កំពង់ធំៈ ប្រជាពលរដ្ឋ មន្ត្រីរាជការ លោកគ្រូ អ្នកគ្រូ និងសិស្សានុសិស្ស ចំនួនជាង៨០០ នាក់ នៅឃុំបន្ទាយស្ទោង ស្រុកស្ទោង ខេត្តកំពង់ធំ ចូលរួមអបអរសារទរខួបលើកទី៤០ ទិវាជ័យជម្នះ៧ មករា ។
នៅព្រឹកថ្ងៃអាទិត្យ ៨កើត ខែបុស្ស ឆ្នាំច សំរឹទ្ធិស័ក ពស ២៥៦២ ត្រូវនិងថ្ងៃទី១៣ ខែមករា ឆ្នាំ២០១៩ នៅឃុំបន្ទាយស្ទោង ស្រុកស្ទោង ខេត្តកំពង់ធំ បានរៀបចំមីទីងរំលឹកខួបលើកទី៤០ ទិវាជ័យជម្នះ៧មករា (១៩៧៩-២០១៩) ដែលពិធីនេះបានប្រព្រឹត្តិទៅនៅក្នុងបរិវេណវត្តបន្ទាយស្ទោង ឃុំបន្ទាយស្ទោង ស្រុកស្ទោង ខេត្តកំពង់ធំ ដែលមានប្រជាពលរដ្ឋដែលបានអញ្ជើញមកពីតាមបណ្ដាភូមិទាំង១៥ របស់ឃុំបន្ទាយស្ទោង រួមជាមួយអាជ្ញាធរដែនដី មន្ត្រីរាជការ លោកគ្រូ អ្នកគ្រូ និងសិស្សានុសិស្សសរុបចំនួន៨៣៦នាក់ (ស្រ្ដី៣៣៦នាក់)បានអញ្ជើញចូលរួម។
បន្ទាប់ពីប្រធានគណៈអធិបតីឡើងអានសន្ទរកថារបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជារួចមក តំណាងឲ្យអង្គមីទីងបានចាប់អារម្មណ៍ និងប្តេជ្ញាចិត្ត គាំទ្រថ្ងៃ៧មករា ឆ្នាំ១៩៧៩ គឺជាថ្ងៃដែលរណសិរ្សសាមគ្គីសង្គ្រោះជាតិកម្ពុជា សហការជាមួយកងទ័ពស្ម័គ្រចិត្តវៀតណាម បានវាយផ្ដួលរំលំរបបប្រល័យពូជសាសន៍ប៉ុល ពត រំដោះអាយុជីវិតប្រជាជនកម្ពុជាទូទាំងប្រទេសឲ្យរួចផុតពីការកាប់ សម្លាប់ ក្នុងរបបវាលពិឃាដប៉ុលពត ។
សូមបញ្ជាក់ថាការប្រារព្វទិវានេះឡើងបានធ្វើអោយប្រជពលរដ្ឋមើលឃើញពីអត្ថន័យ ថ្ងៃ៧មករាឆ្នាំ១៩៧៩ គឺជាថ្ងៃកំណើតលើកទី២ របស់ប្រជាជនកម្ពុជាគ្រប់រូប ។
មានថ្ងៃ៧មករាឆ្នាំ១៩៧៩ ទេីបយេីងមានអ្វីៗគ្រប់យ៉ាងនៅថ្ងៃនេះ ។
