កំពង់ចាម: អភិបាលនៃគណៈអភិបាលកំពង់ចាម ឯកឧត្តម គួច ចំរើន សម្រេចចេញសេចក្តីណែនាំ ស្តីពីការអនុវត្តន៍ «ចលនាប្រលងប្រណាំង ឃុំ-សង្កាត់បម្រើសេវាល្អ» ដែលតម្រូវឱ្យមេឃុំចៅសង្កាត់ ស្មៀន និងនាយប៉ុស្តិ៍នគរបាលរដ្ឋបាល ទាំង១០៩ឃុំ-សង្កាត់ ចូលរួមបម្រើ សេវាសាធារណៈឱ្យបានល្អ និងមានប្រសិទ្ធភាព នៅតាមបណ្តា ឃុំ-សង្កាត់នៅទូទាំងខេត្ត។
ការប្រកួតប្រជែងនេះ តម្រូវឱ្យមេឃុំ-ចៅសង្កាត់ អនុវត្តការផ្តល់សេវាសំខាន់ៗចាំបាច់ចំនួន៧មុខ ជូនប្រជាពលរដ្ឋនៅមូលដ្ឋានឲ្យដល់ខ្នងផ្ទះ រួមមាន៖ ការចុះសំបុត្រកំណើត ការចុះសំបុត្រអាពាហ៍ពិពាហ៍ ការចុះសំបុត្រមរណភាព ការចុះបញ្ជីឈ្មោះស្នាក់នៅអចិន្ត្រៃយ៍ (ក១) ការផ្តល់សៀវភៅស្នាក់នៅ (ក២) ការចុះឈ្មោះក្នុងបញ្ជីគ្រួសារ (ក៣) និងការផ្តល់សៀវភៅគ្រួសារ (ក៤)។
សេចក្តីណែនាំបានឱ្យដឹងថា គោលបំណងនៃ ការដាក់ចេញនូវចលនាប្រឡង ប្រណាំងការផ្តល់សេវាល្អក្នុងឃុំ-សង្កាត់នេះ គឺដើម្បីឱ្យការផ្តល់សេវាសាធារណៈនៅតាមឃុំ សង្កាត់ ឆ្លើយតប ទៅនឹង តម្រូវការ របស់ប្រជាពលរដ្ឋ ប្រកបដោយ ប្រសិទ្ធភាព មានតម្លាភាព និងគណនេយ្យភាព ឆ្លើយតបជាក់ស្តែងទៅនឹងតម្រូការជាក់លាក់របស់ ប្រជាពលរដ្ឋ។ ទន្ទឹមនេះ ការផ្តល់ សេវាកម្ម ទាំងអស់ មេឃុំ-ចៅសង្កាត់ ស្នៀ ន និងនាយប៉ុស្តិ៍នគរបាលរដ្ឋបាល ឃុំ-សង្កាត់ ត្រូវអនុវត្តន៍ ដោយផ្ទាល់ និងដល់ទីកន្លែងស្នាក់នៅ ស្របតាមខ្លឹមសារណែនាំ ហើយត្រូវផ្សព្វផ្សាយ ជាសាធារណៈ។
ក្នុងសេចក្ដីណែនាំបានគូសបញ្ជាក់ទៀតថា ចលនាប្រលងប្រណាំងនេះ ជាការអនុវត្ត ទៅតាមយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា និងយោងតាមគោលនយោបាយកំណែទម្រង់របស់រដ្ឋាភិបាលកម្ពុជា ផ្តោតលើការកែទម្រង់លើការផ្តល់សេវាសាធារណៈនៅថ្នាក់ក្រោមជាតិ ដែលបានកំណត់ថា ត្រូវបង្កើនដល់ការ បម្រើប្រជាពលរដ្ឋឱ្យកាន់តែល្អប្រសើរឡើង ដើម្បីសុខុមាលភាពរបស់ប្រជាពលរដ្ឋ និងវិបុលភាពប្រទេសជាតិយើង។
ឯកឧត្តម គួច ចំរើន អភិបាលខេត្ដកំពង់ចាម បានលើកឡើងថា រដ្ឋបាលខេត្តកំពង់ចាម នឹងធ្វើការជ្រើសរើស និងវាយតម្លៃ ដាក់ពិន្ទុក្នុងចំណោម រដ្ឋបាល ឃុំ-សង្កាត់ទាំង១០៩ នឹង ជ្រើសរើស យករដ្ឋបាលឃុំ-សង្កាត់ចំនួន១០ ក្នុងនោះរដ្ឋបាលឃុំ-សង្កាត់ ចំនួន៣ ត្រូវកំណត់ ក្នុងជ័យលាភី និង រដ្ឋបាលឃុំ សង្កាត់ចំនួន៧ទៀត កំណត់ជាអ្នកទទួលរង្វាន់ លើកទឹកចិត្ត តាមរយៈការវាយតម្លៃរបស់រដ្ឋបាលខេត្ត។ សម្រាប់អ្នកទទូលជ័យ លាភី លេខ១ នឹងទទួលបាន ថវិកា១០លានរៀល លេខ២ទទួលបានថវិកា៦លានរៀល លេខ៣ទទួលបានថវិកា៤លានរៀល ។ ចំពោះរង្វាន់លើកទឹកចិតដោយ ក្នុងរដ្ឋបាលឃុំ-សង្កាត់នីមួយៗ ទទួលបាន២លានរៀល ព្រមទាំង ប័ណ្ណសរសើរ ម្នាក់មួយផងដែរ ។
សូមបញ្ជាក់ដែរថា ការប្រឡងប្រណាំនេះ នឹងចាប់ផ្តើម អនុវត្តន៍ ពី ខែតុលា ឆ្នាំ២០១៨ ខាងមុខនេះ និងផុតកំណត់ នៅថ្ងៃទី៣១ ខែឆ្នូ ឆ្នាំ២០១៨ ។ សម្រាប់ ឆ្នាំបន្តបន្ទាប់ទៀត រដ្ឋបាល ខេត្ត នឹងកំណត់ ការ បូកសរុប របាយការណ៍ ប្រចាំឆ្នាំ ចាប់ពី ថ្ងៃទី០១ ខែមករា និងបញ្ចប់ ទៅវិញ នៅ ថ្ងៃទី៣១ ខែឆ្នូ ជារៀងរាល់ឆ្នាំ។
ឯកឧត្តម គួច ចំរើន ក្នុងនាមអភិបាលនៃគណៈអភិបាលខេត្តកំពង់ចាម នៅពេលជួប សំណេះសំណាលជាមួយមន្ត្រីរាជការ និងប្រជាពលរដ្ឋ ជានិច្ចជាកាលតែងតែបានណែនាំ និង ជំរុញដល់មន្ត្រីរាជការគ្រប់លំដាប់ថ្នាក់ ទូទាំងខេត្តកំពង់ចាម ត្រូវខិតខំប្រឹងប្រែងបេ្តជ្ញា ក្នុងការ បម្រើសេវាសាធារណៈជូនប្រជាពលរដ្ឋ ឱ្យកាន់តែងាយស្រួល ឆាប់រហ័ស ឈរលើគោល ការណ៍ «ធ្វើឱ្យបាន ធ្វើឱ្យលឿន និងមានតម្លាភាព» ដើម្បីឱ្យស័ក្តិសមទៅនឹងការ គាំទ្រយ៉ាង ភ្លូកទឹក ភ្លូកដី របស់ប្រជាពលដែលបានគាំទ្រ រាជរដ្ឋាភិបាល ដែលមានសម្តេចអគ្គមហាសេ នាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ៕
