ព្រះសីហនុ៖ យោងតាមរដ្ឋបាលខេត្តព្រះសីហនុ បានឲ្យដឹងថា នៅព្រឹកថ្ងៃព្រហស្បត្តិ៍ ទី១១ ខែតុលា ឆ្នាំ២០១៨នេះ នាវេទិកា៧មករា ក្រុងព្រះសីហនុ មានប្រជាពលរដ្ឋប្រមាណជា៤០០នាក់ បានមកទទួលសេវាធ្វើដំណើរតាមរយៈ រថយន្តក្រុង ដោយមិនគិតថ្លៃជាបន្តបន្ទាប់ ជាមួយនឹងរថយន្តចំនួន១០គ្រឿង ដែលសេវាដឹកជញ្ជូនមិនគិតថ្លៃនេះ គឺបំរើការដឹកជញ្ជូនប្រជាពលរដ្ឋ ចេញពីក្រុងព្រះសីហនុ ឆ្ពោះភ្នំពេញវិញ ដើម្បីប្រកបរបរអាជីវកម្មរៀងៗខ្លួនវិញ បន្ទាប់ពីបានធ្វើដំណើរចូលមកកម្សាន្ត ឬទស្សនាខេត្តព្រះសីហនុ នាឱកាសពិធីបុណ្យភ្ជុំបិណ្ទឆ្នាំនេះ។
សេវាដឹកជញ្ជូនមិនគិតថ្លៃ ជូនប្រជាពលរដ្ឋនាឱកាសបុណ្យភ្ជុំបិណ្ឌនេះ គឺជាការគិតគូរ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានណែនាំឲ្យអាជ្ញាធររៀបចំ សេវាដឹកជញ្ជូនរថយន្តក្រុងនេះ ជូនប្រជាពលរដ្ឋ ដោយមិនគិតថ្លៃ នាឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរឆ្នាំនេះ។
ជាមួយគ្នានេះដែរមុនពេលរថយន្ត ក្រុងដឹកអ្នកដំណើរ ចាកចេញពីចំណត នៅវេទិកា៧មករា ស្ថិតចំកណ្តាលក្រុងព្រះសីហនុ យេីងសង្កេតឃើញវត្តមាន ឯកឧត្តម យន្ត មីន អភិបាលនៃគណះអភិបាលខេត្តព្រះសីហនុ និងមន្ត្រីក្រោមឱវាទ នៃរដ្ឋបាលខេត្តបានអញ្ជើញមកជូនដំណេីរ និងជួបសំណេះសំណាលជាមួយអ្នកបើកបររថយន្តក្រុងទាំង១០គ្រឿង និងប្រជាពលរដ្ឋ ដែលមកទទួលសេវាដឹកជញ្ជូនតាមរថយន្តក្រុងមិនគិតថ្លៃ ចាកចេញពីក្រុងព្រះសីហនុ ដើម្បីវិលត្រឡប់ទៅកាន់លំនៅឋាន របស់ខ្លួនវិញ។
សូម្បីនៅកោះត្រល់ក៏សង្គេតឃើញមានសភាពបែបនមួយចំនួនឯកឧត្តមក៏បានមានប្រសាសន៍ថា រថយន្តក្រុងដឹកជញ្ជូនមិនគិតថ្លៃ នាឱកាសពិធីបុណ្យភ្ជុំបិណ្ឌ ដែលចេញដំណេីរនៅព្រឹកថ្ងៃទី១១ ខែតុលា ឆ្នាំ២០១៨នេះ គឺជាជើងដឹកជញ្ជូនចុងក្រោយ ចេញពីក្រុងព្រះសីហនុ ឆ្ពោះទៅកាន់គោលដៅផ្លូវជាតិលេខ៣ ផ្លូវជាតិលេខ៤ ឬគោលដៅរាជធានីភ្នំពេញ ដោយនៅពេលរសៀល មិនមានសេវាដឹកជញ្ជូននេះទៀតទេ ហេីយក៏សូម ជូនពរអោយការធ្វេីដំណេីររបស់បងប្អូនប្រជាពលរដ្ឋទាំងអស់បានទៅដល់គោលដៅរៀងៗខ្លួនប្រកប ដោយសុវត្ថិភាព៕