កំពង់ធំ ៖ បទល្មើសជលផល ត្រូវបានយកចិត្តទុកដាក់ ពីសំណាក់ខណ្ទរដ្ឋបាលជលផលកំពង់ធំ សហការ ចុះបង្ត្រាបដូចភ្លៀងរលឹម ក្រោមការបញ្ជាផ្ទាល់ ពីឯកឧត្តម អ៊ុត សំអន អភិបាល ខេត្តកំពង់ធំ និងជា ប្រធាន គណៈបញ្ជាការឯកភាព ឲ្យខណ្ទរដ្ឋបាលជលផលកំពង់ធំ ដឹកនាំការបង្ក្រាប ដោយ លោក ប៉ែន វណ្ណរិទ្ធ នាយ ខណ្ទរដ្ឋបាលជលផលកំពង់ធំ ក្រោមកិច្ចសហប្រតិបត្តិការយ៉ាងស្អិតរមួត ជាមួយនឹងកំលាំងសឹករង ក្រុងស្ទឹងសែន និងសឹករងស្រុកសន្ទុក ។
ជនសង្ស័យ៤នាក់ ត្រូវបានឃាត់ខ្លួន បណ្តាលមកពីបានប្រើប្រាស់ ឧបករណ៍ឆក់ត្រី នៅចំនុច ប្រាសាទបាក់ ភូមិសាគ្រា ឃុំភ្នៅ ស្រុកសន្ទុក ខេត្តកំពង់ធំ សមត្ថកិច្ចរឹបអូសបាន វត្ថុតាងរួមមាន អាំងវិចទ័រ៤គ្រឿង ដងឆក់ ៤ អាគុយ១២វុល ៥គ្រឿង ចំណែកជនសង្ស័យ ត្រូវបានស្គាល់ឈ្មោះ ឃឹត តង អាយុ ៥៤ឆ្នាំ រស់នៅភូមិ ដា ប្រាសាទឃុំ ស្រុកកំពង់លែង ខេត្តកំពង់ឆ្នាំង ទី២ ឈ្មោះ នែម សយ អាយុ ៦៣ឆ្នាំ ភូមិ ជ្រលង ទី៣ ឈ្មោះ ហ៊ុន ម៉ៅ អ្នកទាំងបីរស់នៅឃុំ ស្រុកជាមួយគ្នា ត្រូវបានឃាត់ខ្លួន នៅម៉ោង ១០.៣០នាទី ព្រឹកថ្ងៃទី ១៩ ខែ កុម្ភះ ឆ្នាំ ២០១៤ ដោយឡែក នៅក្នុងថ្ងៃដដែល ផ្នែករដ្ឋបាលជលផល ផាត់សណ្តាយ បានសហការ ជាមួយនឹង កំលាំងកងរាជអាវុធហត្ថ ស្នាក់ការ B06 បានធ្វើការឃាត់ខ្លួន ជនសង្ស័យម្នាក់ ពីបទឆក់ត្រី ក្រោមកាដឹកនាំដោយ លោក ប្រុញ ប្រិញ រឹបអូសបានវត្ថុតាងមាន អាគុយ ១ ដងឆក់ ២ អាំងវិចទ័រឆក់ត្រី១ ។
លោក អនុសេនីយ៍ឯក សៀង ហុកឃាង់ មេបញ្ជាការផ្នែកសឹករង ក្រុងស្ទឹងសែន បានឲ្យដឹងថា ដោយបទល្មើសឆក់ត្រីកាន់តែមានភាព រាលដាលទៅគ្រប់ច្រកល្ហក ទៅទូទាំងប្រទេស ជាហេតុបណ្តាលឲ្យមានការ ហិនហោចនូវមឆ្ឆាជាតិ ទើបមានការបញ្ជា និងគាំទ្រ ពីឯកឧត្តម អ៊ុត សំអន អភិបាលខេត្តកំពង់ធំ ឲ្យសឹករង គ្រប់ស្រុក សហការជាមួយ សមត្ថកិច្ចជំនាញ ដើម្បីចូលរួម ទប់ស្កាត់ និងបង្ក្រាបបទល្មើដឆក់ត្រី និងចូល រួមថែរក្សាមឆ្ឆាជាតិ ក្រោមការចង្អុលបង្ហាញ ណែនាំពីឯកឧត្តម ឧត្តមសេនីយ៍ត្រី សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ ។
លោក ប៉ែន វណ្ណរិទ្ធ នាយខណ្ទរដ្ឋបាល ជលផលកំពង់ធំ បានអរគុណ ចំពោះកំលាំងសឹករង ក្រុងស្ទឹងសែន ដែលបានសហការបង្ក្រាបបទល្មើស រហូរបានជោគជ័យ និងសម្រេចបានជាច្រើនករណី ក្នុង ការចូលរួម ការពារធនធានមឆ្ឆាជាតិ ដោយឡែកកិច្ចការ ទប់ស្កាត់បទល្មើសឆក់ និងការប្រើប្រាស់ ឧបករណ៍ខុសច្បាប់ ខណ្ទរដ្ឋបាលជលផល បានប្រើប្រាស់ កំលាំងសរុបនៅតាមផ្នែក និងសង្កាត់រួមគ្នា ដើម្បីចុះបង្ក្រាប ដោយបទល្មើស ដែលមានកំលាំងសឹករង ប្រចាំការនៅជាមួយ ជនសង្ស័យទាំង៤នាក់ ត្រូវបានកសាងសុំរឿង បញ្ជូនទៅតុលាការ ។ 
