជាពលរដ្ឋក្រីក្រ ជួបនិងគ្រោះទឹកជំនន់ ចំនួន២៣៩គ្រួសារ ដែលកំពុងរស់នៅក្នុងភូមិចុងឃ្នាស សង្កាត់សៀមរាប ក្រុងសៀមរាប ខេត្តសៀមរាប។
ពិធីចែកអំណោយជូនដល់ប្រជាពលរដ្ឋ រងគ្រោះដោយសារទឹកជំនន់នេះ គឺមានការចូលរួមរបស់លោកស្រី តូម៉ូកុ កាសាហ៉ារ៉ា ជាជនជាតិជប៉ុន និងលោក លោក ឈាវ ហ៊ា នាយកសាលាវិចិត្រសិល្បះតូច រួមទាំងចៅសង្កាត់សៀមរាប កងកម្លាំងប៉ូលិស ទាហាន និងប្រជាការពារ ព្រមទាំងប្រជាពលរដ្ឋ សរុប២៥០នាក់ នៅព្រឹកថ្ងៃទី២០ ខែកញ្ញា ឆ្នាំ ២០១៨។
លោក ឈាវ ហ៊ា នាយកសាលាវិចិត្រសិល្បះតូច នៅក្នុងក្រុងសៀមរាប បានឲ្យដឹងថា មុនដំបូង គឺម្តាយធម៌របស់លោកជាជនជាតិជប៉ុន គឺជាម្ចាស់សាលា វិចិត្រសិល្បះតូច ដែលមានឈ្មោះ តូម៉ូកុ កាសាហ៉ារ៉ា មានបំណងចង់ចែកជូនដល់ប្រជាពលរដ្ឋ ត្រឹមតែតូចតាចតាមលទ្ធភាពនោះទេ ដោយបានមើលឃើញពី ការជួបលំបាករបស់ប្រជាពលរដ្ឋដែលជួបគ្រោះទឹកជំនន់ តែលោក ឈាវ ហ៊ាបានអំពាវនាវដល់មិត្តអតីតសិស្សរួមជំនាន់ និងមិត្តភ័ក្ក ក៏មានការជួយគាំទ្រនូវគំរោងនេះ ដោយជួយឧបត្ថម្ភអង្ករ ជាហូរហែរ ធ្វើឲ្យមូលនិធិនេះ មានលទ្ធភាពនាំយកអង្ករទាំងនេះ ចែកជូនដល់ប្រជាពលរដ្ឋរហូតដល់ទៅ ២៣៩គ្រួសារ ក្នុងមួយគ្រួសារទទួលបានអង្ករ១០ គីឡូក្រាមសរុបស្មើរនឹង ២៣៩០គីឡូក្រាម ។
ចំពោះស្ថានភាពប្រជាពលរដ្ឋ ដែលរងគ្រោះដោយសារទឹកជំនន់នេះ គឺដោយសារតែគ្រោះធម្មជាតិ បានដង្ហក់ ឡើងធ្វើឲ្យលំនៅដ្ឋានរបស់គាត់ ត្រូវបានលិចលង់ ធ្វើឲ្យប្រជាពលរដ្ឋ នាំគ្នាមកសាងសង់ខ្ទមតូចៗ នៅលើទីទួលសុវត្តិភាព ហើយដោយសារតែ ជាប់រវល់ផ្លាស់ប្តូរទីតាំងស្នាក់នៅ ធ្វើឲ្យប្រជាពលរដ្ឋជាច្រើនជួបបញ្ហានិងខ្វះខាតស្បៀងអាហារ ដោយពុំបានទៅនេសាទត្រី ដើម្បីរកចំណូលជួយជីវភាពគ្រួសារ ។
ឈ្មោះស្រី តូម៉ូកុ កាសាហ៉ារ៉ា បានមានប្រសាសន៍ថា លោកស្រីនឹង បន្តសកម្មភាពមនុស្សធម៌នេះទៀត ដោយទទួលបានការឧបត្ថម្ភថវិកាពីប្រទេសជប៉ុន រួមទាំងថវិការរបស់រីបុប្ឋាផងដែរ សម្រាប់ការងារមនុស្សធម៌ ជួយដល់ប្រជាពលរដ្ឋក្រីក្រនៅប្រទេសកម្ពុជា។
លោកចៅសង្កាត់សៀមរាប បានថ្លែងអំណរគុណ ចំពោះសម្បុរជនរបស់ មូលនិធិមនុស្សធម៌អតីតសិស្សរួមជំនាន់ បឋមសិក្សាវត្តរាជបូព៌ា និងសម្បុរជន ជិតឆ្ងាយដែលបាន ជួយដល់ប្រជាពលរដ្ឋរបស់យើងខ្ញុំ ដែលកំពុងតែជួបការលំបាក ខ្វះខាតដោយសារទឹកជំនន់លិចលង់លំនៅដ្ឋាន និងសូមអំពាវនាវដល់បងប្អូនប្រជាពលរដ្ឋ ទាំងអស់មានការ ប្រុង ប្រយ័ត្នចំពោះមនុស្សចាស់ ក្មេងៗ និងទ្រព្យសម្បត្តិទាំងឡាយ កុំឲ្យមានការបាត់បងក្នុងរដូវទឹកជំនន់នេះ ជាពិសេស ពិសារអាហារមានអនាម័យ សម្រាន្តក្នុងមុង ចៀសវាងកើតជំងឺតាមមកពីទឹកជំនន់នេះ។
ដោយ ប៊ុន រដ្ឋា