កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីរាជការ នាព្រឹកថ្ងៃទី១៥ ខែតុលា ឆ្នាំ២០១៨នេះ បានអញ្ជើញជួបសំណេះសំណាល សាកសួរសុខទុក្ខ និងផ្តល់អំណោយជាកង់ រួមជាមួយសម្ភារៈសិក្សា ជូនដល់កុមារកំព្រារ ក្នុងសាលាបឋមសិក្សា ហ៊ុន ណេង បឹងស្នាយ ស្ថិតនៅក្នុងភូមិតាណេង សង្កាត់សំបួរមាស ក្រុងកំពង់ចាម ក្រោមការរៀបចំរបស់អង្គការស្ពាន កម្ពុជា ហូឡង់។លោក ភីត ម៉ាស ម្ចាស់ជំនួយ បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមអភិបាលខេត្តកំពង់ចាម ដែលលោេតែងតែគាំទ្រ និងសហការគ្នាយ៉ាងសកម្ម ក្នុងសកម្មភាពមនុស្សធម៍គ្រប់ទីកន្លែង និងចំណាយពេលវេលាចូលរួមជានិច្ចដោយមិនគិតពីការនឿយហត់។
ឆ្លៀតក្នុងឱកាសនោះដែរ ឯកឧត្ដម គួច ចំរើន អភិបាលខេត្តកំពង់ចាម បានថ្លែងអំណរគុណ ចំពោះសប្បុរជនក្នុងនិងក្រៅប្រទេស ដែលបានចំណាយទាំងថវិកានិងសម្ភារ: ដើម្បីជួយដល់ប្រជាពលរដ្ឋរងគ្រោះ ទីទ័លក្រ ជាពិសេសកុមាររងគ្រោះ កុមារក្រីក្រ ឪពុកម្ដាយបោះបង់ចោល ហើយត្រូវបានអង្គការស្ពាន កម្ពុជា ហូឡង់ ចូលរួមចំណែកជួយកាត់បន្ថយភាពក្រីក្រ សកម្មភាពមនុស្សធម៍ ដោយមិនប្រកាន់ពណ៍សម្បុរ ពូជសាសន៍ និងនិន្នាការនយោបាយ ទាំងនេះហើយ ក្នុងនាមជាអាជ្ញាធរ និងក្នុងនាមឯកឧត្តមផ្ទាល់ ពិតជាពេញចិត្តចំពោះសកម្មភាពនេះ និងគាំទ្រយ៉ាងពេញទំហឹង ព្រោះអង្គការនេះដែលតែងតែជួយទំនុកបម្រុង ឧបត្តម្ភលើមនុស្សទីទ័លជាទូទៅ ក្នុងការកាត់បន្ថយភាពក្រីក្រផងដែរ។ ជាមួយគ្នានោះ ឯកឧត្ដមអភិបាលខេត្ត ក៏បានជំរុញដល់ក្មេងៗសិស្សានុសិស្សទាំងអស់ត្រូវយកចិត្តទុកខិតខំប្រឹងប្រែងរៀនសូត្រ ដើម្បីឲ្យក្លាយទៅជាសសរទ្រូងនៃប្រទេសជាតិយើងនាពេលអនាគតខាងមុខ។
គួរបញ្ជាក់ផងដែរថា ក្នុងនោះដែរអង្គការស្ពានហូឡង់ បានផ្តល់សម្ភារ:សិក្សាដល់កុមារកំព្រារសរុបចំនួន៣០០នាក់ ដោយក្នុងម្នាក់ៗទទួលបាន៖ បិច២ដើម ខ្មៅដៃ សៀវភៅ១០ក្បាល រួមនឹងថវិកាមួយម៊ឺនរៀល ហើយចំណែកសិស្សានុសិស្សចំនួន១០នាក់ ដែលមានទីលំនៅនៅឆ្ងាយពីសាលារៀនទទួលបានកង់ម្នាក់មួយគ្រឿងផងដែរ និងលោកគ្រូ-អ្នកគ្រូ១១នាក់ ក្នុងម្នាក់ៗទទួលបានថវិកា២ម៊ឺនរៀលផងដែរ ៕