កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីជំនាញពាក់ព័ន្ធ នាព្រឹកថ្ងៃទី១៧ ខែតុលា ឆ្នាំ២០១៨នេះ បានអញ្ជើញចុះដោះស្រាយ ករណីវិវាទដីធ្លីដ៏រាំរ៉ៃ ដោយបិទផ្លូវមិនឲ្យប្រជាពលរដ្ឋដើរ ស្ថិតនៅក្នុងភូមិតាសែន ឃុំសូទិព ស្រុកជើងព្រៃ ខេត្តកំពង់ចាម ដោយរឿងវិវាទនេះ គឺ
មានរយៈពេលប្រមាណជា៧ខែមកហើយដោះមិនចប់សោះ។ប៉ុន្តែករណីនេះ នាព្រឹកថ្ងៃទី១៧ តុលា នេះ រឿងវិវាទ បិទផ្លូវ ត្រូវបានឯកឧត្ដម អភិបាលខេត្តសម្រេចឲ្យបើកផ្លូវនោះវិញ សម្រាប់ឲ្យប្រជាពលរដ្ឋធ្វើដំណើរ ព្រោះផ្លូវនោះជាសម្បត្តិរដ្ឋ។
គួររំលឹកផងដែរថា កាលពី៦ ទៅ ៧ខែមុន ករណីបិទផ្លូវនេះគឺផ្តើមចេញពីការលក់ដី ដោយឈ្មោះ ស្រៀង សៀងលី ភេទស្រី អាយុ២៧ឆ្នាំ ជាម្ចាស់ដី ចង់លក់ដី ឲ្យទៅឈ្មោះ កែម សុផាន់ ។ប៉ុន្តែ ក្រោយមក ការលក់ដូរ មិនបានជោគជ័យ ហើយភាគីទាំង២ ក៏បានមានការឈ្លោះ រកាំ រកុះ នឹងគ្នារហូតដល់ ឈ្មោះ កែម សុផាន់ បានបិទផ្លូវដី ទទឹង៤ ម៉ែត្រ មិនឲ្យប្រជាពលរដ្ឋឆ្លងកាត់ផ្លូវនោះ ។ហើយ បន្តបន្ទាប់មក ឈ្មោះ សៀងលី បានដាក់ពាក្យបណ្តឹង ដោយមានប្រជាពលរដ្ឋ៥០នាក់ ផ្តិតមេដៃគាំទ្រ ដើម្បីស្នើសុំ ឲ្យមានការបើកផ្លូវនោះវិញ ។ប៉ុន្តែ ករណីនេះ ថ្នាក់ឃុំ ស្រុក ដោះស្រាយមិនបានជោគជ័យ បន្ទាប់មក រឿងនេះ បានធ្លាក់ដល់ដៃ ឯកឧត្ដម អភិបាលខេត្តកំពង់ចាម និង ហើយលោកបានអញ្ជើញចុះមកធ្វើការដោះស្រាយដោយផ្ទាល់តែម្តង ដែលជាលទ្ធផល ឯកឧត្ដម អភិបាលខេត្ត បានសម្រេច ឲ្យមានការបើកផ្លូវនោះឡើងវិញក្នុងថ្ងៃទី១៧ ខែតុលា ឆ្នាំ២០១៨នេះ ដោយហេតុថា ផ្លូវដីនោះ ជាផ្លូវរបស់រដ្ឋ ៕
